പെൺകരുത്തിൽ തിളങ്ങി ഗോൾഡൻ വോയ്‌സിന്റെ രണ്ടാം ഘട്ടം

ആദ്യ റൗണ്ടിലെ നാടക ഗാനങ്ങളിലും, രണ്ടാം ഘട്ടത്തിലെ സലിൽ ചൗധരി റൗണ്ടിലും ഗോൾഡൻ വോയ്‌സ് മത്സരവേദിയെ അക്ഷരാർഥത്തിൽ കൈപ്പിടിയിലാക്കുകയായിരുന്നു മറുനാട്ടിലെ ഗായികമാർ.

0
ആംചി മുംബൈ സംഘടിപ്പിക്കുന്ന മറുനാടൻ മലയാളി ഗായകർക്കായുള്ള പ്രായപരിധിയില്ലാത്ത മ്യൂസിക് റിയാലിറ്റി ഷോയിൽ ഇക്കുറി മത്സരാർഥികളായെത്തിയവരിൽ ഭൂരിഭാഗവും പെൺകുട്ടികളാണ്. ആദ്യ റൗണ്ടിലെ നാടക ഗാനങ്ങളിലും, രണ്ടാം ഘട്ടത്തിലെ സലിൽ ചൗധരി റൗണ്ടിലും ഗോൾഡൻ വോയ്‌സ് മത്സരവേദിയെ അക്ഷരാർഥത്തിൽ കൈപ്പിടിയിലാക്കുകയായിരുന്നു മറുനാട്ടിലെ ഗായികമാർ. വിധികർത്താക്കളെ അതിശപ്പിച്ചു കൊണ്ടായിരുന്നു 18 മത്സരാർഥികളും ഒന്നിനൊന്ന് മെച്ചപ്പെട്ട പ്രകടനങ്ങൾ കാഴ്ച വച്ചത്.
രാവിലെ 10 മണിക്ക് മുഖ്യാതിഥിയായ എൽ ഐ സി മാനേജിങ് ഡയറക്ടർ ബി വേണുഗോപാൽ, ചലച്ചിത്രപിന്നണിഗായകനും കർണാടക ശാസ്ത്രീയസംഗീതജ്ഞനുമായ ശങ്കരൻ നമ്പൂതിരി, പിന്നണി ഗായകൻ ബാബുരാജ് മേനോൻ, ശ്രീനാരായണ മന്ദിര സമിതി ജനറൽ സെക്രട്ടറി എൻ എസ് സലിംകുമാർ, ഗോൾഡൻ വോയ്‌സ് കോർഡിനേറ്റർ പി സത്യൻ, സാമൂഹിക പ്രവർത്തകൻ ഇ പി വാസു, ആംചി മുംബൈ ഡയറക്ടർ പ്രേംലാൽ എന്നിവർ ചേർന്ന് ഭദ്രദീപം കൊളുത്തി ഗോൾഡൻ വോയ്‌സ് രണ്ടാം ഘട്ടത്തിന് തുടക്കം കുറിച്ചു .
മറുനാട്ടിലെ പ്രതിഭകളെ കണ്ടെത്തുവാനും അവരെ മുഖ്യധാരയിലേക്ക് കൈപിടിച്ചുയർത്തുവാനും ഇത്തരം വേദികൾ വഹിക്കുന്ന പങ്ക് വളരെ വലുതാണെന്ന് ബി വേണുഗോപാൽ പറഞ്ഞു. വളർന്ന വരുന്ന ഗായകർക്ക് കിട്ടുന്ന വലിയ അവസരമാണ് ഗോൾഡൻ വോയ്‌സ് മറുനാട്ടിലെ കുട്ടികൾക്കായി വിഭാവനം ചെയ്ത സംഗീത പരിപാടിയെന്നും അനുകരണങ്ങളുടെ ചുവട് പിടിക്കാതെ ഗായകർ സ്വന്തമായ ശൈലി പ്രാപ്തമാക്കി മുന്നോട്ട് പോകണമെന്നും എൻ എസ് സലിംകുമാർ അഭിപ്രായപ്പെട്ടു.
മറുനാട്ടിലെ മലയാളി പ്രതിഭകൾക്ക് പ്രചോദനം നൽകി വിദ്യാഭ്യാസ മേഖലയിലെ പ്രമുഖരായ ഡോ ഉമ്മൻ ഡേവിഡ്, ലീല ഉമ്മൻ, സാമൂഹിക സാംസ്‌കാരിക രംഗത്തെ പ്രമുഖരായ വേൾഡ് മലയാളി കൗൺസിൽ ജനറൽ സെക്രട്ടറി എം കെ നവാസ്, ഇന്ത്യ ലോ മേധാവി അഡ്വക്കേറ്റ് ശ്രീജിത്ത്, വ്യവസായിയും സാമൂഹിക പ്രവർത്തകനുമായ അജയകുമാർ, അഡ്വക്കേറ്റ് പദ്മ ദിവാകരൻ, നടനും നിർമ്മാതാവുമായ മനോജ്‌കുമാർ, ഗോൾഡൻ വോയ്‌സ് ആദ്യ ഘട്ട മത്സരാർഥികൾ ആയിരുന്ന അഞ്ജലി നായർ, ദേവിക അഴകേശൻ, എൽ എൻ വേണുഗോപാൽ തുടങ്ങിയവർ സന്നിഹിതരായിരുന്നു.
മലയാളികൾ നെഞ്ചിലേറ്റിയ നാടക ഗാനങ്ങളുടെ പുനരാവിഷ്കാരമായിരുന്നു ആദ്യ റൗണ്ടിനെ അവിസ്മരണീയമാക്കിയത്. അമ്പിളി അമ്മാവാ താമര കുമ്പിളിലെന്തുണ്ട് എന്ന ഗാനമാലപിച്ചെത്തിയ അനുഷ്ക മേനോൻ മധുരിക്കും ഓർമ്മകൾ എന്ന ആദ്യ ഘട്ട മത്സരത്തിന് തുടക്കമിട്ടു. പിന്നീട് ചക്കര പന്തലിൽ തേന്മഴ തീർത്തു സന്ധ്യ പിഷാരഡിയും മാരിവില്ലിൻ തെന്മലരുമായി നിഥിൻ പിള്ളയും, ഇല്ലിമുളം കാടുകളെ പാടിയുണർത്തി നമിതാ മേനോനും വള്ളിക്കുടിലിന്റെ ഉള്ളിലിരിക്കുന്ന പുള്ളിക്കുയിലിനോട് പാട്ടു പാടാൻ പറഞ്ഞെത്തിയ സന്നിധിയുമെല്ലാം ഗൃഹാതുരുത തൊട്ടുണർത്തി മലയാള നാടക വേദിയുടെ സുവർണ കാലഘട്ടത്തിലേക്ക് കൂട്ടികൊണ്ടു പോകുകയായിരുന്നു.
വെള്ളാരം കുന്നിലെ പൊന്‍ മുളംകാട്ടിൽ പുല്ലാങ്കുഴലൂതുന്ന കാറ്റിനോട് സംവദിക്കാനെത്തിയ കൊച്ചു മിടുക്കി ജൂലിയ മേരി ജെയിംസ് കള്ളിമുണ്ടും ജാക്കറ്റുമിട്ട് വന്നാണ് കൈയ്യടി നേടിയത്.
സലിൽ ചൗധരി ഗാനങ്ങൾ കോർത്തിണക്കിയ രണ്ടാം ഘട്ട മത്സരത്തിലും മലയാളി മനസുകളിൽ പാടി പതിഞ്ഞ പാട്ടുകളുമായി മത്സരാർഥികൾ തിളങ്ങി.
ആദ്യ ഘട്ട മത്സരത്തിലെ 18 മത്സരാർഥികളിൽ നിന്നും 7 പേർ പുറത്തായപ്പോൾ അടുത്ത റൗണ്ടിൽ താഴെ കാണുന്ന 11 പേരായിരിക്കും മാറ്റുരക്കുക.
ഇശാനി ലക്ഷ്മി – അഹമ്മദാബാദ്
അനുഷ്ക മേനോൻ – വസായ്
നമിത മേനോൻ – വസായ്
സന്നിധി നായർ – ബോറിവിലി
വിദ്യ മോഹൻദാസ് – നെരൂൾ
നിഥിൻ പിള്ള – സി ബി ഡി ബേലാപ്പൂർ
ശ്രീകുമാർ മാവേലിക്കര – വാഷി , നവി മുംബൈ
നിഷ രാജൻ – ഡോംബിവ്‌ലി
സൂരജ് – ന്യൂ പൻവേൽ
കെസിയ വിനോജി – നാസിക്
ശ്രീജിത് കുമാരൻ, കാന്തിവിലി
ജനുവരിയിൽ നടക്കാനിരിക്കുന്ന അടുത്ത മത്സരം നാടൻ പാട്ടുകൾ കോർത്തിണക്കിയായിരിക്കും. കോസ്റ്റ്യൂമിനും ചുവടുകൾക്കും സാധ്യതയുള്ള റൗണ്ടിലേക്കായി ഇനിയുള്ള മത്സര വേദി തയ്യാറെടുക്കുമ്പോൾ ആവേശത്തോടൊപ്പം തന്നെ കടുത്ത വെല്ലുവിളിയാകും മത്സരാർത്ഥികൾക്ക്. ഇതുവരെയുള്ള മത്സരങ്ങളിലിലെ മാർക്കുകളുടെ അടിസ്ഥാനത്തിൽ മേൽക്കോയ്മ കൈയ്യടക്കിയാണ് പെൺപ്രഭ ശോഭിക്കുന്നത്.

മറുനാട്ടിലെ മലയാളി പ്രതിഭകൾക്ക് പ്രചോദനം നൽകി നിരവധി പ്രമുഖർ ആശംസകളുമായി മത്സരവേദിയിലെത്തി
സംഗീതത്തെ ആഘോഷമാക്കാൻ വീണ്ടും ഗോൾഡൻ വോയ്‌സ് ഒരുങ്ങുന്നു

LEAVE A REPLY

Please enter your comment!
Please enter your name here