കവിത മോഷണം തന്നെ !! തുറന്ന് പറഞ്ഞു ദീപ നിശാന്ത്; തുറന്നടിച്ചു മുംബൈ

1
കോളേജ് അദ്ധ്യാപികയായ ദീപ നിശാന്ത് പ്രസിദ്ധീകരിച്ച കവിത മോഷ്ടിച്ചതാണെന്ന കുറ്റസമ്മതത്തോടെ ദീപ തന്നെ രംഗത്തെത്തി . കവിത തനിക്ക് തന്നത് സാംസ്‌ക്കാരിക പ്രഭാഷകന്‍ എം ജെ ശ്രീചിത്രൻ ആണെന്നും ദീപ വെളിപ്പെടുത്തി. കടുത്ത സമ്മർദ്ദത്തിനൊടുവിലാണ് ഒരു തുറന്നു പറച്ചിലിന് ദീപ തയ്യാറായത്. വിവിധ മാധ്യമങ്ങൾക്ക് നൽകിയ അഭിമുഖത്തിലാണ് താന്‍ ‘ട്രാപ്’ ചെയ്യപ്പെടുകയാണുണ്ടായതെന്നും ദീപാ നിശാന്ത് വ്യക്തമാക്കിയത്. പ്രമുഖ ദലിത് കവി കലേഷ് എഴുതിയ കവിതയാണ് വിവാദത്തിലായത്
ശ്രീചിത്രനാണ് സ്വന്തം കവിതയെന്ന രീതിയില്‍ കവിത നല്‍കി തന്നെ ചതിച്ചതെന്നും, പ്രസിദ്ധീകരിക്കാന്‍ അനുമതി നൽകി വഞ്ചിക്കുകയായിരുന്നെന്നും ദീപാ വെളിപ്പെടുത്തി. കവിതാ വിവാദവുമായി ബന്ധപ്പെട്ട് ശ്രീചിത്രന്റെ പേര് പുറത്തുവന്നപ്പോള്‍ അദ്ദേഹമത് ആദ്യം നിഷേധിക്കുകയാണ് ചെയ്തത്. എന്നാല്‍ മാധ്യമങ്ങളോട് തന്റെ പങ്ക് ശ്രീചിത്രന്‍ നിഷേധിച്ചതിനെ തുടര്‍ന്നാണ് ദീപാ നിശാന്ത് കാര്യങ്ങൾ തുറന്നടിച്ചത്. തുടർന്ന് ശ്രീചിത്രനും കലേഷിനോട് മാപ്പ് ചോദിച്ചു.
ദീപാ നിശാന്തിന്റെ പ്രതികരണം പൂര്‍ണ്ണരൂപം:
“മറ്റൊരു വ്യക്തിയേയും ഇതിലേക്ക് കൊണ്ടുവരേണ്ട എന്ന് കരുതിയാണ് ഇത്രയും നേരം പ്രതികരിക്കാതിരുന്നത്. ഞാന്‍ ഒരിക്കലും വെളിപ്പെടുത്താന്‍ ആഗ്രഹിക്കാത്ത കാര്യമാണ്. ഇതിന്റെ എല്ലാ ആരോപണങ്ങളും വരുന്നത് എനിക്കെതിരെ മാത്രമായിരിക്കും എന്നെനിക്ക് ഉറപ്പുണ്ട്. നിഷേധിച്ചില്ലെങ്കില്‍ ആര്‍ക്ക്? എന്തിന് അയച്ചു? എന്നതിനൊക്കെ മറ്റ് വ്യാഖ്യാനങ്ങളാകും ഉണ്ടാകുക എന്നും അതുകൊണ്ട് ഇക്കാര്യം വരുമ്പോള്‍ അത് നിഷേധിക്കുന്നതാണ് നല്ലതെന്നുമാണ് ആയാള്‍ എന്നോട് പറഞ്ഞത്. അയാള്‍ ഫേസ്ബുക്ക് പോസ്റ്റിട്ടത് ഞാന്‍ അറിഞ്ഞു. അയാളുടെ പേര് മാധ്യമങ്ങള്‍ വഴി പുറത്തുവന്നുകഴിഞ്ഞു. ഞാനായിട്ട് പേര് പറയുന്നില്ല.
അത് ഞാന്‍ എഴുതിയതല്ല. മറ്റൊരാള്‍ എന്നെ ഏല്‍പിച്ചതാണ്. അത് പ്രസിദ്ധീകരണത്തിന് കൊടുത്തത് എന്റെ തെറ്റാണ്. അങ്ങനെ ഞാനതില്‍ ട്രാപ് ചെയ്യപ്പെട്ടതാണ്. പക്ഷേ, വ്യക്തിപരമായ കാരണങ്ങള്‍ കൊണ്ട് ആര് എനിക്കിത് തന്നു എന്ന് പറയാന്‍ ഞാനില്ല. ഇക്കാര്യം ഞാന്‍ പിന്നീട് എഴുതുന്നുണ്ട്. ഏകപക്ഷീയമായി അയാള്‍ രക്ഷപെടുകയും ഞാന്‍ ഇരയാക്കപ്പെടുകയും വേണ്ടതില്ലല്ലോ. സംഘ്പരിവാറും മറ്റും ഇതെടുത്ത് ആഘോഷിക്കും എന്നുള്ളതുകൊണ്ടാണ് ഇത്ര നേരവും മിണ്ടാതിരുന്നത്.
അയാള്‍ എന്റെ കാലുപിടിച്ച് പറഞ്ഞിട്ടുണ്ട്. ഇത്തരം ഒരുകാര്യം പുറത്തറിഞ്ഞാല്‍, അയാളുടെ കുടുംബവും അയാള്‍ക്കുള്ള ഫെയ്മും സാഹചര്യങ്ങളും തകര്‍ന്നുപോകുമെന്ന ഭയം ആയാള്‍ക്കുണ്ട്.”

::::::

കേരളത്തിന് പുറത്തു ഏറ്റവും കൂടുതൽ സാഹിത്യ ഇടപെടലുകൾ നടക്കുന്ന മുംബൈ നഗരത്തിലെ പ്രമുഖ എഴുത്തുകാർ ഈ വിഷയത്തോട് പ്രതികരിക്കുന്നു.
പണ്ട് മുതലേ ദീപയിൽ ഒരു സ്പെല്ലിങ് മിസ്റ്റേക്ക് തോന്നിയിട്ടുണ്ട്. സെൽഫ് മാർക്കറ്റിംഗ് നന്നായറിയാവുന്ന കച്ചവടക്കാരി എന്നതിനപ്പുറം ഒരു ബഹുമാനവും അവരോട് തോന്നിയിട്ടുമില്ല  –  ഡിംപിൾ ഗിരീഷ് 


മേഘനാദൻ, കഥാകാരൻ

കലേഷ് പറയുന്നതിൽ ശരിയുണ്ട്. അദ്ദേഹത്തിന്റെ കവിത മറ്റൊരാൾ മോഷ്ടിച്ചെടുത്തുവെന്ന് തെളിഞ്ഞിരിക്കുന്നു. മോഷ്ടാവ് എത്ര വലിയ പദവിയിലിരിക്കുന്ന ആളായാലും ആ തെറ്റ് സമ്മതിച്ച് ഉരുണ്ടുകളിക്കാതെ കൃത്യമായ മറുപടി നൽകുകയാണു വേണ്ടത്. മോഷ്ടിക്കാമെന്നുണ്ടെങ്കിൽ മറുപടി പറയാനെന്തിനു മടിക്കുന്നു? വലിയ കവികളെപ്പോലും സംശയിക്കേണ്ട സാഹചര്യമാണ് ഇതുണ്ടാക്കിയിരിക്കുന്നത്.

::::::

പി കെ മുരളീകൃഷ്ണൻ, കവി, നാടക പ്രവർത്തകൻ 

ഞാൻ പൂർണ്ണമനസ്സോടെ പ്രിയ കവി, എസ് കലേഷിനോടൊപ്പമാണ്. കലേഷ്, കേസ് കൊടുക്കണമെന്നാണ് എന്റെ വ്യക്തിപരമായ അഭിപ്രായം.
“അങ്ങനെയിരിക്കെ മരിച്ചു പോയി ഞാൻ / നീ” എന്ന കവിത വളരെ മുൻപ്, കലേഷിന്റെ ബ്ലോഗിലും പിന്നീട് മുഖപുസ്തകത്തിൽ കവിത ആരോ പരിചയപ്പെടുത്തിയപ്പോഴും വായിച്ചതോർക്കുന്നു.
“കവിതമലയാള “ത്തിന്റെ വഴിയിൽ വളരെ മുന്നിലേക്കുള്ള ഒരേറുപോലെ വ്യത്യസ്ഥമായൊരു കവിതയാണിതെന്ന്, അന്നേ തോന്നിയിരുന്നു. കലേഷിന്റെ “ശബ്ദമഹാസമുദ്രം” എന്ന കവിതാ സമാഹാരത്തിലും പിന്നീട് അതിന്റെ ആംഗല പരിഭാഷ ഇന്ത്യൻ ലിറ്ററേച്ചറിലും വന്നെന്നു കേട്ടിട്ടുണ്ട്. മറ്റൊരാളുടെ കവിത സ്വന്തം പേരിൽ ചിത്രസഹിതം അച്ചടിച്ചു വന്നതിനു ശേഷം, അഭ്യസ്തവിദ്യരെന്നു വിളിക്കപ്പെടുന്നവർ, അതിനെ, ഉളുപ്പില്ലാതെ, യാതൊരു അടിസ്ഥാനവുമില്ലാതെ ന്യായീകരിക്കുന്നത് അംഗീകരിക്കാനാവില്ല. എന്റെ സുഹൃത്തും പൊന്നാനി എം ഇ എസിൽ കോളേജ്മേറ്റുമായിരുന്ന പ്രൊഫ. വിജു നായരങ്ങാടി, സാഹിത്യ മോഷണത്തിന്റെ പൂർവ്വകാല പാലക്കാടൻ കോളേജ് അനുഭവങ്ങളിലേക്ക് പരസ്യമായി വെളിച്ചം വീശിയതിൽ നിന്ന്, ഇത് ഇന്നലെ നടന്ന ഒരബദ്ധമല്ല, വർഷങ്ങളായി നടന്നു കൊണ്ടിരിക്കുന്ന “കൂട്ടുകൃഷി” തന്നെയാണെന്ന് ആരെങ്കിലും സംശയിച്ചാൽ, അതിൽ തെറ്റു പറയാനാവില്ല.

 

കലാ സാഹിത്യ രംഗത്തെ ഇത്തരം പ്രവണത യാതൊരു വിധത്തിലും വെച്ചുപൊറുപ്പിക്കുവാൻ അനുവദിക്കരുത്.  മുഖ്യധാരാ പ്രസിദ്ധീകരണങ്ങൾ മാത്രമല്ല, അച്ചടി മലയാളം തന്നെ ഒരു കാലത്ത് പുത്തനെഴുത്തിനെ നാടുകടത്തിയപ്പോൾ, ബ്ലോഗിലൂടെയും, നവ സാമൂഹ്യ മാധ്യമങ്ങളിലൂടെയും എഴുതിത്തെളിഞ്ഞ് മലയാള കവിതയിൽ അടയാളം വെച്ച ഒരു തലമുറയുടെ കണ്ണികളിലൊന്നാണ് കലേഷ്. ഭാഷയിൽ അസാധ്യമായ ഇടപെടലുകളും പുതുക്കിപ്പണിയലും കൊണ്ട് സ്വന്തമായ ഒരിടം കണ്ടെത്തിയവൻ. നല്ല കവിയാണ് കലേഷ്.  സാഹിത്യ രംഗത്ത് ഊതി വീർപ്പിക്കപ്പെട്ടവരുടെ ഗണത്തിൽ അവനെ ഉൾപ്പെടുത്താനും കഴിയില്ല.  ജാതി മത രാഷ്ട്രീയ ഭേദമന്യേ, മലയാളം കലേഷിനൊപ്പം നിൽക്കണം. കലേഷിന് നീതി ലഭിക്കണം.

::::::


ഗിരിജാവല്ലഭൻ, എഴുത്തുകാരൻ

കഥകളിലും കവിതകളിലുമൊക്കെ ഇതിവൃത്തത്തില്‍ സാദൃശ്യമുണ്ടാകുന്നത് അത്ര വലിയ അപരാധമൊന്നുമല്ല. പക്ഷേ മുമ്പ് പ്രസിദ്ധീകരിച്ച ഒരു രചന മറ്റൊരാളുടെ പേര് വച്ച് പ്രസിദ്ധീകരിക്കുന്നത് മാപ്പ് അര്‍ഹിക്കാത്ത അപരാധമാണ്. ദീപ നിശാന്തിന്റെ പേര് വച്ച് ഈയിടെ പ്രസിദ്ധീകരിച്ച കവിതയില്‍ എസ.കലേഷിന്റെ 2011 ല്‍ പ്രസിദ്ധീകരിച്ച കവിതയിലെ അതേ വരികള്‍; ചില വരികളില്‍ മാറ്റങ്ങള്‍ വന്നിട്ടുണ്ടെന്ന് മാത്രം. ദീപ നിശാന്ത് ക്ഷമ ചോദിച്ചെങ്കിലും, എന്തൊക്കെയോ മറച്ചു വക്കാന്‍ അവര്‍ ശ്രമിക്കുന്നില്ലേ? മുഴുവൻ കാര്യങ്ങളും പറയാനാവാകാത്ത ചില പ്രതിസന്ധികൾ അതിലുണ്ട്, ആ പ്രതിസന്ധികൾ കാലം തെളിയിക്കും എന്നൊക്കെയല്ലേ ദീപ പറയുന്നത്. എന്താണ് ഇനിയും ഇതിലുള്ള രഹസ്യങ്ങള്‍?

::::::


വടശ്ശേരി സോമൻ, പത്രപ്രവർത്തകൻ

ഒരു മാപ്പു പറച്ചിലിൽ ചെയ്ത തെറ്റ് കഴുകിയുണക്കാൻ പറ്റിയേക്കാം…
പക്ഷേ… ആ സാഹിത്യ സൃഷ്ടിയുടെ യഥാർത്ഥ സൃഷ്ടാവിനെ സംബന്ധിച്ചിടത്തോളം അയാൾക്ക് അയാളുടെ സംശയങ്ങൾക്കും ചോദ്യങ്ങൾക്കുമുള്ള മറുപടിയാണാവശ്യം… അത് നൽകാൻ ശ്രീമതി ദീപ നിശാന്ത് ബാദ്ധ്യസ്ഥയാണ്…,
::::::


രാജൻ കിണറ്റിങ്കര, സാഹിത്യകാരൻ

ഒരേ വിഷയത്തിൽ രണ്ടു പേർ രണ്ടു കാലഘട്ടങ്ങളിൽ എഴുതുമ്പോൾ ചില സാദൃശ്യങ്ങളും സമാനതകളും കണ്ടേയ്ക്കാം പക്ഷെ ഇവിടെ സംഭവിച്ചത് സമാനതകൾ ഇല്ലാത്ത വരികൾ കുറവാണെന്നാണ്. കവിതയുടെ ടൈറ്റിലിനെ പോലും വെറുതെ വിട്ടില്ല. സോഷ്യൽ മീഡിയകളിൽ ഇത്തരം സംഭവങ്ങൾ നടക്കാറുണ്ടെങ്കിലും തെറ്റ് എങ്ങിനെ സംഭവിച്ചു എന്നതിന്റെ ഉത്തരവാദിത്വത്തിൽ നിന്ന് രചയിതാവെന്ന് പറയുന്ന ആൾക്ക് ഒഴിഞു മാറാനാകില്ല. വിശദീകരണങ്ങൾ വിഫലമാകുന്ന ചില സന്ദർഭങ്ങളുണ്ട് പ്രത്യേകിച്ചും സാഹിത്യലോകത്ത് . ജാഗരൂകരാകേണ്ടിയിരിക്കുന്നു എഴുത്തുകാർ. ഇത് യഥാർത്ഥ രചയിതാവിന് ഉണ്ടാക്കുന്ന വിഷമം ചെറുതല്ല.

:::::::


ഡിംപിൾ ഗിരീഷ്, എഴുത്തുകാരി, നർത്തകി

കലേഷിന്റെ കവിത മോഷ്ടിച്ചതും ശ്രീ ചിത്രൻ അത് ദീപ നിഷാന്തിന് കൊടുത്തതും അവരുടെ പേരിൽ സർവീസ് മാഗസിനിൽ അച്ചടിച്ചു വന്നതും തെറ്റ് തന്നെയാണ്, ശ്രീ ചിത്രൻ മുൻപും അത് ചെയ്തിട്ടുണ്ട് എന്നത് തെളിവ് സഹിതം പലരും നിരത്തുന്നു. മാപ്പ് അല്ല കലേഷിന് മറുപടിയാണ് കൊടുക്കേണ്ടത് എന്ന പക്ഷത്തു തന്നെയാണ് ഞാനും… (ദളിത്‌ സ്ത്രീ സവർണ്ണൻ എന്നതൊന്നും ഇവിടെ വിഷയമേ ആക്കേണ്ടതില്ല ) എങ്കിലും വേറെ ചിലത് കൂടി പറയാനുണ്ട്.
കവിത മോഷ്ടിക്കുന്നതും അച്ചടിക്കുന്നതുമൊക്കെ ലോകത്ത് ആദ്യമായി സംഭവിക്കുന്ന കാര്യമാണോ? അതിത്രയും ചർച്ചയാക്കേണ്ട വിഷയമാണോ?
പണ്ട് മുതലേ ദീപയിൽ ഒരു സ്പെല്ലിങ് മിസ്റ്റേക്ക് തോന്നിയിട്ടുണ്ട്. സെൽഫ് മാർക്കറ്റിംഗ് നന്നായറിയാവുന്ന കച്ചവടക്കാരി എന്നതിനപ്പുറം ഒരു ബഹുമാനവും അവരോട് തോന്നിയിട്ടുമില്ല… ദീപ ഒളിച്ചു വെക്കുന്നുണ്ട് പലതും ഇപ്പോഴും… ഇനിയെന്തെങ്കിലും അവർ തുറന്ന് പറയുമോ എന്നത് കണ്ടറിയണം.
കേരളത്തിൽ ശബരിമല വിഷയവുമായി ബന്ധപ്പെട്ട് നടന്നു വന്ന നവോത്ഥാന പ്രസംഗങ്ങളിലെ സ്ഥിര സാന്നിധ്യമായ ശ്രീചിത്രനെ ഒതുക്കി ഒരു മൂലക്ക് ഇരുത്തുക എന്നത് പലരുടെയും നിലനില്പിന്റെ തന്നെ പ്രശ്നമായി മാറിയിട്ടുണ്ട് എന്നത് ചേർത്ത് വായിക്കുമ്പോൾ മോഷ്ടിക്കപ്പെട്ട കവിതക്കുമപ്പുറം ആരൊക്കെയോ ചേർന്ന് മറ്റെന്തൊക്കെയോ കൂടി സൃഷ്ടിച്ചെടുക്കാൻ ശ്രമിച്ചതിന്റെ അനന്തര ഫലം മാത്രമാണ് ഈ വിവാദം എന്ന് കണ്ണടച്ച് ഇരുട്ടാക്കാത്ത ആർക്കും മനസിലാവുന്ന ഒന്ന് തന്നെയാണ്. ടാർഗറ്റ് ശ്രീചിത്രനിലേക്ക് തന്നെയാണ് ഉറ്റു നോക്കുന്നത്.


 

1 COMMENT

  1. ദീപാ നിഷാന്തിന്റെ തുറന്നു പറച്ചിൽ അംഗീകരിച്ചാൽ പോലും തെറ്റ് തെറ്റ് തന്നെയാണ്. ലജ്ജിക്കുന്നു.

LEAVE A REPLY

Please enter your comment!
Please enter your name here