മുംബൈ: “അച്ഛാ… കൊറച്ച് പൈസ വേണം, അർജന്റാ…” എന്ന വരികളിലൂടെ സോഷ്യൽ മീഡിയയിൽ വൈറലായ പാരഡി ഗാനം ലോകമെമ്പാടുമുള്ള മലയാളികളുടെ പ്രിയപ്പെട്ട റീൽ ട്രാക്കായി മാറിയിരിക്കുകയാണ്. സൗദി അറേബ്യയിൽ ജോലി ചെയ്യുന്ന കാസർഗോഡ് സ്വദേശിയായ പ്രേം എഴുതി ആലപിച്ച ഈ ഗാനം പുറത്തിറങ്ങി ദിവസങ്ങൾക്കകം തന്നെ അഞ്ച് മില്യണിലധികം കാഴ്ചക്കാരെ സ്വന്തമാക്കി. ഒരു തെലുങ്കു സിനിമാ പാട്ടിൻ്റെ ഈണത്തിൽ മൂളിയ വരികൾ ഇപ്പോൾ സമൂഹ മാധ്യമങ്ങളിൽ ചിരിയും കൗതുകവും പടർത്തുകയാണ്
പ്രേമിൻ്റെ പാട്ട് ഇഷ്ടപ്പെട്ട അസാമിലെ യുവ സംഗീത സംവിധായകൻ ബിട്ടു ബാബ ഇതിനൊരു എഐ വേർഷൻ തയ്യാറാക്കിയതോടെ പാട്ട് തരംഗമായി.
ലോകത്തിന്റെ വിവിധ ഭാഗങ്ങളിൽ നിന്നുള്ള മലയാളികൾ ഈ ഗാനത്തിനൊപ്പം രസകരമായ റീലുകൾ ഒരുക്കി പങ്കുവയ്ക്കുകയും ട്രെൻഡിനെ കൂടുതൽ ജനപ്രിയമാക്കുകയും ചെയ്തു.
ഇപ്പോൾ ഈ വൈറൽ ട്രെൻഡിൽ മുംബൈ മലയാളികളും സജീവമാണ്. ഡോംബിവ്‌ലിയിലെ സുനീപും, ഖാർഘറിലെ നിഷ മധുവും ഈ ഗാനത്തിനൊപ്പമുള്ള റീലുകൾ സമൂഹമാധ്യമങ്ങളിൽ പങ്കുവെച്ചിട്ടുണ്ട്. അവരുടെ വീഡിയോകളും മികച്ച പ്രതികരണമാണ് നേടുന്നത്.
ഒരു ലളിതമായ പാരഡി ഗാനമായി ആരംഭിച്ച ഈ സൃഷ്ടി ഇന്ന് ലോകമെമ്പാടുമുള്ള മലയാളികളെ ഒരേ താളത്തിൽ കൂട്ടിയിണക്കുന്ന സോഷ്യൽ മീഡിയ ആഘോഷമായി മാറിയിരിക്കുകയാണ്.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | APRIL 11 2026 SATURDAY 4.30 P.M. | KAIRALI NEWS
