ഡോക്ടർ സുകുമാർ അഴീക്കോട് പുരസ്കാര ജേതാവും, കേരളീയ സമാജം മുൻ ഭരണസമിതി അംഗവുമായിരുന്ന പ്രേമൻ ഇല്ലത്തിനെ, ഡോമ്പിവലി കേരളീയ സമാജം ഭാരവാഹികൾ, അദ്ദേഹത്തിന്റെ വസതിയിലെത്തി സ്നേഹാദരങ്ങൾ അറിയിച്ചു. കേരളീയ സമാജം ജനറൽ സെക്രട്ടറി രാജശേഖരൻ നായർ, ഫലകവും ഉപഹാരവും നൽകി. കലാവിഭാഗം സെക്രട്ടറി സുരേഷ് നായർ, സമാജം മുൻ ഭാരവാഹി ബാലകുറുപ്പ്, സമാജം പ്രവർത്തകർ ഗോവിന്ദൻ കുട്ടി, ചെല്ലപ്പൻ പിള്ള തുടങ്ങിയവർ സന്നിഹിതരായിരുന്നു. പ്രേമൻ ഇല്ലത്തിനു ലഭിച്ച അംഗീകാരം, കേരളീയ സമാജത്തിന്റെ അഭിമാനമാണെന്ന് രാജശേഖരൻ നായർ പറഞ്ഞു.
തന്നെ എഴുത്തുകാരനാക്കിയത് മുംബൈ നഗരമാണെന്നും എഴുത്തു ജീവിതത്തിന്റെ ബാലപാഠങ്ങളിൽ ഡോമ്പിവലി കേരളീയ സമാജവും സാഹിത്യവിഭാഗവും ഊർജ്ജസ്ഥലികളായിരുന്നെന്നും പ്രേമൻ ഇല്ലത്ത് മറുമൊഴിയിൽ ഓർമ്മിച്ചു.
കേരളീയ സമാജം അതിന്റെ പ്രവർത്തനവഴികളിൽ 75വർഷങ്ങൾ പിന്നിടുമ്പോൾ, കൂടുതൽ കലാ സാഹിത്യ ഇടപെടലുകളും ജനസമ്പർക്ക പരിപാടികളും ഉണ്ടാവുമെന്ന്, രാജശേഖരൻ വ്യക്തമാക്കി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
