ശ്രീനാരായണ മന്ദിരസമിതിയുടെ ആഭിമുഖ്യത്തിൽനടന്ന 171-ാമത് ശ്രീനാരായണ ഗുരുദേവ ജയന്തി ചെമ്പൂർ ശ്രീനാരായണ കോംപ്ലെക്സിൽ ആഘോഷിച്ചു. സമിതിയുടെ വിവിധയൂണിറ്റുകളിൽനിന്നായി മൂവായിരത്തിലധികംപേർ ആഘോഷ പരിപാടികളിൽ പങ്കെടുക്കാനെത്തി.

നബാർഡ് ചെയർമാൻ ഡോ. ഷാജി കെ.വി മുഖ്യാതിഥിയായിരുന്നു. ശ്രീനാരായണ ഗുരുദേവൻ ഒരു നൂറ്റാണ്ടു മുൻപ് ആവശ്യപ്പെട്ട കാര്യങ്ങളാണ് ഇപ്പോൾ കേന്ദ്ര-സംസ്ഥാന സർക്കാരുകളും നബാർഡ് ഉൾപ്പെടെയുള്ള സാമ്പത്തിക വികസന സ്ഥാപനങ്ങളും നടപ്പാക്കിക്കൊണ്ടിരിക്കുന്നതെന്ന് നബാർഡ് ചെയർമാൻ ഡോ. ഷാജി കെ.വി. പറഞ്ഞു.

ശിവഗിരി ശ്രീനാരായണ ധർമസംഘം ജനറൽസെക്രട്ടറിയായ സ്വാമി ശുഭാംഗാനന്ദ അനുഗ്രഹപ്രഭാഷണം നടത്തി.

ഗുരുദേവൻ ഈ സമൂഹത്തിനു നൽകിയ മഹത്തായ ഉദ്ബോധനങ്ങളെയും ഉപദേശങ്ങളെയും തത്ത്വസംഹിതയെയും സംബന്ധിച്ച് ചർച്ചചെയ്യുകയും അത് നമ്മുടെ ജീവിതത്തിൽ പകർത്തി, യഥാർഥമനുഷ്യനായി ജീവിക്കുകയുമാണ് ഓരോ കൂട്ടായ്മയിലൂടെയും നാം ചെയ്യേണ്ടതെന്ന് സ്വാമി ശുഭാംഗാനന്ദ പറഞ്ഞു.

കേരള സർവകലാശാല മുൻ ഡീനും ശിവഗിരി മഠം മുൻ അഡ്മിനിസ്‌ട്രേറ്ററുമായ ഡോ. എം. ശാർങ്ഗധരൻ വിശിഷ്ടാതിഥിയായിരുന്നു.

മുംബൈയിലെ മുതിർന്ന സാമൂഹിക പ്രവർത്തകൻ ഇ പി വാസു, വി.കെ. മുരളീധരൻ, അഭിജിത് അമൽരാജ് എന്നിവരെ ആദരിച്ചു

എൺപതുകൾ മുതൽ ശ്രീനാരായണ മന്ദിര സമിതിയിൽ പ്രവർത്തിക്കുന്ന ഇ പി വാസു സോണൽ സെക്രട്ടറി, അസിസ്റ്റന്റ് ട്രഷറർ, വൈസ് ചെയർമാൻ, ജനറൽ സെക്രട്ടറി തുടങ്ങിയ സ്ഥാനങ്ങളിൽ സേവനമനുഷ്ഠിച്ചിട്ടുണ്ട്. ശ്രീനാരായണ കോ ഓപ്പറേറ്റീവ് ബാങ്കിന്റെ ഡയറക്ടർ കൂടാതെ ഡോംബിവ്‌ലി കേരളീയ സമാജം പ്രസിഡന്റ് കൂടിയാണ് മുംബൈയിലെ സാമൂഹിക സാംസ്‌കാരിക രംഗത്ത് സജീവമായ ഇ.പി. വാസു.

സമിതിയുടെ പാട്രണും വ്യവസായിയും സാമൂഹികപ്രവർത്തകനുമായ വി.കെ. മുരളീധരൻ, റോളർ സ്കേറ്റിങ് ചാമ്പ്യൻ അഭിജിത് അമൽരാജ് എന്നിവരെയും ചടങ്ങിൽ ആദരിച്ചു.

സമ്മേളനത്തിൽ സമിതി പ്രസിഡന്റ് എം.ഐ. ദാമോദരൻ അധ്യക്ഷനായിരുന്നു. സമിതിയുടെ വിദ്യാഭ്യാസ, സാമൂഹിക രംഗത്തെ പ്രവർത്തനങ്ങളെക്കുറിച്ച് അദ്ദേഹം വിശദീകരിച്ചു. ജനറൽസെക്രട്ടറി ഒ.കെ. പ്രസാദ് സ്വാഗതംപറഞ്ഞു. വൈസ് ചെയർമാൻ എസ്. ചന്ദ്രബാബു, സോണൽ സെക്രട്ടറി മായാ സഹജൻ എന്നിവരും പ്രസംഗിച്ചു. ട്രഷറർ വി.വി. ചന്ദ്രൻ, അസിസ്റ്റന്റ് സെക്രട്ടറി വി.എൻ. അനിൽകുമാർ, അസിസ്റ്റന്റ് ട്രഷറർ പി. പൃഥ്വിരാജ്, സോണൽ സെക്രട്ടറിമാരായ പി.കെ. ആനന്ദൻ, വി.വി. മുരളീധരൻ, കെ. മോഹൻദാസ്, കെ. ഉണ്ണികൃഷ്ണൻ, പി. ഹരീന്ദ്രൻ, എൻ.എസ്. രാജൻ, പി.പി. കമലാനന്ദൻ എന്നിവർ വേദിയിൽ സന്നിഹിതരായിരുന്നു.

ഡോ. എം. ശാർങ്ഗധരൻ രചിച്ച ബിയോണ്ട് സ്പിരിച്ച്വാലിറ്റി എന്ന പുസ്തകത്തിന്റെ പ്രകാശനം എന്നിവനടന്നു. കഴിഞ്ഞവർഷം മികച്ച വിജയം നേടിയ വിദ്യാർഥികൾക്കുള്ള മെറിറ്റ് അവാർഡ് വിതരണംചെയ്തു. സമിതിയുടെ വിവിധയൂണിറ്റുകളിൽ നിന്ന്‌ തിരഞ്ഞെടുത്ത കലാപരിപാടികളുമുണ്ടായിരുന്നു. എം.എം. രാധാകൃഷ്ണൻ കൺവീനറായുള്ള പ്രോഗ്രാം കമ്മിറ്റിയായിരുന്നു പരിപാടികൾ നിയന്ത്രിച്ചത്.