മാവേലിക്ക് ചെണ്ടമേളത്തിന്റെ അകമ്പടിയോടെ സ്വീകരണം; വൈവിധ്യമാർന്ന കലാപരിപാടികളും അനുമോദനച്ചടങ്ങുകളും
നവി മുംബൈ: ന്യൂ ബോംബെ കേരളീയ സമാജത്തിന്റെ ആഭിമുഖ്യത്തിൽ സംഘടിപ്പിച്ച എൻ.ബി.കെ.എസ് ഓണം 2026 ബാനുശാലി വാടി ഹാളിൽ പ്രൗഢഗംഭീരമായി ആഘോഷിച്ചു. കേരളീയ സംസ്കാരത്തിന്റെയും ഓണത്തിന്റെ ഐക്യസന്ദേശത്തിന്റെയും തനിമ ഉയർത്തിപ്പിടിച്ച ആഘോഷത്തിൽ നവി മുംബൈയിലെ മലയാളി സമൂഹത്തിന്റെ സജീവ പങ്കാളിത്തമുണ്ടായി.
ചെണ്ടമേളത്തിന്റെ അകമ്പടിയോടെ മാവേലിക്ക് സ്വീകരണം നൽകിയാണ് ആഘോഷ പരിപാടികൾക്ക് തുടക്കമായത്. സമാജം പ്രസിഡന്റ് കെ. എ. കുറുപ്പ് അധ്യക്ഷത വഹിച്ചു. ജനറൽ സെക്രട്ടറി പ്രകാശ് കാട്ടാക്കട സ്വാഗതം പറഞ്ഞു. നോർക്ക ഡെവലപ്മെന്റ് ഓഫീസർ ആർ. ബി. അരുൺ മുഖ്യാതിഥിയായി. എൻ.എം.എം.സി. കോർപ്പറേറ്റർ നേത്ര ഷിർക്കെ ചടങ്ങിൽ സന്നിഹിതയായിരുന്നു. വിവിധ മലയാളി സംഘടനകളുടെയും സഹോദര സംഘടനകളുടെയും പ്രതിനിധികളും ആഘോഷത്തിൽ പങ്കെടുത്തു.
വൈവിധ്യമാർന്ന കലാപരിപാടികൾ
തുടർന്ന് അരങ്ങേറിയ കലാപരിപാടികൾ ആഘോഷത്തിന് നിറപ്പകിട്ടേകി. മഹിളാ വിംഗിന്റെ കൈകൊട്ടിക്കളി, സംഗീതാവതരണങ്ങൾ, മലയാളം ക്ലാസിലെ കുട്ടികളുടെ പരിപാടികൾ എന്നിവ ശ്രദ്ധേയമായി.
ഭരതനാട്യം, മോഹിനിയാട്ടം, കഥക് തുടങ്ങിയ നൃത്തരൂപങ്ങളുടെ അവതരണങ്ങളും പ്രേക്ഷകശ്രദ്ധ നേടി. യൂത്ത് വിംഗ്, നൃത്തവിഭാഗം, സമാജാംഗങ്ങൾ എന്നിവരുടെ വിവിധ കലാപരിപാടികളും അരങ്ങേറി.
സമാജത്തിന്റെ പ്രതിമാസ സംഗീതവേദിയായ ‘പാട്ടരങ്ങ്’ അംഗങ്ങളുടെ ഗാനാവതരണവും ഓണാഘോഷത്തിന് സംഗീതമാധുര്യം പകർന്നു.
വിദ്യാർഥികളെ അനുമോദിച്ചു
എസ്.എസ്.സി., എച്ച്.എസ്.സി. പരീക്ഷകളിൽ മികച്ച വിജയം നേടിയ വിദ്യാർഥികളെയും മലയാള മിഷന്റെ നീലക്കുറിഞ്ഞി പരീക്ഷ വിജയികളെയും ചടങ്ങിൽ അനുമോദിച്ചു. വിവിധ ഇൻഡോർ മത്സരങ്ങളിലെ വിജയികൾക്കും സമ്മാനങ്ങൾ വിതരണം ചെയ്തു.
കായിക മത്സരങ്ങളിലും ആവേശകരമായ പോരാട്ടമാണ് നടന്നത്. വടംവലി മത്സരത്തിൽ ലിറ്റിൽ ഫ്ലവർ ഫൊറോന ചർച്ച്, നെരൂൾ ഒന്നാം സ്ഥാനവും ജി. ആൻഡ് ബി. ഇലക്ട്രിക്കൽസ് രണ്ടാം സ്ഥാനവും നേടി. ഉറിയടി മത്സരവും കാണികൾക്ക് ആവേശമായി.
സമാജം ഭാരവാഹികളും വിവിധ വിഭാഗങ്ങളുടെ പ്രവർത്തകരും അംഗങ്ങളും ചേർന്ന് ആഘോഷ പരിപാടികൾ ഏകോപിപ്പിച്ചു. കലാസമിതി കൺവീനർ എം. ആർ. പണിക്കർ നന്ദി പറഞ്ഞു.
കേരളീയ കലയും സംസ്കാരവും പാരമ്പര്യവും പുതുതലമുറയിലേക്ക് പകർന്നുനൽകുന്നതിനൊപ്പം, പ്രവാസി മലയാളികൾക്കിടയിലെ സൗഹൃദവും കൂട്ടായ്മയും ഊട്ടിയുറപ്പിക്കുന്ന വേദിയായി എൻ.ബി.കെ.എസ് ഓണം 2026 മാറി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI
Every Saturday | 4:30 PM | Kairali News
