സമകാലിക കവിത – രാജൻ കിണറ്റിങ്കര ::::::
ഒരു ചെക്ക് എഴുതി
ടോക്കൺ എടുത്ത്
കൗണ്ടറിലേക്ക് നോക്കി
ഊഴം കാത്തിരിക്കുന്ന
സുഖം
എ.ടി.എം ൽ കിട്ടില്ല
ഓണത്തിന്
പുറത്ത് പോയി
ഇരു കൈയിലും
സാധനങ്ങൾ തൂക്കി വരുന്നത്
നോക്കിയിരിക്കുന്ന
സുഖം
ഓൺലൈൻ
ഷോപ്പിങ്ങിന് കിട്ടില്ല
പെണ്ണ് കാണാൻ പോയി
അഭിപ്രായമറിയാൻ
അച്ഛനും അമ്മാമനും
തിരിച്ചു വരുന്നതും കാത്ത്
ഉമ്മറപ്പടിയിലെ
കാത്തിരിപ്പിൻ്റെ സുഖം
ഫോൺ വിളിയിൽ കിട്ടില്ല
നാട് വിട്ട മക്കളുടെ
വിവരങ്ങളറിയാൻ
പോസ്റ്റ് മാൻ
കത്തുമായി പടികടന്ന്
വരുന്നതും
നോക്കിയിരിക്കുമ്പോൾ
കിട്ടിയ സുഖം
ഒരു വാട്സ്ആപ്പ്
മെസേജിലും കിട്ടില്ല
സ്കൂളിലെ
രണ്ടാം ബെല്ലടിക്കുമ്പോൾ
ഓടിക്കിതച്ച്
ബാക് ബെഞ്ചിൽ
ചെന്നിരുന്ന സുഖം
എ.സി കാറിൽ
സ്‌കൂൾ പടിക്കൽ
ചെന്നിറങ്ങിയാൽ കിട്ടില്ല
മഴക്കാലത്ത്
നിറഞ്ഞു കവിയുന്ന
കിണറിൽ നിന്ന്
കൈ കൊണ്ട് മുക്കി
ദാഹം മാറ്റിയ സുഖം
ഫിൽട്ടറിന് കീഴെ
ഗ്ലാസ് കാട്ടിയാൽ കിട്ടില്ല
കരിയില കൂട്ടി കത്തിച്ച്
അതിലിട്ട്
കശുവണ്ടി ചുട്ടുതിന്ന
സുഖം
പ്ലാസ്റ്റിക് കവറിലെ
സീൽ ചെയ്ന
അണ്ടിപ്പരിപ്പിന് കിട്ടില്ല.
രാജൻ കിണറ്റിങ്കര
