മീരാ റോഡ്: കേരളപ്പിറവി ദിനമായ നവംബർ 1ന് മലയാള ഭാഷയുടെയും സംസ്കാരത്തിന്റെയും വൈവിധ്യമാർന്ന ആഘോഷവുമായി മലയാള ഭാഷാ പ്രചാരണ സംഘം, മീരാ ഭയന്ദർ മേഖല കമ്മിറ്റി “കേരളീയം 2026” സംഘടിപ്പിക്കുന്നു.

മീരാ റോഡ് ഗാനസാമ്രാഗ്ന്യ ലതാ മങ്കേഷ്‌കർ ഹാളിൽ രാവിലെ 10.30 മുതൽ ഉച്ചയ്ക്ക് 3 മണി വരെ നടക്കുന്ന പരിപാടിയിൽ സംഗീതം, നൃത്തം, കളരിപ്പയറ്റ് എന്നിവ അരങ്ങേറും.

ഐഡിയ സ്റ്റാർ സിങ്ങറിലൂടെ ശ്രദ്ധേയനായ ദിൽരാജ് ഗോപിയുടെ നേതൃത്വത്തിലുള്ള മ്യൂസിക്കൽ ബാൻഡിന്റെ സംഗീതാവതരണമാണ് പ്രധാന ആകർഷണങ്ങളിലൊന്ന്. ഇതോടൊപ്പം സിനിമാറ്റിക് ഡാൻസും കുഞ്ഞിമൂസ ഗുരുക്കളുടെ നേതൃത്വത്തിലുള്ള വില്ല്യാപ്പിള്ളി കളരി സംഘത്തിന്റെ കളരിപ്പയറ്റ് പ്രദർശനവും നടക്കും.

പരിപാടിയുടെ വിജയകരമായ നടത്തിപ്പിനായി സജി ഐ.പി. രക്ഷാധികാരിയും, പ്രവീൺ നായർ ചെയർമാനും, കുഞ്ഞികൃഷ്ണൻ കെ.വി. ജനറൽ കൺവീനറുമായി 51 അംഗ സ്വാഗതസംഘം രൂപീകരിച്ചു.

കേരളപ്പിറവി ദിനത്തിൽ മലയാള ഭാഷയുടെയും കേരളീയ സംസ്കാരത്തിന്റെയും പൈതൃകം പുതുതലമുറയിലേക്ക് പകരുക എന്ന ലക്ഷ്യത്തോടെയാണ് പരിപാടി സംഘടിപ്പിക്കുന്നത്.

പ്രവേശനം പ്രവേശന കൂപ്പൺ മുഖേന നിയന്ത്രിക്കും.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI | Every Saturday | 4:30 PM | Kairali News