വിശാഖപട്ടണം | ആഗസ്റ്റ് 24, 2025 – വേൾഡ് മലയാളി കൗൺസിൽ (ഡബ്ല്യു.എം.സി.) ആന്ധ്രാപ്രദേശ് പ്രൊവിൻസ് വാർഷിക കുടുംബസംഗമവും വനിതാ ഫോറത്തിന്റെ ഉദ്ഘാടനവും എൻ.എസ്.ടി.എൽ. സദ്ഭാവന ഹാളിൽ സംഘടിപ്പിച്ചു. എൻ.എസ്.ടി.എൽ. ഡയറക്ടർ ഡോ. എബ്രഹാം വർഗീസ് ചടങ്ങിൽ മുഖ്യാതിഥിയായിരുന്നു.
കഴിഞ്ഞ വർഷം രൂപം കൊണ്ട എ.പി. പ്രൊവിൻസ്, വളരെ കുറഞ്ഞ സമയത്തിനുള്ളിൽ തന്നെ ഇന്ത്യ റീജിയനിൽ ശ്രദ്ധേയമായ സാന്നിധ്യമായി മാറിയതായി ഡബ്ല്യു.എം.സി. ഗ്ലോബൽ വൈസ് ചെയർമാൻ ദിനേഷ് നായർ പറഞ്ഞു.
വനിതാ ഫോറം ഇന്ത്യ റീജിയൻ പ്രസിഡന്റായ ഗീതാ രമേഷ് വിശിഷ്ടാതിഥിയായിരുന്നു. ആന്ധ്ര മെഡിക്കൽ കോളേജിലെ അസോസിയേറ്റ് പ്രൊഫസർ ഡോ. രാമ നായർ സർക്കാർ, ഇന്ത്യൻ മാരിടൈം യൂണിവേഴ്സിറ്റിയിലെ അസോസിയേറ്റ് പ്രൊഫസർ ഡോ. റിഫത് ജനാർദനൻ, ഡി.എസ്.എൻ. ലോ യൂണിവേഴ്സിറ്റിയിലെ അസിസ്റ്റന്റ് പ്രൊഫസർ ഡോ. റിഫത് ഖാൻ എന്നിവർ പ്രത്യേക ക്ഷണിതാക്കളായിരുന്നു.
സംസ്കാരിക പരിപാടികളുടെ ഭാഗമായി അവതരിപ്പിച്ച ഭാരതനാട്യം, കുച്ചിപ്പുടി, മോഹിനിയാട്ടം, കൂടാതെ ജനപ്രിയ ഗാനങ്ങളും ചടങ്ങിന് മിഴിവേകി. പ്രായ ലിംഗ ഭേദമന്യേ സംഘടിപ്പിച്ച ഫാഷൻ ഷോയും ശ്രദ്ധേയമായി.
2024–25 വർഷത്തിൽ ആന്ധ്രാപ്രദേശ് സംസ്ഥാനത്ത് നടത്തിയ സേവന പ്രവർത്തനങ്ങൾ പരിഗണിച്ച് ഡബ്ല്യു.എം.സി. എ.പി. പ്രൊവിൻസ് സെക്രട്ടറി ഡോ. പി.കെ. ജോസിന് പ്രത്യേക പുരസ്കാരം നൽകി ആദരിച്ചു. ചാരിറ്റി പ്രവർത്തനങ്ങളുടെ ഭാഗമായി 4 വീൽചെയറുകളും ചടങ്ങിൽ വിതരണം ചെയ്തു.
