മുംബൈയിലെ പവായ് ആസ്ഥാനമായ ഹിരാനന്ദാനി കേരളൈറ്റ്സ് അസോസിയേഷന്റെ ആഭിമുഖ്യത്തിൽ ഓണാഘോഷം നടന്നു. തിരക്കിട്ട ജീവിതം നയിക്കുന്ന ഇവർക്കെല്ലാം ഒത്തു കൂടാനും സൗഹൃദം പങ്കിടാനുമുള്ള അവസരം കൂടിയാണ് ഓണാഘോഷ വേദി. സ്നേഹവും സാഹോദര്യവും പ്രസരിപ്പിക്കുന്ന കേരള സംസ്കാരത്തിന്റെ മഹോത്സവത്തെ അന്വർഥമാക്കുകയായിരുന്നു അസോസിയേഷൻ അംഗങ്ങളും സുഹൃത്തുക്കളും.
മാസങ്ങൾ നീണ്ട തയ്യാറെടുപ്പുകളിൽ പൂക്കളം മുതൽ കലാപരിപാടികൾ തുടങ്ങി ഓണസദ്യയിൽ വരെ അംഗങ്ങളുടെ കൈയ്യൊപ്പുണ്ട്.
മാവേലി വരവേൽപ്പും വാദ്യഘോഷങ്ങളുമായി വിപുലമായി ഓണാഘോഷങ്ങൾക്ക് പവായ് അയ്യപ്പ വിഷ്ണു ക്ഷേത്രം വേദിയായി. സംഘടനയിലെ വനിതകളും യുവാക്കളും ചേർന്നാണ് കലാപരിപാടികൾ അവതരിപ്പിച്ചത്. തുടർന്ന് രാഗലയ അവതരിപ്പിച്ച സംഗീത പരിപാടിയും അരങ്ങേറി. മികച്ച വിജയം നേടി പാസ്സായ HKA കുടുംബത്തിലെ വിദ്യാർത്ഥികൾക്ക് ക്യാഷ് പ്രൈസും സർട്ടിഫിക്കറ്റും നൽകി അനുമോദിച്ചു.
