നെരൂൾ: മുംബൈ സെന്റ് തോമസ് യാക്കോബായ സുറിയാനി കോൺഗ്രിഗേഷന്റെ കീഴിലുള്ള നെരൂൾ സെന്റ് തോമസ് യാക്കോബായ സുറിയാനി പള്ളിയുടെ പ്രധാന പെരുന്നാളായ മോർ ഇഗ്നാത്തിയോസ് ഏലിയാസ് തൃതീയൻ ബാവായുടെ 94 -)0 മത് ഓർമ്മ പെരുന്നാൾ ഫെബ്രുവരി 21, 22 (ശനി ഞായർ) ദിവസങ്ങളിൽ നടത്തപ്പെടുന്നു. മലബാർ ഭദ്രാസന മെത്രാപ്പോലീത്ത അഭിവന്ദ്യ ഗീവർഗീസ് മോർ സ്തേഫാനോസ് പെരുന്നാൾ ശുശ്രൂഷകൾക്ക് മുഖ്യകാർമികത്വം വഹിക്കും. 15നു ഞായറാഴ്ച വിശുദ്ധ കുർബാനയ്ക്ക് വികാരി ഫാ. ബേസിൽ റോയി ഏറാടികുന്നേൽ കൊടി ഉയർത്തി ആരംഭം കുറിച്ച പെരുന്നാളിൽ 21 നു രാവിലെ 8 നു മുംബൈ ഭദ്രാസന അഡ്മിനിസ്ട്രേറ്റർ ഫാ. മാത്യൂസ് ചാലപ്പുറം വിശുദ്ധ കുർബാന അർപ്പിക്കും.
വിശുദ്ധ കുർബാനയ്ക്ക് ശേഷം നിർധനരായവർക്ക് അന്നദാനം, വസ്ത്രദാനം എന്നിവ അഭിവന്ദ്യ മെത്രാപ്പോലീത്ത നിർവഹിക്കും.
ബൈക്കുള ദൈവാലയത്തിൽ നിന്നും പരിശുദ്ധ ബാവായുടെ തിരുശേഷിപ്പ് സ്ഥാപിച്ചിരിക്കുന്ന നെരൂൾ ദൈവാലയത്തിലേക്കുള്ള കാൽനട തീർത്ഥയാത്ര ശനിയാഴ്ച രാവിലെ 6.30ന് ആരംഭിക്കും. മുംബൈയിലെ വിവിധ പള്ളികളിൽ നിന്നും വരുന്ന തീർത്ഥാടകർക്ക് ജൂയിനഗർ റെയിൽവേ സ്റ്റേഷന് മുമ്പിൽ അഭിവന്ദ്യ ഗീവർഗീസ് മോർ സ്തേഫാനോസ് മെത്രാപ്പോലീത്താ സ്വീകരണം നൽകുന്നതും തുടർന്ന് ദൈവാലയത്തിൽ എത്തിച്ചേർന്ന് 6 നു സന്ധ്യ പ്രാർത്ഥനയും തുടർന്ന് അഭിവന്ദ്യ മെത്രാപ്പൊലീത്ത പെരുന്നാൾ സന്ദേശവും നൽകുന്നതാണ്.
22 നു രാവിലെ 8 നു പ്രഭാത പ്രാർത്ഥനയും 9നു അഭിവന്ദ്യ ഗീവർഗീസ് മോർ സ്തേഫാനോസ് മെത്രാപ്പോലീത്തയുടെ പ്രധാന കാർമികത്വത്തിൽ വിശുദ്ധ മൂന്നിന്മേൽ കുർബാനയും നടത്തപ്പെടുന്നതാണ്. തുടർന്ന് പെരുന്നാൾ സന്ദേശത്തിനു ശേഷം 60 വയസ്സിന് മുകളിൽ പ്രായമുള്ളവരെയും വിവാഹ ജീവിതത്തിൽ 25, 50 വർഷം പിന്നിട്ടവരെ ആദരിക്കുകയും, പള്ളിയുടെ സൺഡേ സ്കൂൾ കുട്ടികളുടെ സമ്മാനദാനം നടത്തപ്പെടുകയും ചെയ്യും. തുടർന്ന് പെരുന്നാൾ പ്രദക്ഷിണത്തിനും ആശീർവാദത്തിനും ശേഷം നേർച്ച സദ്യയും ഉണ്ടായിരിക്കും.
16 മുതൽ എല്ലാ ദിവസവും വൈകുന്നേരം 7 ന് സന്ധ്യ പ്രാർത്ഥയും 19നു വ്യാഴാഴ്ച ഫാ. ലാൽ തോമസ് മണ്ണിൽ, 20 നു വെള്ളിയാഴ്ച ഫാ. ജാക്സൺ ജേക്കബ് എന്നിവർ വചന സന്ദേശം നൽകുന്നതുമാണ്. ഈ വർഷത്തെ പെരുന്നാളിന്റെ നടത്തിപ്പിനായി ജനറൽ കൺവീനർ വർഗീസ് തോമസ്, ഫിനാൻസ് കൺവീനർ ജുബിൻ ജോസഫ്, കൺവീനർമാരായി ബിനു ഏലിയാസ്, ജീബാ സജി, ബിജി ജയമോൻ എന്നിവരെ തിരഞ്ഞെടുത്തു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
