പ്രശസ്ത സംഗീതസംവിധായകനും ഗായകനുമായ ശരത് നവിമുംബൈയിലെ സംഗീതപ്രേമികൾക്ക് മുന്നിൽ പാടുന്നു. കലാരംഗത്ത് ശ്രദ്ധേയ സാന്നിധ്യമായ ‘തരംഗ് ഇവന്റ്സ് & പ്രൊഡക്ഷൻസ്’ ഒരുക്കുന്ന രണ്ടാമത്തെ സംഗീതനിശയിലാണ് ശരത് മുഖ്യാതിഥിയായെത്തുന്നത്. സ്വാതന്ത്ര്യദിനമായ ഓഗസ്റ്റ് 15-ന് നെരൂൾ ടെർണ ഓഡിറ്റോറിയത്തിൽ (Terna Auditorium, Nerul) വൈകിട്ട് 6.30 മുതലാണ് നവിമുംബൈയെ സംഗീതലഹരിയിലാഴ്ത്തുന്ന ‘Sharrath Symphony Night’ അരങ്ങേറുന്നത്.

1990-ൽ ‘ക്ഷണക്കത്ത്’ എന്ന ചലചിത്രത്തിലൂടെ മലയാള സിനിമാലോകത്തേക്ക് കടന്നുവന്ന ശരത്, എണ്ണത്തിൽ കുറവാണെങ്കിലും മലയാളി നെഞ്ചിലേറ്റിയ നിരവധി അനശ്വര ഗാനങ്ങളുടെ സ്രഷ്ടാവാണ്. ‘ശ്രീരാഗമോ…’ എന്ന് തുടങ്ങുന്ന ഗാനം മൂളിനടക്കാത്ത സംഗീതപ്രേമികൾ വിരളമായിരിക്കും.

ജനപ്രിയ ടെലിവിഷൻ റിയാലിറ്റി ഷോകളിലൂടെ മലയാളികളുടെ കുടുംബത്തിലെ ഒരംഗത്തെപ്പോലെ പ്രിയങ്കരനായി മാറിയ കലാകാരൻ കൂടിയാണ് അദ്ദേഹം.

ഈ സംഗീതവിരുന്നിന്റെ മറ്റൊരു പ്രധാന ആകർഷണം, നമ്മെ വിട്ടുപിരിഞ്ഞ പ്രിയ വയലിൻ മാന്ത്രികൻ ബാലഭാസ്കറിന്റെ ഫ്യൂഷൻ ടീമായ ‘ബിഗ് ബാൻഡ്’ (Big Band) ശരത്തിനൊപ്പം വേദി പങ്കിടുന്നു എന്നതാണ്. ശുദ്ധസംഗീതവും ഫ്യൂഷനും സമന്വയിക്കുന്ന ഈ സായാഹ്നം മുംബൈയിലെ സംഗീതസ്വാദകർക്ക് തികച്ചും വേറിട്ടൊരു അനുഭവമായിരിക്കും സമ്മാനിക്കുക.

യാന്ത്രികമായ മുംബൈ ജീവിതത്തിനിടയിൽ പ്രവാസികൾക്ക് കുറച്ചു മണിക്കൂറുകളെങ്കിലും ശുദ്ധസംഗീതം ആസ്വദിക്കാനും, മനസ്സൊന്ന് റീചാർജ് ചെയ്യാനുമുള്ള അവസരമൊരുക്കുകയാണ് തരംഗ് സംഘാടകർ ഇതിലൂടെ ലക്ഷ്യമിടുന്നത്.

കഴിഞ്ഞ ജനുവരിയിൽ പ്രശസ്ത ഗാനരചയിതാവും സംവിധായകനുമായ ശ്രീകുമാരൻ തമ്പിയാണ് തരംഗിന്റെ പ്രവർത്തനങ്ങൾക്ക് തിരികൊളുത്തിയത്. കേരളത്തിലെ പ്രിയപ്പെട്ട കലാകാരന്മാരെ മുംബൈയിലെ കലാലോകത്തിന് മുന്നിൽ എത്തിക്കുക, അവരെ നേരിൽ കാണാനും സംവദിക്കാനുമുള്ള വേദിയൊരുക്കുക എന്നതാണ് തരംഗിന്റെ പ്രധാന ലക്ഷ്യം.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS