നവി മുംബൈയിലെ മലയാളി സംഗീതാസ്വാദകർക്ക് മറക്കാനാകാത്ത സംഗീത-ഹാസ്യ വിരുന്നൊരുക്കി കേരള സമാജം ഉൾവെ നോഡ് സംഘടിപ്പിച്ച “സ്ട്രിങ് ബീറ്റ്സ് 2026”. വയലിൻ നാദവും ആധുനിക സംഗീതത്തിന്റെ താളവും ഹാസ്യത്തിന്റെ പൊട്ടിച്ചിരികളും ഒത്തുചേർന്ന പരിപാടി ഭൂമിപുത്ര ഭവനിൽ നിറഞ്ഞ സദസ്സിന്റെ കൈയടിയോടെയാണ് അരങ്ങേറിയത്.

കേരള സമാജം ഉൾവെ നോഡിന്റെ ആഭിമുഖ്യത്തിൽ സംഘടിപ്പിച്ച “സ്ട്രിങ് ബീറ്റ്സ് 2026” സംഗീതസന്ധ്യ നവി മുംബൈയിലെ കലാസ്വാദകർക്ക് വേറിട്ട അനുഭവമായി.

പ്രശസ്ത വയലിനിസ്റ്റും പിന്നണി ഗായികയുമായ രൂപ രേവതിയും ജനപ്രിയ ഗായകൻ സലീൽ സലിമും ചേർന്ന് അവതരിപ്പിച്ച ഫ്യൂഷൻ സംഗീത പരിപാടി പ്രേക്ഷകരെ സംഗീതത്തിന്റെ പുതിയ ലോകത്തേക്ക് കൈപിടിച്ചു നടത്തി.

വയലിനിൽ ഇന്ദ്രജാലം സൃഷ്ടിക്കുകയായിരുന്നു രൂപ രേവതി. ആരാധകർ ആവശ്യപ്പെട്ട പാട്ടുകൾക്ക് ലൈവായി വയലിൻ വായിച്ചും രൂപ ആസ്വാദകരെ വിസ്മയിപ്പിച്ചു

മലയാളി മനസുകളിൽ പാടി പതിഞ്ഞ പാട്ടുകളുടെ ഈണങ്ങൾക്ക് വയലിൻ തന്ത്രികളിൽ മാന്ത്രിക സ്​പർശവുമായി രൂപ രേവതി കൈയ്യടി നേടി

ജിയോ ജേക്കബ്, ജോബി പയസ്, കൃഷ്ണപ്രസാദ്, സുമേഷ് ആനന്ദ്, യാസിർ അഷറഫ്, നിജിത് എന്നിവരടങ്ങിയ വാദ്യകലാകാരന്മാരുടെ സംഘവും സംഗീതവിരുന്നിന് മികവേകി. ക്ലാസിക്കൽ സംഗീതത്തിന്റെ ചാരുതയും വെസ്റ്റേൺ സംഗീതത്തിന്റെ ഊർജവും സമന്വയിപ്പിച്ച അവതരണങ്ങൾ കാണികളുടെ ഹൃദയം കീഴടക്കി.

സംഗീതത്തിനൊപ്പം ഹാസ്യത്തിന്റെ നിറവും പകർന്നത് മിമിക്രി കലാകാരൻ മഹേഷ് കുഞ്ഞുമോനാണ്.

രാഷ്ട്രീയ-സിനിമാ രംഗങ്ങളിലെ പ്രമുഖരുടെ ശബ്ദങ്ങളും ശൈലികളും അനുകരിച്ച പ്രകടനങ്ങൾ സദസ്സിൽ പൊട്ടിച്ചിരി ഉയർത്തി. പുതിയ മുഖ്യമന്ത്രി വി ഡി സതീശന്റെ ശബ്ദവും മാനറിസങ്ങളും ആദ്യമായി പരീക്ഷിച്ചതും ഈ വേദിയിലാണ്.

താരങ്ങളെ അനുകരിക്കുന്നതിനോടൊപ്പം കാണികളെ ട്രോളിയും മഹേഷ് സദസ്സിനെ പൊട്ടിചിരിപ്പിച്ചു.

തന്റെ തുറുപ്പിചീട്ടായ സ്പോട്ട് ഡബ്ബിങിലും മഹേഷ് പതിവ് പോലെ തിളങ്ങി.

സംഗീതവും ഹാസ്യവും ഒരുമിച്ചെത്തിയ “സ്ട്രിങ് ബീറ്റ്സ് 2026” നവി മുംബൈയിലെ മലയാളി സമൂഹത്തിന് ഓർമകളിൽ നിറഞ്ഞുനിൽക്കുന്ന മറ്റൊരു സാംസ്കാരിക സായാഹ്നമായി മാറി. Watch highlights of the event in Amchi Mumbai on Saturday 4.30 p.m. in Kairali News

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS