മുംബൈ:
മുംബൈ നഗരത്തിന്റെ ജീവനാഡിയായി കണക്കാക്കുന്ന ലോക്കൽ ട്രെയിൻ യാത്രക്കാരെ ഞെട്ടിച്ച്, മലാഡ് റെയിൽവേ സ്റ്റേഷനിൽ കോളേജ് പ്രൊഫസർ കുത്തേറ്റു മരിച്ചു. സംഭവവുമായി ബന്ധപ്പെട്ട് 27 കാരനായ ഓംകാർ ഷിൻഡെയെ ഗവൺമെന്റ് റെയിൽവേ പോലീസ് (ജിആർപി) അറസ്റ്റ് ചെയ്തു.
വിലെ പാർലെയിലെ ഒരു പ്രമുഖ കോളേജിലെ പ്രൊഫസറായ അലോക് സിംഗ് ആണ് കൊല്ലപ്പെട്ടത്. ശനിയാഴ്ച വൈകിട്ട് പ്ലാറ്റ്ഫോമിലാണ് ആക്രമണം നടന്നത്.
ട്രെയിനിലെ തർക്കം കൊലപാതകത്തിൽ കലാശിക്കുകയായിരുന്നു.
പോലീസ് നൽകുന്ന വിവരങ്ങൾ പ്രകാരം, സിംഗും പ്രതിയായ ഷിൻഡെയും ഒരേ ലോക്കൽ ട്രെയിനിലാണ് യാത്ര ചെയ്തിരുന്നത്. മലാഡ് സ്റ്റേഷനിലെത്തിയപ്പോൾ, തിരക്കേറിയ കമ്പാർട്ട്മെന്റിൽ ട്രെയിനിൽ നിന്ന് ഇറങ്ങുന്നതിനെച്ചൊല്ലി ഇരുവരും തമ്മിൽ വാക്കുതർക്കമുണ്ടായി.
ട്രെയിൻ പ്ലാറ്റ്ഫോമിലെത്തിയതിന് പിന്നാലെ തർക്കം രൂക്ഷമായി. ഇതിനിടയിൽ ഷിൻഡെ മൂർച്ചയുള്ള ആയുധം ഉപയോഗിച്ച് സിംഗിന്റെ വയറ്റിൽ ഒന്നിലധികം തവണ കുത്തിയതായാണ് പോലീസ് പറയുന്നത്. ഗുരുതരമായി പരിക്കേറ്റ സിംഗ് സംഭവസ്ഥലത്ത് തന്നെ കുഴഞ്ഞുവീണു.
സിസിടിവി ദൃശ്യങ്ങളിലൂടെയാണ് അന്വേഷണത്തിനൊടുവിൽ പ്രതിയെ കണ്ടെത്തിയത്.
ആക്രമണത്തിന് പിന്നാലെ പ്രതി സ്റ്റേഷനിലെ തിരക്കിനുള്ളിൽ നിന്ന് രക്ഷപ്പെടുകയായിരുന്നു. സംഭവസ്ഥലത്തെ സിസിടിവി ദൃശ്യങ്ങൾ പരിശോധിച്ച ബോറിവാലി ജിആർപി, വെള്ള ഷർട്ടും നീല ജീൻസും ധരിച്ച ഒരാൾ ഫുട് ഓവർ ബ്രിഡ്ജിലൂടെ ഓടിപ്പോകുന്നതായി കണ്ടെത്തി.
ഈ ദൃശ്യങ്ങളുടെയും സാങ്കേതിക അന്വേഷണത്തിന്റെയും അടിസ്ഥാനത്തിലാണ് പ്രതിയെ തിരിച്ചറിഞ്ഞത്. പിന്നീട് വസായിൽ നടത്തിയ അന്വേഷണത്തിലാണ് ഓംകാർ ഷിൻഡെയെ അറസ്റ്റ് ചെയ്തത്.
കൂടുതൽ അന്വേഷണം തുടരുന്നു
ട്രെയിനിൽ നിന്ന് ഇറങ്ങുന്നതിനെച്ചൊല്ലിയുള്ള തർക്കമാണ് ഉടനടി പ്രകോപിതനാകാൻ കാരണമെന്നാണെങ്കിലും, ആക്രമണത്തിന്റെ ക്രൂരത കൂടുതൽ ആഴത്തിലുള്ള പ്രശ്നങ്ങൾ സൂചിപ്പിക്കുന്നതായി മുതിർന്ന പോലീസ് ഉദ്യോഗസ്ഥർ പറഞ്ഞു.
“വാക്കുതർക്കമാണ് കാരണമെന്ന സൂചനയുണ്ടെങ്കിലും, മുൻ വൈരാഗ്യമോ മറ്റ് ഘടകങ്ങളോ ഉണ്ടായിരുന്നോയെന്ന് അന്വേഷിച്ചുവരികയാണ്.” ഒരു ഉദ്യോഗസ്ഥൻ പറഞ്ഞു.
ചെറിയൊരു തർക്കത്തിന്റെ പേരിൽ അപരിചിതനായ ഒരാളെ ഒന്നിലധികം തവണ കുത്തിക്കൊല്ലുന്ന ആക്രമണത്തിന്റെ ക്രൂരത കൂടുതൽ ആഴത്തിലുള്ള പ്രശ്നങ്ങൾ സൂചിപ്പിക്കുന്നുവെന്നാണ് മുതിർന്ന ഉദ്യോഗസ്ഥർ അഭിപ്രായപ്പെടുന്നത്.
അലോക് സിംഗിന്റെ മൃതദേഹം പോസ്റ്റ്മോർട്ടം പരിശോധനയ്ക്കായി അയച്ചിരിക്കുകയാണ്. കേസിൽ കൂടുതൽ അന്വേഷണം തുടരുകയാണ് ജിആർപി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
