താനെ:
മുത്തപ്പൻ സമിതി താനെയുടെ തിരുവപ്പന മഹോത്സവം ഫെബ്രുവരി 7, 8 തീയതികളിലായി ഭക്തിസാന്ദ്രമായി നടത്തപ്പെടുന്നു.
ഇന്ന് രാവിലെ 5 മണിക്ക് ഗണപതി ഹോമത്തോടെയാണ് മഹോത്സവത്തിന് തുടക്കമായത്. തുടർന്ന് വിവിധ പൂജാകർമങ്ങളും ആചാരാനുഷ്ഠാനങ്ങളും നടന്നു. കേരളീയ ഭക്തിപാരമ്പര്യത്തിന്റെ ഭാഗമായ പയംകുറ്റി വെള്ളാട്ടം, തിരുവപ്പന തുടങ്ങിയ വഴിപാടുകൾ മഹോത്സവത്തിന്റെ പ്രധാന ആകർഷണങ്ങളാണ്.
പയംകുറ്റി വെള്ളാട്ടം, തിരുവപ്പന എന്നിവയ്ക്കുള്ള വഴിപാട് രശീതുകൾ അന്നേ ദിവസം കൗണ്ടറിൽ നിന്നും നേരിട്ട് ലഭ്യമാകുമെന്ന് സമിതി ഭാരവാഹികൾ അറിയിച്ചു. ഭക്തർക്ക് സൗകര്യപ്രദമായി വഴിപാടുകളിൽ പങ്കുചേരാൻ ആവശ്യമായ ക്രമീകരണങ്ങൾ ഒരുക്കിയിട്ടുണ്ടെന്നും അറിയിച്ചു.
താനെ വെസ്റ്റ് വാഗ്ലെ എസ്റ്റേറ്റ്, ശാന്തി നഗർ മുനിസിപ്പൽ സ്കൂൾ ഗ്രൗണ്ടിലാണ് മഹോത്സവ വേദി ഒരുക്കിയിരിക്കുന്നത്. രണ്ട് ദിവസങ്ങളിലായി നടക്കുന്ന ചടങ്ങുകൾ നൂറുകണക്കിന് ഭക്തർക്ക് സായൂജ്യമേകും.
വർഷങ്ങളായി മുംബൈയിലെ മലയാളി സമൂഹത്തിന്റെ ആത്മീയവും സാംസ്കാരികവുമായ ആവശ്യങ്ങൾക്ക് നേതൃത്വം നൽകിവരുന്ന ശ്രീ മുത്തപ്പൻ സമിതി താനെ, പ്രവാസി ജീവിതത്തിന്റെ തിരക്കുകൾക്കിടയിലും കേരളീയ ആചാരങ്ങളും വിശ്വാസങ്ങളും നിലനിർത്തുന്നതിൽ നിർണായക പങ്ക് വഹിക്കുന്നു. മുത്തപ്പൻ ദൈവാരാധനയുടെ ലാളിത്യവും മനുഷ്യസ്നേഹ സന്ദേശവും പുതുതലമുറയിലേക്ക് കൈമാറുന്നതിൽ ഈ മഹോത്സവം പ്രത്യേക പ്രസക്തിയാർജ്ജിക്കുന്നു.
ഭക്തിയും ഐക്യവും സാമൂഹികസൗഹൃദവും ചേർന്ന ഈ തിരുവപ്പന മഹോത്സവം, താനെയിലെയും പരിസരപ്രദേശങ്ങളിലെയും മലയാളികൾക്ക് ഒരുപോലെ ആത്മീയാനുഭവമായി മാറുമെന്ന് സംഘാടകർ അറിയിച്ചു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
