മൊബൈൽ ഫോണിന്റെ സുരക്ഷയെക്കുറിച്ച് വീണ്ടും ആശങ്ക ഉയർത്തുന്ന സംഭവം. അധ്യാപികയുടെ ഫോൺ ഹാക്ക് ചെയ്ത് AI ഉപയോഗിച്ച് അശ്ലീല ഉള്ളടക്കം സൃഷ്ടിച്ച് ബ്ലാക്ക്മെയിൽ ചെയ്ത സംഭവം തുറന്നിടുന്നത് മഹാരാഷ്ട്രയിൽ പിടിമുറുക്കുന്ന പുതിയ സൈബർ ഭീഷണി
മൊബൈൽ ഫോണിന്റെ സുരക്ഷയെക്കുറിച്ച് വീണ്ടും ആശങ്ക ഉയർത്തുന്ന സംഭവം. അധ്യാപികയുടെ ഫോൺ ഹാക്ക് ചെയ്ത് AI ഉപയോഗിച്ച് അശ്ലീല ഉള്ളടക്കം സൃഷ്ടിച്ച് ബ്ലാക്ക്മെയിൽ ചെയ്ത കേസ് മഹാരാഷ്ട്രയിൽ.
മഹാരാഷ്ട്രയിലെ ബുൽദാന ജില്ലയിൽ നടന്ന ഞെട്ടിക്കുന്ന സൈബർ കുറ്റകൃത്യം സമൂഹത്തിന് ഗുരുതര മുന്നറിയിപ്പായി മാറുകയാണ്. ഒരു വനിതാ അധ്യാപികയുടെ മൊബൈൽ ഫോൺ ഹാക്ക് ചെയ്ത് സ്വകാര്യ വിവരങ്ങളും ചിത്രങ്ങളും മോഷ്ടിച്ച ശേഷം, അവ ഉപയോഗിച്ച് അശ്ലീല ഉള്ളടക്കം നിർമ്മിച്ച് ബ്ലാക്ക്മെയിൽ ചെയ്ത സംഭവമാണ് പുറത്തുവന്നത്.
27 വയസ്സുള്ള ഹൃഷികേശ് ഗിരി എന്ന യുവാവാണ് കേസിലെ പ്രതി. അധ്യാപികയുടെ മൊബൈൽ ഫോൺ നിയമവിരുദ്ധമായി ഹാക്ക് ചെയ്ത ഇയാൾ, അതിൽ സൂക്ഷിച്ചിരുന്ന സ്വകാര്യ ചിത്രങ്ങൾ, വീഡിയോകൾ, വാട്ട്സ്ആപ്പ് ചാറ്റുകൾ, ഇ-മെയിലുകൾ തുടങ്ങിയവ കൈവശപ്പെടുത്തി. പിന്നീട് ഈ വിവരങ്ങൾ ഉപയോഗിച്ച് AI സാങ്കേതിക വിദ്യയുടെ സഹായത്തോടെ അശ്ലീല വീഡിയോ നിർമ്മിച്ചതായാണ് പോലീസ് വ്യക്തമാക്കുന്നത്.
തുടർന്ന് ഇയാൾ അധ്യാപികയെ ബന്ധപ്പെടുകയും ബ്ലാക്ക്മെയിൽ ആരംഭിക്കുകയും ചെയ്തു.
“നിന്റെ ഫോട്ടോകളും വീഡിയോകളും ഞാൻ ഭർത്താവിനും ബന്ധുക്കൾക്കും അയച്ച് നിന്റെ ജീവിതം നശിപ്പിക്കും,” എന്നായിരുന്നു പ്രതിയുടെ ഭീഷണി.
ഭീഷണിയിൽ ഭയന്ന അധ്യാപികയെ പ്രതി പലതവണ വീഡിയോ കോളിൽ വിളിച്ചു. ആ സമയത്ത് വസ്ത്രം അഴിക്കാൻ നിർബന്ധിക്കുകയും അതിന്റെ വീഡിയോ റെക്കോർഡ് ചെയ്യുകയും ചെയ്തു. പിന്നീട് വീഡിയോകൾ അധ്യാപികയുടെ സഹോദരിക്ക് അയച്ചതായും പരാതിയിൽ പറയുന്നു.
ഇതോടെ കാര്യങ്ങൾ കൂടുതൽ ഗുരുതരമായി. പിന്നീട് ഇയാൾ അധ്യാപികയോട് നേരിട്ട് ലൈംഗിക ബന്ധത്തിൽ ഏർപ്പെടണമെന്നും ആവശ്യപ്പെട്ടു.
“എന്റെ ആവശ്യങ്ങൾ അംഗീകരിച്ചില്ലെങ്കിൽ നിന്നെയും നിന്റെ കുട്ടിയെയും കൊല്ലും,” എന്ന് ഇയാൾ ഭീഷണിപ്പെടുത്തിയതായാണ് അധ്യാപികയുടെ മൊഴി.
മാനസികമായി തകർന്ന അധ്യാപിക ഒടുവിൽ സോണാല പോലീസ് സ്റ്റേഷനിൽ പരാതി നൽകി. പരാതിയുടെ അടിസ്ഥാനത്തിൽ പോലീസ് വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു. സംഭവത്തിന് പിന്നാലെ പ്രതിയായ ഹൃഷികേശ് ഗിരി ഒളിവിൽ പോയിരിക്കുകയാണ്. ഇയാളെ കണ്ടെത്താൻ പോലീസ് തിരച്ചിൽ ശക്തമാക്കി.
AI ദുരുപയോഗം: സമൂഹത്തിന് ഗുരുതര മുന്നറിയിപ്പ്
ബുൽദാനയിലെ ഈ സംഭവം സൈബർ കുറ്റകൃത്യങ്ങളുടെ പുതിയ ഭീഷണിയെയാണ് ചൂണ്ടിക്കാണിക്കുന്നത്. മൊബൈൽ ഫോണുകളിൽ സൂക്ഷിക്കുന്ന സ്വകാര്യ വിവരങ്ങൾ ഹാക്കർമാർക്ക് ലഭിച്ചാൽ AI ഉപയോഗിച്ച് വ്യാജ അശ്ലീല ഉള്ളടക്കം നിർമ്മിച്ച് ബ്ലാക്ക്മെയിൽ ചെയ്യുന്നത് വർധിച്ചുവരുന്നതായി സൈബർ വിദഗ്ധർ മുന്നറിയിപ്പ് നൽകുന്നു.
മൊബൈൽ ഫോണിൽ ശക്തമായ പാസ്വേഡും സുരക്ഷാ സംവിധാനങ്ങളും ഉപയോഗിക്കുവാനാണ് പോലീസ് നിർദ്ദേശം. പരിചയമില്ലാത്ത ലിങ്കുകളും ആപ്പുകളും തുറക്കാതിരിക്കുക, സ്വകാര്യ ചിത്രങ്ങളും വിവരങ്ങളും പങ്കിടുന്നതിൽ ശ്രദ്ധ പുലർത്തുക, സംശയകരമായ സന്ദേശങ്ങളോ ഭീഷണികളോ ലഭിച്ചാൽ ഉടൻ പോലീസിനെയോ സൈബർ സെല്ലിനെയോ സമീപിക്കുക തുടങ്ങിയ ജാഗ്രതാ നിർദ്ദേശങ്ങളും പോലീസ് നൽകുന്നു.
സാങ്കേതിക വിദ്യയുടെ വേഗതയേറിയ വളർച്ചയ്ക്കൊപ്പം അതിന്റെ ദുരുപയോഗവും സമൂഹത്തിന് വലിയ വെല്ലുവിളിയായി മാറുകയാണെന്ന മുന്നറിയിപ്പാണ് ഈ സംഭവം.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
