സാങ്കേതികവിദ്യയുടെ അമിത ഉപയോഗം മാനസിക-ബൗദ്ധിക ആരോഗ്യത്തെ ബാധിക്കുമെന്ന് വിദഗ്ധർ; മുംബൈയിൽ ശ്രദ്ധേയമായി ‘മണപ്പുറം ഡയലോഗ്സ്’
മുംബൈ: സ്മാർട്ട്ഫോണുകളുടെയും സോഷ്യൽ മീഡിയയുടെയും അമിത ഉപയോഗം മനുഷ്യരുടെ ഓർമ്മശക്തിയെയും ചിന്താശേഷിയെയും മാനസികാരോഗ്യത്തെയും ബാധിക്കുന്ന സാഹചര്യത്തിൽ, “ഡിജിറ്റൽ ഉപവാസം” കാലഘട്ടത്തിന്റെ അനിവാര്യതയാണെന്ന് എൻ. കെ. പ്രേമചന്ദ്രൻ എം.പി. അഭിപ്രായപ്പെട്ടു. മണപ്പുറം ഫൗണ്ടേഷനും മണപ്പുറം ഫിനാൻസ് ലിമിറ്റഡും സംയുക്തമായി സംഘടിപ്പിച്ച ‘മണപ്പുറം ഡയലോഗ്സ് – മുംബൈ എഡിഷൻ’ പരിപാടിയിലാണ് അദ്ദേഹം ഇക്കാര്യം വ്യക്തമാക്കിയത്.
“ഡിജിറ്റൽ ഡിമെൻഷ്യ: സാങ്കേതികവിദ്യയുടെ മാനസികവും ബൗദ്ധികവുമായ പ്രത്യാഘാതങ്ങൾ” എന്ന വിഷയത്തെ ആസ്പദമാക്കി സംഘടിപ്പിച്ച സംവാദം, ഡിജിറ്റൽ യുഗത്തിൽ മനുഷ്യജീവിതത്തിൽ സംഭവിക്കുന്ന മാറ്റങ്ങളും അതിന്റെ ദീർഘകാല പ്രത്യാഘാതങ്ങളും ചർച്ച ചെയ്യുന്ന വേദിയായി മാറി. സമൂഹം, ആരോഗ്യം, വിദ്യാഭ്യാസം, ബിസിനസ് തുടങ്ങി വിവിധ മേഖലകളിലെ പ്രമുഖർ പരിപാടിയിൽ പങ്കെടുത്തു.
മണപ്പുറം ഫിനാൻസ് ലിമിറ്റഡിന്റെ ചെയർമാനും മാനേജിംഗ് ഡയറക്ടറുമായ വി. പി. നന്ദകുമാർ അധ്യക്ഷത വഹിച്ച ചടങ്ങിൽ എൻ. കെ. പ്രേമചന്ദ്രൻ എം.പി. മുഖ്യാതിഥിയായിരുന്നു. ഡിജിറ്റൽ ഉപകരണങ്ങളുടെ അമിത ഉപയോഗം സമൂഹത്തിൽ സൃഷ്ടിക്കുന്ന മാനസികാരോഗ്യ വെല്ലുവിളികൾ ഗൗരവമായി കാണേണ്ട സമയമാണിതെന്നും, ഈ വിഷയത്തിൽ ആവശ്യമായ നിയമനിർമാണ നടപടികൾക്ക് മുൻകൈ എടുക്കുമെന്നും അദ്ദേഹം വ്യക്തമാക്കി. പാർലിമെന്റിൽ ഈ പ്രശ്നം ഉന്നയിക്കുമെന്നും സർക്കാരിന്റെ ശ്രദ്ധയിൽ കൊണ്ട് വരുമെന്നും പ്രേമചന്ദ്രൻ കൂട്ടിച്ചേർത്തു.
ഡിജിറ്റൽ ആശ്രിതത്വവുമായി ബന്ധപ്പെട്ട പ്രശ്നങ്ങൾ പാർലമെന്റിൽ ഉന്നയിക്കുമെന്നും കേന്ദ്ര സർക്കാരിന്റെ ശ്രദ്ധയിൽപ്പെടുത്തുമെന്നും അദ്ദേഹം പറഞ്ഞു. സാങ്കേതികവിദ്യയുടെ ഗുണഫലങ്ങൾ പ്രയോജനപ്പെടുത്തുന്നതിനൊപ്പം അതിന്റെ ദോഷഫലങ്ങളെക്കുറിച്ചും സമൂഹത്തിൽ അവബോധം വളർത്തേണ്ടത് അനിവാര്യമാണെന്നും അദ്ദേഹം കൂട്ടിച്ചേർത്തു.
വിശിഷ്ടാതിഥിയായ പ്രമുഖ മനഃശാസ്ത്ര വിദഗ്ധൻ ഡോ. ഹരീഷ് ഷെട്ടി ഡിജിറ്റൽ ഫാസ്റ്റിംഗിന്റെ പ്രാധാന്യം വിശദീകരിച്ചു. ദിവസത്തിൽ നിശ്ചിത സമയത്തേക്കെങ്കിലും ഡിജിറ്റൽ ഉപകരണങ്ങളിൽ നിന്ന് വിട്ടുനിൽക്കുന്നത് മാനസികാരോഗ്യത്തിനും കുടുംബബന്ധങ്ങൾക്കും ഗുണകരമാണെന്ന് അദ്ദേഹം പറഞ്ഞു.
മുഖ്യപ്രഭാഷണം നടത്തിയ ഡോ. മനോജ് കുമാർ ശർമ്മ, ബെംഗളൂരു നിംഹാൻസിലെ ക്ലിനിക്കൽ സൈക്കോളജി പ്രൊഫസറും SHUT ക്ലിനിക്കിന്റെ സ്ഥാപകനുമാണ്. ഡിജിറ്റൽ ഉപകരണങ്ങളുടെ അമിത ഉപയോഗം ശ്രദ്ധക്കുറവ്, ഓർമ്മശക്തിയിലെ ക്ഷയം, സാമൂഹിക ഇടപെടലുകളുടെ കുറവ്, ഉറക്കക്കുറവ്, മാനസിക സമ്മർദ്ദം തുടങ്ങിയ പ്രശ്നങ്ങൾക്ക് കാരണമാകുമെന്ന് അദ്ദേഹം ചൂണ്ടിക്കാട്ടി.
“ഡിജിറ്റൽ ഉപകരണങ്ങളെ പൂർണമായി ഒഴിവാക്കുക എന്നതല്ല പരിഹാരം. അവയുടെ ഉപയോഗത്തിൽ ആരോഗ്യകരമായ സന്തുലിതാവസ്ഥ കൈവരിക്കുകയാണ് ഏറ്റവും പ്രധാനപ്പെട്ടത്,” എന്ന് അദ്ദേഹം പറഞ്ഞു.
ആരോഗ്യകരമായ ഡിജിറ്റൽ ജീവിതശൈലി പ്രോത്സാഹിപ്പിക്കുന്നതിനും ഡിജിറ്റൽ യുഗത്തിലെ വെല്ലുവിളികളെക്കുറിച്ച് സമൂഹത്തിൽ അവബോധം സൃഷ്ടിക്കുന്നതിനുമായി രാജ്യത്തിന്റെ വിവിധ ഭാഗങ്ങളിൽ ‘മണപ്പുറം ഡയലോഗ്സ്’ സംഘടിപ്പിച്ചുവരികയാണെന്ന് വി. പി. നന്ദകുമാർ പറഞ്ഞു. ഡിജിറ്റൽ ലോകത്തിന്റെ അനന്തസാധ്യതകൾ പ്രയോജനപ്പെടുത്തുമ്പോഴും അതിന്റെ അപകടസാധ്യതകളെക്കുറിച്ച് സമൂഹം ബോധവാന്മാരാകേണ്ടതുണ്ടെന്നും അദ്ദേഹം അഭിപ്രായപ്പെട്ടു.
സാങ്കേതികവിദ്യയുടെ ഉപയോഗത്തിൽ എങ്ങനെ സന്തുലിതാവസ്ഥ കൈവരിക്കാമെന്ന വിഷയത്തിൽ വിവിധ മേഖലകളിൽ നിന്നുള്ള വിദഗ്ധർ സംവദിച്ച പരിപാടി, ഡിജിറ്റൽ ആശ്രിതത്വം വർധിക്കുന്ന കാലഘട്ടത്തിൽ ഏറെ പ്രസക്തമായ ചർച്ചകൾക്ക് വഴിയൊരുക്കി.
ഡിജിറ്റൽ ലോകത്തിന്റെ സാധ്യതകളും വെല്ലുവിളികളും ഒരുപോലെ തിരിച്ചറിഞ്ഞ് ആരോഗ്യകരമായ ഡിജിറ്റൽ ജീവിതത്തിലേക്ക് സമൂഹത്തെ നയിക്കേണ്ടതിന്റെ ആവശ്യകതയാണ് ‘മണപ്പുറം ഡയലോഗ്സ്’ മുംബൈ പതിപ്പ് മുന്നോട്ടുവച്ച പ്രധാന സന്ദേശം. Watch highlights of the event in Amchi Mumbai, this Saturday 4.30 p.m. in Kairali News
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | JUNE 20 2026 SATURDAY 4.30 P.M. | KAIRALI NEWS
