നവി മുംബൈ: രാഷ്ട്രീയ സ്വയംസേവക് സംഘം (ആർഎസ്എസ്) ശതാബ്ദി ആഘോഷങ്ങളുടെ ഭാഗമായി ഭാരത് ഭാരതി മലയാളി വിഭാഗം കുടുംബ സംഗമവും 2026-27 അധ്യയന വർഷത്തെ ബാലഗോകുലം ക്ലാസുകളുടെ ഉദ്ഘാടനവും ജൂൺ 28-ന് പൻവേലിൽ സംഘടിപ്പിക്കും.
ന്യൂ പൻവൽ സെക്ടർ 6-ലെ വസുദേവ് ബൽവന്ത് ഫട്കെ വിദ്യാലയ ഓഡിറ്റോറിയത്തിൽ നടക്കുന്ന പരിപാടികൾ രാവിലെ 9.30ന് ബാലഗോകുലം ക്ലാസുകളുടെ ഉദ്ഘാടനത്തോടെ ആരംഭിക്കും. എബിവിപി സംസ്ഥാന ഉപാധ്യക്ഷനും മഹാത്മാ ഗാന്ധി സർവകലാശാല സെനറ്റ് അംഗവുമായ അരുൺ മോഹൻ ഉദ്ഘാടനം നിർവഹിക്കും. തുടർന്ന് മുംബൈയിലെ ബാലഗോകുലം പ്രവർത്തകരുടെ ക്ലാസുകളും നവി മുംബൈയിലെ ബാലഗോകുലാംഗങ്ങൾ അവതരിപ്പിക്കുന്ന വിവിധ കലാപരിപാടികളും അരങ്ങേറും.
വൈകുന്നേരം 5.30ന് നടക്കുന്ന ഭാരത് ഭാരതി കുടുംബ സംഗമത്തിൽ പൻവേൽ താലൂക്കിലെ മലയാളി കുടുംബാംഗങ്ങൾ പങ്കെടുക്കും. ഭാരത് ഭാരതി പ്രമുഖ് എ.ആർ. ഗോകുൽ ദാസിന്റെ അധ്യക്ഷതയിൽ നടക്കുന്ന സാംസ്കാരിക സമ്മേളനം മാതാ അമൃതാനന്ദമയി മഠം, നെരൂളിലെ സ്വാമി അവ്യയാമൃതാനന്ദപുരി ഉദ്ഘാടനം ചെയ്യും.
അരുൺ മോഹൻ മുഖ്യപ്രഭാഷണം നടത്തും. ആർഎസ്എസ് കൊളാബ ജില്ലാ കാര്യവാഹ് ശ്രീരംഗ് കാണെ, ഡോ. ഗീതാ നമ്പ്യാർ, രാജേഷ് മേനോൻ, ജി. വിജയകുമാർ, എം. രാമചന്ദ്രൻ, പി.എം. ശ്രീജിത് കുമാർ എന്നിവർ ചടങ്ങിൽ സംസാരിക്കും.
കുടുംബ സംഗമത്തോടനുബന്ധിച്ച് നൃത്ത-സംഗീത പരിപാടികൾ ഉൾപ്പെടെയുള്ള വിവിധ സാംസ്കാരിക അവതരണങ്ങളും സംഘടിപ്പിച്ചിട്ടുണ്ട്.
മലയാളി കുടുംബങ്ങളെ ഒരുമിപ്പിക്കുന്നതിനും ഭാരതീയ സംസ്കാരവും മൂല്യങ്ങളും പുതുതലമുറയിലേക്ക് പകർന്നുനൽകുന്നതിനുമുള്ള വേദിയായി പരിപാടി മാറുമെന്ന് സംഘാടകർ അറിയിച്ചു.
