സ്കൂൾ വളപ്പിൽ നിറയെ ചക്കയും മാങ്ങയും വാഴയും നാളികേരവും; വിദ്യാർത്ഥികൾക്ക് പ്രകൃതിയുടെ മധുരപാഠവുമായി ഡോ. ഉമ്മൻ ഡേവിഡ്
ഡോംബിവ്ലി: മഹാനഗരങ്ങളിലെ സ്കൂൾ ക്യാമ്പസുകൾ കോൺക്രീറ്റ് കാടുകളായി മാറിക്കൊണ്ടിരിക്കുന്ന കാലത്ത്, ഡോംബിവ്ലിയിലെ ഹോളി ഏഞ്ചൽസ് സ്കൂൾ ആൻഡ് ജൂനിയർ കോളേജ് പ്രകൃതിയോട് ചേർന്നൊരു വ്യത്യസ്ത മാതൃക തീർക്കുകയാണ്. സ്കൂൾ വളപ്പിൽ നിറഞ്ഞുനിൽക്കുന്ന ചക്കമരങ്ങളും മാവുകളും വാഴകളും നാളികേരങ്ങളും വിദ്യാർത്ഥികൾക്ക് പാഠപുസ്തകങ്ങൾക്ക് അപ്പുറമുള്ള ജീവിതപാഠങ്ങളാണ് നൽകുന്നത്.
ഈ ഹരിത സംരംഭത്തിന് പിന്നിൽ സ്കൂളിന്റെ സ്ഥാപക ഡയറക്ടറായ ഡോ. ഉമ്മൻ ഡേവിഡ് ആണ്. തുടർച്ചയായി നൂറുമേനി വിജയങ്ങൾ കൈവരിച്ച് അക്കാദമിക രംഗത്ത് ശ്രദ്ധേയമായ നേട്ടങ്ങൾ സ്വന്തമാക്കുന്ന ഈ വിദ്യാഭ്യാസ സ്ഥാപനം, പ്രകൃതി സംരക്ഷണത്തിലും കാർഷിക സംസ്കാരത്തിലും അതേ മികവ് പിന്തുടരുകയാണ്.
സ്കൂൾ വളപ്പിൽ തൂങ്ങി നിൽക്കുന്ന ചക്കകൾ വിദ്യാർത്ഥികളുടെയും രക്ഷിതാക്കളുടെയും സന്ദർശകരുടെയും ശ്രദ്ധ ആകർഷിക്കുന്ന കാഴ്ചയാണ്. നഗരജീവിതത്തിൽ അപൂർവമായി മാറിക്കൊണ്ടിരിക്കുന്ന ഫലവൃക്ഷങ്ങളെ കുട്ടികൾക്ക് പരിചയപ്പെടുത്തുകയും പ്രകൃതിയുമായുള്ള ബന്ധം വളർത്തുകയും ചെയ്യുക എന്ന ലക്ഷ്യത്തോടെയാണ് വർഷങ്ങൾക്കുമുമ്പ് ഈ ഹരിതയജ്ഞത്തിന് തുടക്കമിട്ടത്.
ആലപ്പുഴയുടെ മണ്ണിൽ ജനിച്ച് വളർന്ന ഡോ. ഉമ്മൻ ഡേവിഡ്, കേരളത്തിന്റെ ഗ്രാമീണ സംസ്കാരവും പ്രകൃതിയുമായുള്ള ആത്മബന്ധവും മുംബൈയുടെ മണ്ണിലേക്ക് പകർത്താൻ ശ്രമിച്ച വ്യക്തിയാണ്. വിദ്യാഭ്യാസം വെറും പരീക്ഷാ വിജയങ്ങളിൽ ഒതുങ്ങുന്നതല്ലെന്നും, പ്രകൃതിയെ മനസ്സിലാക്കുകയും സംരക്ഷിക്കുകയും ചെയ്യുന്ന ഉത്തരവാദിത്തമുള്ള പൗരന്മാരെ വളർത്തിയെടുക്കലാണ് യഥാർത്ഥ വിദ്യാഭ്യാസമെന്നുമുള്ള വിശ്വാസമാണ് അദ്ദേഹത്തെ നയിക്കുന്നത്.
“വിദ്യാധനം സർവ്വധനാൽ പ്രധാനം” എന്ന ആപ്തവാക്യം ജീവിതമന്ത്രമാക്കിയ ഡോ.ഡേവിഡ്, അര നൂറ്റാണ്ടിലേറെയായി വിദ്യാഭ്യാസ രംഗത്ത് സജീവ സാന്നിധ്യമാണ്. ആയിരക്കണക്കിന് വിദ്യാർത്ഥികളുടെ ജീവിതത്തിൽ വെളിച്ചം പകർന്ന അധ്യാപകനും വിദ്യാഭ്യാസ സംരംഭകനുമായ അദ്ദേഹം, ഇന്ന് അധ്യാപനരംഗത്തെ അൻപത് വർഷത്തെ സേവനത്തിന്റെ സുവർണ നേട്ടം ആഘോഷിക്കുകയാണ്.
മഹാനഗരത്തിന് വിദ്യയും സംസ്കാരവും സ്നേഹവും പങ്കുവെച്ച ആലപ്പുഴക്കാരന്റെ ഈ യാത്ര നിരവധി യുവ അധ്യാപകർക്കും വിദ്യാഭ്യാസ രംഗത്ത് പ്രവർത്തിക്കുന്നവർക്കും പ്രചോദനമാണ്. വിദ്യാഭ്യാസ നേട്ടങ്ങൾക്കൊപ്പം പ്രകൃതിസ്നേഹവും സാമൂഹിക ഉത്തരവാദിത്തവും വിദ്യാർത്ഥികളിൽ വളർത്തിയെടുക്കാൻ കഴിയുമെന്നതിന്റെ ജീവിക്കുന്ന ഉദാഹരണമായി ഹോളി ഏഞ്ചൽസ് സ്കൂൾ ക്യാമ്പസ് മാറിയിരിക്കുന്നു.
സ്കൂൾ വളപ്പിൽ തൂങ്ങിനിൽക്കുന്ന ചക്കകൾ ഒരു ഫലമരത്തിന്റെ വിളവു മാത്രമല്ല; അൻപത് വർഷമായി വിദ്യയുടെ വിത്തുകൾ പാകി വളർത്തിയ ഒരു അധ്യാപകന്റെ കാഴ്ചപ്പാടിന്റെ മധുരഫലങ്ങൾ കൂടിയാണ്.
അതെ, വേണമെങ്കിൽ ചക്ക വിദ്യാലയത്തിലും കായ്ക്കും. അതിന് പിന്നിൽ പ്രകൃതിയെ സ്നേഹിക്കുന്ന ഒരു അധ്യാപകന്റെ മനസ്സ് മാത്രം മതിയാകും.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | JUNE 20 2026 SATURDAY 4.30 P.M. | KAIRALI NEWS
