ഡോംബിവ്ലി: കേരളീയ സമാജം (റജിസ്റ്റേർഡ്), ഡോംബിവ്ലിയുടെ ഓഗസ്റ്റ് മാസത്തിലെ സാഹിത്യസായാഹ്നം ഓഗസ്റ്റ് 9-ന് (ഞായറാഴ്ച) വൈകിട്ട് 4.30ന് പാണ്ഡുരംഗവാടിയിലെ മോഡൽ ഇംഗ്ലീഷ് സ്കൂളിന്റെ ഏഴാം നിലയിലെ എയർ കണ്ടീഷൻഡ് ഹാളിൽ നടക്കും.
സാഹിത്യകാരനായ മുരളി വട്ടേനാട്ട് രചിച്ച രണ്ട് കഥകളെ ആസ്പദമാക്കിയുള്ള അവലോകനവും തുറന്ന ചർച്ചയും പരിപാടിയുടെ മുഖ്യ ആകർഷണമായിരിക്കും. കേരളീയ സമാജം ആർട്സ് & കൾച്ചർ സെക്രട്ടറി കെ. കെ. സുരേഷ്ബാബു അധ്യക്ഷത വഹിക്കുന്ന ചടങ്ങ് കവിയും കഥാകൃത്തുമായ ലിനോദ് വർഗീസ് ഉദ്ഘാടനം ചെയ്യും.
പരിപാടിയുടെ ഭാഗമായി കേരളീയ സമാജത്തിലെ മുൻ അംഗവും പ്രശസ്ത കഥാകൃത്തുമായിരുന്ന പരേതനായ എം. ചന്ദ്രശേഖരന്റെ രണ്ടാമത്തെ കഥാസമാഹാരമായ “കഥ”യുടെ പ്രകാശനവും നടക്കും. കുടുംബാംഗങ്ങളുടെ സാന്നിധ്യത്തിൽ സംഘടിപ്പിക്കുന്ന ഈ ചടങ്ങ് അദ്ദേഹത്തിന്റെ സാഹിത്യ സംഭാവനകളെ അനുസ്മരിക്കുന്നതായിരിക്കും.
സാഹിത്യത്തെ സ്നേഹിക്കുന്നവർക്കും വായനാ സംസ്കാരത്തെ പ്രോത്സാഹിപ്പിക്കുന്നവർക്കും ഒരുമിച്ച് ചിന്തകൾ പങ്കുവെക്കാനും സമകാലിക സാഹിത്യ പ്രവണതകൾ ചർച്ച ചെയ്യാനുമുള്ള വേദിയായാണ് സാഹിത്യസായാഹ്നം ഒരുക്കിയിരിക്കുന്നതെന്ന് സംഘാടകർ അറിയിച്ചു.
പരിപാടിയിൽ സമാജം അംഗങ്ങളും സാഹിത്യപ്രേമികളും സാംസ്കാരിക പ്രവർത്തകരും പങ്കെടുക്കുമെന്ന് ആർട്സ് & കൾച്ചർ സെക്രട്ടറി കെ. കെ. സുരേഷ്ബാബു, സാഹിത്യസായാഹ്നം കൺവീനർ ജോയ് ഗുരുവായൂർ എന്നിവർ അറിയിച്ചു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
