നവി മുംബൈ: ശ്രീനാരായണ ഗുരുവിന്റെ “ഒരു ജാതി, ഒരു മതം, ഒരു ദൈവം മനുഷ്യന്” എന്ന മഹത് സന്ദേശം ഉയർത്തിപ്പിടിച്ച് ശ്രീ നാരായണ മന്ദിര സമിതി (SNMS), സി.ബി.ഡി ബെലാപൂർ യൂണിറ്റ് സംഘടിപ്പിച്ച കുടുംബസംഗമം ഭക്തിനിർഭരവും ആഘോഷപൂർണവുമായി നടന്നു. സി.ബി.ഡി ബെലാപൂരിലെ കൈരളി കോംപ്ലക്സിൽ നടന്ന പരിപാടിയിൽ നവി മുംബൈയുടെ വിവിധ ഭാഗങ്ങളിൽ നിന്നായി സമിതി അംഗങ്ങളും കുടുംബാംഗങ്ങളും സാമൂഹിക-സാംസ്കാരിക രംഗത്തെ പ്രമുഖരും പങ്കെടുത്തു.
വൈകിട്ട് 4 മണിക്ക് പ്രാർത്ഥനയോടെ ആരംഭിച്ച പരിപാടിയിൽ കുട്ടികളുടെയും മുതിർന്നവരുടെയും വിവിധ കലാപരിപാടികൾ അരങ്ങേറി. യൂണിറ്റ് സെക്രട്ടറി അർജുനൻ കെ. സ്വാഗതം ആശംസിച്ച ചടങ്ങിൽ കുടുംബസംഗമങ്ങൾ സമൂഹത്തിൽ ഐക്യവും സൗഹാർദ്ദവും വളർത്തുന്നതിൽ വഹിക്കുന്ന പങ്ക് അദ്ദേഹം എടുത്തുപറഞ്ഞു.
ചടങ്ങിൽ ശ്രീനാരായണ മന്ദിര സമിതി പ്രസിഡന്റ് എം.ഐ. ദാമോദരൻ, ചെയർമാൻ എൻ. മോഹൻദാസ്, വൈസ് ചെയർമാൻ എസ്. ചന്ദ്രബാബു, പത്മശ്രീ അച്യുത് ആർ. പലവ്, ഡോ. ജയജി കൃഷ്ണനാഥ്, അശോക് ഗുർക്കെ, കോർപ്പറേറ്റർ സുരേഖ അശോക് നർബാഗെ, സോണൽ സെക്രട്ടറി എൻ.എസ്. രാജൻ, കൈരളി പ്രസിഡന്റ് ജി. കോമളൻ എന്നിവരുൾപ്പെടെ നിരവധി പ്രമുഖർ സന്നിഹിതരായിരുന്നു.
സമൂഹത്തിന്റെ വിവിധ മേഖലകളിൽ ശ്രദ്ധേയമായ സംഭാവനകൾ നൽകിയവരെ ചടങ്ങിൽ ആദരിക്കുകയും വിദ്യാഭ്യാസ രംഗത്ത് മികവ് പുലർത്തിയ വിദ്യാർത്ഥികൾക്ക് മെറിറ്റ് അവാർഡുകൾ വിതരണം ചെയ്യുകയും ചെയ്തു.
വി.കെ. സുരേഷ് ബാബു അവതരിപ്പിച്ച ‘പ്രഭാഷണം’ ചടങ്ങിന്റെ പ്രധാന ആകർഷണങ്ങളിലൊന്നായി. ശ്രീനാരായണ ഗുരുവിന്റെ സന്ദേശങ്ങളുടെ സമകാലിക പ്രസക്തി അദ്ദേഹം വിശദീകരിച്ചു.
തുടർന്ന് SNMS കലാക്ഷേത്ര അവതരിപ്പിച്ച ‘നിഴലുകൾക്ക് നിറഭേദമോ’ എന്ന നാടകം അരങ്ങേറി. സാമൂഹിക പ്രസക്തിയുള്ള പ്രമേയവും മികച്ച അവതരണവും പ്രേക്ഷക പ്രശംസ നേടി.
ഡി. അശോകൻ നന്ദി രേഖപ്പെടുത്തി. വിപുലമായ ജനപങ്കാളിത്തത്തോടെ നടന്ന ഈ കുടുംബസംഗമം സാമൂഹിക ഐക്യം, കുടുംബബന്ധം, ശ്രീനാരായണ ഗുരുവിന്റെ മാനവിക സന്ദേശം എന്നിവ ശക്തമായി ഉയർത്തിക്കാട്ടിയ ശ്രദ്ധേയമായ പരിപാടിയായി മാറി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
