മുംബൈ: ഓണത്തിന് കേരളത്തിലേക്ക് പോകാൻ ട്രെയിൻ ടിക്കറ്റ് ലഭിക്കാതെ ദുരിതത്തിലായ മുംബൈ മലയാളികളുടെ നിരന്തര പരാതികൾക്കൊടുവിൽ ഒടുവിൽ ആശ്വാസമായി ഓണം സ്പെഷ്യൽ ട്രെയിൻ പ്രഖ്യാപിച്ചു. ആഗസ്റ്റ് 23ന് മുംബൈ ലോകമാന്യ തിലക് ടെർമിനസിൽ നിന്ന് കേരളത്തിലേക്ക് സ്പെഷ്യൽ സർവീസ് നടത്തും.

01463 നമ്പറിലുള്ള സ്പെഷ്യൽ ട്രെയിൻ ആഗസ്റ്റ് 23ന് മുംബൈയിൽ നിന്ന് പുറപ്പെട്ട് കേരളത്തിലേക്ക് സർവീസ് നടത്തും. ഇതിന് പുറമെ 01464 നമ്പറിലുള്ള മടക്ക സർവീസ് ആഗസ്റ്റ് 29ന് കേരളത്തിൽ നിന്ന് മുംബൈയിലേക്ക് ഉണ്ടായിരിക്കും. ലഭ്യമായ വിവരമനുസരിച്ച് ഇരു ദിശകളിലേക്കും ഓരോ സർവീസാണ് പ്രഖ്യാപിച്ചിരിക്കുന്നത്.

കേരളത്തിലേക്കുള്ള സ്ഥിരം ട്രെയിനുകളിൽ ടിക്കറ്റ് ലഭിക്കാതെ ആയിരക്കണക്കിന് യാത്രക്കാർ ബുദ്ധിമുട്ടുന്നതിനിടെയാണ് അവസാന നിമിഷം സ്പെഷ്യൽ ട്രെയിൻ പ്രഖ്യാപിച്ചത്. ഓണത്തിന് നാട്ടിലെത്താൻ കഴിയുമോ എന്ന ആശങ്കയിലായിരുന്ന മുംബൈ മലയാളികൾക്ക് പ്രഖ്യാപനം വലിയ ആശ്വാസമായിട്ടുണ്ട്.

പ്രധാന സ്റ്റോപ്പുകൾ

കേരളത്തിലേക്കുള്ള സർവീസിന് മഹാരാഷ്ട്രയിലും കൊങ്കൺ മേഖലയിലും നിരവധി സ്റ്റോപ്പുകൾ ഉണ്ടായിരിക്കും. താനെ, പൻവേൽ, പെൻ, റോഹ, ചിപ്ലൂൺ, രത്നഗിരി, കണകവലി, കുഡാൽ, സാവന്ത്‌വാടി റോഡ് തുടങ്ങിയ പ്രധാന സ്റ്റേഷനുകളിൽ ട്രെയിനിന് സ്റ്റോപ്പുകളുണ്ട്. തുടർന്ന് കൊങ്കൺ പാതയിലൂടെ കേരളത്തിലേക്ക് സർവീസ് തുടരും.

പരാതികൾക്കൊടുവിൽ നടപടി

ഓണക്കാലത്തെ യാത്രാപ്രതിസന്ധി പരിഹരിക്കണമെന്നാവശ്യപ്പെട്ട് മുംബൈ മലയാളി സംഘടനകളും യാത്രക്കാരും റെയിൽവേ അധികൃതർക്ക് നിരന്തരം നിവേദനങ്ങളും പരാതികളും നൽകിയിരുന്നു. അധിക സർവീസുകൾ അനുവദിക്കണമെന്ന ആവശ്യം ശക്തമായ സാഹചര്യത്തിലാണ് പ്രത്യേക ട്രെയിൻ പ്രഖ്യാപനം. കഴിഞ്ഞ ദിവസം സ്പെഷ്യൽ ട്രെയിൻ ആവശ്യപ്പെട്ട് എം പി സി സി ജനറൽ സെക്രട്ടറി ജോജോ തോമസ് മധ്യ റെയിൽവേ അധികൃതർക്ക് നിവേദനം നൽകിയിരുന്നു.

എന്നാൽ ഒരു സർവീസ് മാത്രം പ്രഖ്യാപിച്ചതും പ്രഖ്യാപനം അവസാന നിമിഷമായതും യാത്രക്കാരിൽ ചോദ്യങ്ങൾ ഉയർത്തുന്നുണ്ട്. ആവശ്യത്തിന് സീറ്റുകൾ ലഭ്യമാകുമോ എന്ന ആശങ്കയും നിലനിൽക്കുന്നു.

അതേസമയം, 01464 മടക്ക സ്പെഷ്യൽ ട്രെയിനിന്റെ റൂട്ടിൽ കേരളത്തിൽ നിന്ന് മുംബൈയിലേക്ക് കോട്ടയം, എറണാകുളം ടൗൺ, തൃശൂർ, ഷൊർണൂർ ഉൾപ്പെടെയുള്ള പ്രധാന സ്റ്റോപ്പുകളും തുടർന്ന് കൊങ്കൺ മേഖലയിലെ സ്റ്റേഷനുകളും ഉൾപ്പെടുന്നു.

ഓണത്തിന് ഇനി ദിവസങ്ങൾ മാത്രം ശേഷിക്കെ പ്രഖ്യാപിച്ച സ്പെഷ്യൽ ട്രെയിൻ പരമാവധി പ്രയോജനപ്പെടുത്താനാണ് മുംബൈ മലയാളികളുടെ ശ്രമം. എന്നാൽ ഓണക്കാലത്തെ യാത്രാപ്രശ്നത്തിന് താൽക്കാലിക പരിഹാരം മാത്രമല്ല, തിരക്കേറിയ ഉത്സവ സീസണുകളിൽ നേരത്തെ തന്നെ കൂടുതൽ ട്രെയിൻ സർവീസുകൾ പ്രഖ്യാപിക്കുന്ന സ്ഥിരം സംവിധാനം വേണമെന്നാണ് യാത്രക്കാരുടെ ആവശ്യം.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി

AMCHI MUMBAI
Every Saturday | 4:30 PM
Kairali News