മഹാരാഷ്ട്രയിലെ യുവാക്കൾക്ക് ഇതാ ഒരു സന്തോഷവാർത്ത. മഹാരാഷ്ട്രയിലെ യുവാക്കൾക്ക് തൊഴിലവസരങ്ങൾ സൃഷ്ടിക്കുകയെന്ന ലക്ഷ്യത്തോടെ ആപ്പ് അധിഷ്ഠിത പാസഞ്ചർ വാഹന സേവനം നടപ്പിലാക്കാൻ സംസ്ഥാന സർക്കാർ പദ്ധതിയിടുന്നു.
യാത്രാ ഗതാഗതത്തിനായുള്ള ആപ്പ് അധിഷ്ഠിത റിക്ഷ, ടാക്സി, ഇ-ബൈക്ക് സേവനങ്ങൾ ഇനി സ്വകാര്യ കമ്പനികൾക്ക് മാത്രമായി പരിമിതപ്പെടുത്തില്ലെന്ന് മഹാരാഷ്ട്ര സർക്കാർ പ്രസ്താവനയിൽ പറഞ്ഞു.
സർക്കാർ ആരംഭിക്കാനിരിക്കുന്ന ആപ്പുകൾക്ക് ജയ് മഹാരാഷ്ട്ര, മഹാ-റൈഡ്, മഹാ-യാത്രി, അല്ലെങ്കിൽ മഹാ-ഗോ എന്നീ പേരുകൾ നൽകുമെന്ന് ഗതാഗതമന്ത്രി പ്രതാപ് സർനായിക് പ്രഖ്യാപിച്ചു.
മുഖ്യമന്ത്രി ദേവേന്ദ്ര ഫഡ്നവിസ്, ഉപമുഖ്യമന്ത്രിമാരായ ഏക്നാഥ് ഷിന്ദേ, അജിത് പവാർ എന്നിവരുടെ അംഗീകാരത്തിനുശേഷം ആപ്പുകളുടെ ഉദ്ഘാടനം നടക്കുമെന്ന് മന്ത്രി വ്യക്തമാക്കി. സുതാര്യത നിലനിർത്തുന്നതിനാവശ്യമായ എല്ലാവ്യവസ്ഥകളും ആപ്പിൽ ഉൾപ്പെടുത്തുമെന്ന് മന്ത്രി അറിയിച്ചു. ഈ സംരംഭത്തിനുകീഴിൽ, യുവാക്കൾക്ക് പ്രത്യേക സാമ്പത്തിക സഹായം നൽകുന്നതാണ്. മുംബൈ സഹകരണബാങ്ക് തൊഴിൽരഹിതരായ യുവാക്കൾക്ക് 10 ശതമാനം പലിശനിരക്കിൽ വാഹനവായ്പ നൽകും.
