അന്താരാഷ്ട്ര വനിതാ ദിനത്തോടനുബന്ധിച്ച് ഗുരുവായൂർ ഉത്സവത്തിന്റെ ഭാഗമായി സംഘടിപ്പിച്ച തിരുവാതിരകളിയിൽ മുംബൈയിലെ ബോറിവിലിയിൽ ആസ്ഥാനമായ “നൃത്തസ്വര” സംഘത്തിലെ വനിതകൾ ശ്രദ്ധേയ പങ്കാളിത്തം നടത്തി. കേരളത്തിന്റെ തനത് നൃത്തരൂപമായ തിരുവാതിരയെ ചിട്ടയോടെ അവതരിപ്പിച്ചാണ് ഇവരെല്ലാം, പ്രവാസി മലയാളികളുടെ സാംസ്കാരിക സാന്നിധ്യം വേദിയിൽ അടയാളപ്പെടുത്തിയത് .
പരമ്പരാഗത വേഷഭൂഷയിലും ചിട്ടയായ ചുവടുകളിലും അവതരിച്ച നൃത്തസ്വര അംഗങ്ങളുടെ പ്രകടനം പ്രേക്ഷകപ്രീതി നേടി. സ്ത്രീകളുടെ ആത്മവിശ്വാസവും കൂട്ടായ്മയും പ്രതിഫലിപ്പിക്കുന്ന ഈ കലാപരിപാടി, വനിതാ ദിനാഘോഷങ്ങൾക്ക് കൂടുതൽ തിളക്കം പകർന്നു.
പരിപാടിയിൽ പങ്കെടുത്ത എല്ലാ കലാകാരികളെയും കേന്ദ്രമന്ത്രി സുരേഷ് ഗോപി പുരസ്കാരങ്ങൾ നൽകി ആദരിച്ചു. വനിതകളുടെ സാംസ്കാരിക പങ്കാളിത്തവും സമൂഹത്തിലെ സജീവ ഇടപെടലും അഭിനന്ദിച്ച കേന്ദ്രമന്ത്രി , ഇത്തരം കൂട്ടായ്മകൾ പുതുതലമുറയ്ക്ക് പ്രചോദനമാണെന്നും അഭിപ്രായപ്പെട്ടു.
മുംബൈയിൽ നിന്നുള്ള കലാസംഘങ്ങൾ കേരളത്തിലെ പ്രധാന വേദികളിൽ എത്തി പ്രകടനം കാഴ്ചവെക്കുന്നത് പ്രവാസി സമൂഹത്തിന്റെ സാംസ്കാരിക ബന്ധങ്ങളെ കൂടുതൽ ദൃഢമാക്കുന്നതായി സംഘാടകർ വ്യക്തമാക്കി.
വനിതാ ദിനത്തിന്റെ പ്രാധാന്യം കൂടുതൽ ഉയർത്തിപ്പിടിച്ച ഈ തിരുവാതിരക്കളി, കലയും സംസ്കാരവും ഒന്നിക്കുന്ന മനോഹരമായ അനുഭവമായി മാറി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
