ഏഷ്യാനെറ്റ് അടക്കം വിവിധ ടെലിവിഷൻ ചാനലുകളിൽ അവതാരകനും മാധ്യമപ്രവർത്തകനുമായ സനൽ പോറ്റി കൊച്ചിയിൽ നിര്യാതനായി. 55 വയസ്സായിരുന്നു. വൃക്ക രോഗത്തെ തുടർന്ന് ദീർഘകാലമായി ചികിത്സയിലായിരുന്നു. രണ്ട് വൃക്കകളുടെയും പ്രവര്ത്തനം രണ്ട് വര്ഷം മുന്പ് നിലച്ചിരുന്നു. 2018-ല് പക്ഷാഘാത ബാധിതനായിരുന്നു.
പുലർച്ചെ മൂന്നരയോടെ എറണാകുളം മഞ്ഞുമ്മൽ ആശുപത്രിയിലായിരുന്നു അന്ത്യം. ഏറെക്കാലം ഏഷ്യാനെറ്റിലെ മോണിംഗ് ഷോയുടെ അവതാരകനായിരുന്നു. തുടർന്ന് ജീവൻ ടിവിയിൽ പ്രോഗ്രാം വിഭാഗം മേധാവിയായും അവതാരകനായും പ്രവർത്തിച്ചു. കളമശ്ശേരി എസ് സി എം എസ് കോളേജ് പബ്ലിക് റിലേഷൻസ് മാനേജരായി പ്രവർത്തിച്ചു വരുന്നതിനിടെയാണ് അന്ത്യം.
മുംബൈയിൽ നിരവധി സ്റ്റേജ് ഷോകളിൽ അവതാരകനായി എത്തിയിട്ടുള്ള സനൽ, മുംബൈയിൽ നിന്നും പ്രസിദ്ധീകരിച്ചിരുന്ന വാക്ക് എന്ന മാഗസിന്റെ എഡിറ്ററുമായിരുന്നു.
