മുംബൈ: മലയാള ചലച്ചിത്രഗാന രംഗത്തെ അനശ്വര ശബ്ദങ്ങളായിരുന്ന പി. ജയചന്ദ്രന്റെയും എസ്. ജാനകിയുടെയും ഓർമകൾക്ക് ഗാനാർച്ചനയൊരുക്കി ട്രോംബേ ടൗൺഷിപ്പ് ഫൈൻ ആർട്ട്സ് ക്ലബ് (ടി.ടി.എഫ്.എ.സി). ജൂലൈ 26 ഞായറാഴ്ച സംഘടിപ്പിച്ച അനുസ്മരണ സമ്മേളനത്തിലാണ് മലയാളത്തിന്റെ പ്രിയ ഭാവഗായകരുടെ സംഗീത സംഭാവനകൾ അനുസ്മരിച്ചത്.
മലയാള ചലച്ചിത്രഗാന ശാഖയ്ക്ക് ജയചന്ദ്രനും ജാനകിയമ്മയും നൽകിയ നിസ്തുല സംഭാവനകളെക്കുറിച്ച് ജി.കെ. സുനിലും ലത സുരേഷും സചിത്ര അവതരണം നടത്തി.
തുടർന്ന് ദേവിക, വിഷ്ണു, അദിതി, സുധീർ, വീണ, നിരഞ്ജൻ എന്നിവർ ജയചന്ദ്രനും ജാനകിയമ്മയും ആലപിച്ച ജനപ്രിയ ഗാനങ്ങൾ അവതരിപ്പിച്ചു. ഇരുവരുടെയും സംഗീതജീവിതത്തിലെ അനശ്വര ഗാനങ്ങളെ കോർത്തിണക്കി വിമൽനാഥ്, ജ്യോത്സ്ന, പ്രദീപ്, ദിവ്യ, ഹരിമോഹൻ, നീതു എന്നിവർ അവതരിപ്പിച്ച ചലച്ചിത്രഗാന മെഡ്ലിയോടെയാണ് ഗാനാർച്ചന സമാപിച്ചത്.
ടിങ്കു കൃഷ്ണനും രതീഷും ശബ്ദ-വെളിച്ച നിയന്ത്രണം നിർവഹിച്ചു. ടി.ടി.എഫ്.എ.സി പ്രസിഡന്റ് ജിൽജു രതീഷും ജോയിന്റ് സെക്രട്ടറി വിനോദ് ദിവാസനും ചടങ്ങിൽ സംസാരിച്ചു.
മലയാളത്തിന്റെ സംഗീതപ്രേമികളുടെ മനസ്സിൽ എന്നും നിറഞ്ഞുനിൽക്കുന്ന രണ്ട് മഹാപ്രതിഭകൾക്ക് സ്നേഹാദരമർപ്പിച്ചുകൊണ്ട്, സംഗീതസാന്ദ്രമായ ഓർമകളുടെ സായാഹ്നമായി മാറുകയായിരുന്നു ടി.ടി.എഫ്.എ.സിയുടെ അനുസ്മരണ പരിപാടി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
