ഡോംബിവ്‌ലി: വേൾഡ് മലയാളി ഫെഡറേഷൻ (WMF) മഹാരാഷ്ട്ര സ്റ്റേറ്റ് കൗൺസിലിന്റെ ആഭിമുഖ്യത്തിൽ സംഘടിപ്പിക്കുന്ന ‘മഹാ പൊന്നോണം 2026’ ആഗസ്റ്റ് 30 ഞായറാഴ്ച ഡോംബിവ്‌ലി ജിംഖാന ഹാളിൽ നടക്കും. വൈകിട്ട് 7 മണി മുതൽ ആരംഭിക്കുന്ന ആഘോഷ പരിപാടികളിൽ ചലച്ചിത്ര നടനും ഗായകനുമായ ജയരാജ് വാരിയർ മുഖ്യാതിഥിയായി പങ്കെടുക്കും. സാമൂഹിക, സാംസ്‌കാരിക, രാഷ്ട്രീയ രംഗങ്ങളിലെ പ്രമുഖരും ചടങ്ങിൽ സന്നിഹിതരാകും.

മലയാളത്തിന്റെ തനിമയും കേരളത്തിന്റെ സാംസ്‌കാരിക പൈതൃകവും വിളിച്ചോതുന്ന വൈവിധ്യമാർന്ന കലാപരിപാടികളാണ് ആഘോഷത്തിന്റെ ഭാഗമായി അരങ്ങേറുക. മാവേലി വരവേൽപ്പ്, തിരുവാതിര, നാടോടിനൃത്തങ്ങൾ, ഒപ്പന, മാർഗംകളി, വഞ്ചിപ്പാട്ട് തുടങ്ങിയ കേരളീയ കലാരൂപങ്ങൾ ആഘോഷത്തിന് മാറ്റുകൂട്ടും.

ആഘോഷത്തിന്റെ ഭാഗമായി വൈകിട്ട് 7 മണിക്ക് നടക്കുന്ന സാംസ്‌കാരിക സമ്മേളനത്തിൽ എസ്.എസ്.എൽ.സി, എച്ച്.എസ്.സി പരീക്ഷകളിൽ മികച്ച വിജയം നേടിയ WMF അംഗങ്ങളുടെ കുട്ടികളെ അനുമോദിക്കും. വിദ്യാഭ്യാസ രംഗത്തെ മികവ് പ്രോത്സാഹിപ്പിക്കുന്നതിന്റെയും പുതുതലമുറയുടെ നേട്ടങ്ങളെ ആദരിക്കുന്നതിന്റെയും ഭാഗമായാണ് ആദരിക്കൽ ചടങ്ങ് സംഘടിപ്പിക്കുന്നത്.

170 രാജ്യങ്ങളിൽ സാന്നിധ്യമുള്ള വേൾഡ് മലയാളി ഫെഡറേഷൻ മഹാരാഷ്ട്ര സ്റ്റേറ്റ് കൗൺസിൽ പാട്രൺ ഡോ. ഉമ്മൻ ഡേവിഡ്, പ്രസിഡന്റ് ഡോ. റോയ് മാത്യു ജോൺ, സെക്രട്ടറി ഡൊമിനിക് പോൾ, ട്രഷറർ ബിനോയ് തോമസ് എന്നിവരുടെ നേതൃത്വത്തിലാണ് പരിപാടികൾ സംഘടിപ്പിക്കുന്നത്.

പ്രേംലാൽ, സിന്ധു നായർ, ഡോ.ജയശ്രീ മേനോൻ, ബിജു രാജൻ, സ്മിത, ഉണ്ണിക്കൃഷ്ണക്കുറുപ്പ്, കൃഷ്ണകുമാർ, ശിവറാം മഠത്തിൽ തുടങ്ങിയവരടങ്ങുന്ന കമ്മിറ്റിയാണ് ഏകോപനം നിർവഹിക്കുന്നത്.

പരിപാടിയിൽ പങ്കെടുക്കാൻ മുൻകൂർ പാസ് ആവശ്യമാണ്.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS