ക്ഷയരോഗ പ്രതിരോധം, നേരത്തെയുള്ള രോഗനിർണയം, ചികിത്സ എന്നിവയെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനായി ‘ടി.ബി മുക്ത മുംബൈ’ ക്യാമ്പയിന്റെ ഭാഗമായി ചേരിപ്രദേശ ബോധവത്കരണ പദയാത്ര സംഘടിപ്പിക്കുന്നു. ജൂലൈ 29ന് രാവിലെ 11ന് ചെമ്പൂരിലെ ശ്രീ നാരായണ ഗുരു കോളേജ് ഓഫ് കൊമേഴ്സ് ക്യാമ്പസിൽ പരിപാടിക്ക് തുടക്കമാകും.
മഹാരാഷ്ട്ര ലോക്ഭവൻ, മഹാരാഷ്ട്ര എൻ.എസ്.എസ് സെൽ, മുംബൈ സർവകലാശാല, എം.സി.ജി.എം, ശ്രീ നാരായണ ഗുരു കോളേജ് ഓഫ് കൊമേഴ്സ് എന്നിവയുടെ സംയുക്താഭിമുഖ്യത്തിലാണ് ക്യാമ്പയിൻ സംഘടിപ്പിക്കുന്നതെന്ന് സമിതി ജനറൽ സെക്രട്ടറി ഓ കെ പ്രസാദ് അറിയിച്ചു.
മഹാരാഷ്ട്ര ഗവർണർ ജിഷ്ണു ദേവ് വർമ്മ കുൽക്കർണി, മുംബൈ സർവകലാശാല വൈസ് ചാൻസലർ പ്രൊഫ. രവീന്ദ്ര ഡി. കുൽക്കർണി എന്നിവരടക്കം പ്രമുഖർ പരിപാടിയിൽ പങ്കെടുക്കും. മുംബൈ സർവകലാശാലയ്ക്ക് കീഴിലുള്ള വിവിധ കോളേജുകളിൽ നിന്നുള്ള 1,000ഓളം എൻ.എസ്.എസ് വളണ്ടിയർമാരും ക്യാമ്പയിനിൽ സജീവമായി പങ്കെടുക്കും.
ക്ഷയരോഗത്തിനെതിരായ പോരാട്ടത്തിൽ നേരത്തെയുള്ള രോഗനിർണയത്തിന്റെയും സമൂഹത്തിന്റെ കൂട്ടായ ഉത്തരവാദിത്വത്തിന്റെയും പ്രാധാന്യം ഉയർത്തിക്കാട്ടുകയാണ് ക്യാമ്പയിന്റെ ലക്ഷ്യമെന്ന് ശ്രീനാരായണ മന്ദിര സമിതി പ്രസിഡണ്ട് എം ഐ ദാമോദരൻ പറഞ്ഞു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
