താനെ, ജൂലൈ 29, 2026: സാമ്പത്തികമായി പിന്നാക്കം നിൽക്കുന്ന വിദ്യാർത്ഥികളുടെ വിദ്യാഭ്യാസത്തിന് കൈത്താങ്ങായി ഹിൽ ഗാർഡൻ അയ്യപ്പ ഭക്ത സംഘം (HGABS), താനെ. തുടർച്ചയായ നാലാം വർഷവും അർഹരായ വിദ്യാർത്ഥികൾക്ക് വിദ്യാഭ്യാസ സഹായം നൽകുന്നതിന്റെ ഭാഗമായി മൂന്ന് വിദ്യാർത്ഥികളുടെ ഒരു വർഷത്തെ മുഴുവൻ സ്കൂൾ ഫീസായ ₹40,340 സംഘം ഏറ്റെടുത്തു.
സെന്റ് ജോസഫ് ഇംഗ്ലീഷ് ഹൈസ്കൂൾ, താനെയിലെ മാനേജ്മെന്റിന് HGABS സന്നദ്ധ പ്രവർത്തകർ സ്കോളർഷിപ്പ് ചെക്ക് കൈമാറി. സമീപത്തെ ചേരിപ്രദേശത്ത് താമസിക്കുന്ന സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ മിടുക്കരായ മൂന്ന് വിദ്യാർത്ഥികൾക്കാണ് സഹായം ലഭിക്കുക.
സാമ്പത്തിക ബുദ്ധിമുട്ടുകൾ കാരണം അർഹരായ കുട്ടികളുടെ വിദ്യാഭ്യാസം തടസ്സപ്പെടരുതെന്ന ലക്ഷ്യത്തോടെയാണ് HGABS തുടർച്ചയായി നാലാം വർഷവും വിദ്യാഭ്യാസ സഹായ പദ്ധതി നടപ്പാക്കുന്നത്.
2026 ജൂൺ 25ന് സ്കൂളിലെ മുഴുവൻ വിദ്യാർത്ഥികൾക്കും HGABS സൗജന്യമായി നോട്ട് പുസ്തകങ്ങൾ വിതരണം ചെയ്തിരുന്നു. ഈ പരിപാടിക്കിടെയാണ് സാമ്പത്തികമായി പിന്നാക്കം നിൽക്കുന്ന മൂന്ന് മിടുക്കരായ വിദ്യാർത്ഥികളുടെ വിദ്യാഭ്യാസത്തിന് സഹായം നൽകണമെന്ന ആവശ്യം സ്കൂൾ അധികൃതരും രക്ഷിതാക്കളും സംഘടനയുടെ ഭാരവാഹികളുടെ ശ്രദ്ധയിൽപ്പെടുത്തിയത്.
തുടർന്ന് HGABS സന്നദ്ധ പ്രവർത്തകർ വിദ്യാർത്ഥികളുടെ കുടുംബങ്ങളുടെ സാമ്പത്തികവും സാമൂഹികവുമായ സാഹചര്യങ്ങൾ വിശദമായി വിലയിരുത്തി. അർഹത ഉറപ്പാക്കിയ ശേഷമാണ് മൂന്ന് വിദ്യാർത്ഥികളുടെയും ഈ അധ്യയന വർഷത്തെ മുഴുവൻ സ്കൂൾ ഫീസും ഏറ്റെടുക്കാൻ സംഘം തീരുമാനിച്ചത്.
വിദ്യാർത്ഥികളുടെ വിദ്യാഭ്യാസത്തിന് പിന്തുണ നൽകുന്ന ഈ സംരംഭത്തിന് സാമ്പത്തിക സഹായവും പ്രോത്സാഹനവും നൽകിയ എല്ലാ ദാതാക്കൾക്കും അഭ്യുദയകാംക്ഷികൾക്കും സന്നദ്ധ പ്രവർത്തകർക്കും HGABS നന്ദി അറിയിച്ചു. സമൂഹത്തിന്റെ വിദ്യാഭ്യാസ, ജീവകാരുണ്യ മേഖലകളിൽ കൂടുതൽ സേവന പ്രവർത്തനങ്ങൾ നടത്തുന്നതിനുള്ള പ്രചോദനമാണ് ലഭിക്കുന്ന പിന്തുണയും വിശ്വാസവുമെന്ന് ഹിൽ ഗാർഡൻ അയ്യപ്പ ഭക്ത സംഘം വ്യക്തമാക്കി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
