നവിമുംബൈ: കേരളത്തിന്റെ തനത് കലാരൂപങ്ങളും പാരമ്പര്യങ്ങളും ആവിഷ്കരിച്ച് സീവുഡ്സിൽ വീണ്ടും ഓണാഘോഷത്തിന് അരങ്ങൊരുങ്ങുന്നു. സീവുഡ്സ് മലയാളി സമാജവും നെക്സസ് സീവുഡ്സ് മാളും സംയുക്തമായി സംഘടിപ്പിക്കുന്ന ‘ഓണം ഓപ്പുലൻസ് 2026’ ഓഗസ്റ്റ് 22ന് സീവുഡ്സ് നെക്സസ് മാളിൽ നടക്കും.
ഇത്തവണത്തെ പ്രധാന ആകർഷണം കേരളത്തിന്റെ തനത് അനുഷ്ഠാന കലാരൂപങ്ങളായ പൂതനും തിറയും ആയിരിക്കും. ഭാരമേറിയ ശിരോലങ്കാരങ്ങളും വർണാഭമായ വേഷഭൂഷാദികളുമണിഞ്ഞ് എത്തുന്ന പൂതനും തിറയും മാളിൽ ചെണ്ടയുടെ താളത്തിനും വായ്ത്താരിക്കും ഒപ്പം നൃത്താവിഷ്കാരം നടത്തും. ഓണം ഓപ്പുലൻസിന്റെ ചരിത്രത്തിൽ ആദ്യമായാണ് പൂതനും തിറയും പരിപാടിയുടെ ഭാഗമാകുന്നത്.
ഭീമൻ പൂക്കളം; മാവേലിയുടെ വരവേൽപ്പ്
ഏഷ്യയിലെ ഏറ്റവും വലിയ റെയിൽവേ സ്റ്റേഷൻ കോംപ്ലക്സുകളിൽ ഒന്നായ സീവുഡ്സിന്റെ നടുമുറ്റത്ത് ഒരുക്കുന്ന ഭീമൻ പൂക്കളമാണ് ആഘോഷത്തിന്റെ മറ്റൊരു പ്രധാന ആകർഷണം. നൂറിലധികം കലാകാരന്മാരുടെ നേതൃത്വത്തിലാണ് പ്രത്യേക രൂപകൽപ്പനയിൽ പൂക്കളം ഒരുക്കുന്നത്.
ഓഗസ്റ്റ് 22ന് രാവിലെ 10.30 മുതൽ പൂക്കളം പൊതുജനങ്ങൾക്കായി പ്രദർശിപ്പിക്കും. വൈകിട്ട് ചെണ്ടമേളത്തിന്റെയും വായ്ത്താരിയുടെയും താലപ്പൊലിയുടെയും അകമ്പടിയോടെ മാവേലി മന്നനെ മാളിന് പുറത്തുനിന്ന് അകത്തേക്ക് ആനയിക്കും.
വൈകിട്ട് 5.30 മുതൽ രാത്രി 9 വരെ പൂക്കളത്തിന് സമീപം വിവിധ കലാ-സാംസ്കാരിക പരിപാടികളും അരങ്ങേറും.
കേരളത്തിന്റെ സാംസ്കാരിക വൈവിധ്യം
കഥകളി, തിരുവാതിരക്കളി, കേരളനടനം, വിവിധ എത്നിക് നൃത്തങ്ങൾ, ചെണ്ടമേളം തുടങ്ങിയ കലാരൂപങ്ങൾക്കൊപ്പം പരശുരാമൻ, വാമനൻ, വീരാംഗന ഉണ്ണിയാർച്ച തുടങ്ങിയ കഥാപാത്രങ്ങളുടെ വേഷാവിഷ്കാരങ്ങളും പരിപാടിയുടെ ഭാഗമാകും.
ഓണം വിളിച്ചറിയിക്കുന്ന വേടന്മാരുടെ സാന്നിധ്യവും ആഘോഷത്തിന് വേറിട്ട ദൃശ്യാനുഭവം നൽകും.
മലയാളികൾക്ക് മാത്രമല്ല, വിവിധ ഭാഷാ-സംസ്ഥാനങ്ങളിൽ നിന്നുള്ളവർക്കും കേരളത്തിന്റെ സംസ്കാരവും പാരമ്പര്യവും പരിചയപ്പെടുത്തുന്ന തരത്തിലാണ് ഓണം ഓപ്പുലൻസ് ഒരുക്കിയിരിക്കുന്നത്. അന്യഭാഷക്കാരുടെ വലിയ പങ്കാളിത്തമാണ് വർഷങ്ങളായി ഈ ആഘോഷത്തിന്റെ പ്രധാന സവിശേഷതകളിലൊന്ന്.
25-ാം വർഷത്തിൽ സീവുഡ്സ് മലയാളി സമാജം
25-ാം വാർഷികത്തിന്റെ നിറവിലാണ് സീവുഡ്സ് മലയാളി സമാജം. ഓണം ഓപ്പുലൻസിന്റെ എട്ടാം പതിപ്പാണ് ഇത്തവണ അരങ്ങേറുന്നത്.
ജാതി, മതം, ഭാഷ, ദേശം, തൊഴിൽ, സംഘടന തുടങ്ങിയ വ്യത്യാസങ്ങൾക്കതീതമായി സമൂഹത്തെ ഒരുമിപ്പിക്കുന്ന പ്രവർത്തനങ്ങളാണ് സമാജം വർഷങ്ങളായി നടത്തിവരുന്നത്. മുംബൈയിലെ ഓണാഘോഷങ്ങളിൽ ശ്രദ്ധേയമായ സാന്നിധ്യമായി മാറിയ ഓണം ഓപ്പുലൻസ്, അന്യസംസ്ഥാനക്കാരുടെ പങ്കാളിത്തത്തിന്റെ കാര്യത്തിലും ശ്രദ്ധേയമാണ്.
പ്രളയകാലത്ത് കേരളത്തിന് കൈത്താങ്ങാകുന്നതിനായി സീവുഡ്സ് മാളിൽ ഭീമൻ പൂക്കളം ഒരുക്കി നടത്തിയ പ്രവർത്തനങ്ങളും സമാജത്തിന്റെ സാമൂഹിക ഇടപെടലുകളുടെ ഭാഗമായിരുന്നു.
ഓഗസ്റ്റ് 23 വരെ പൂക്കളം പ്രദർശനത്തിന്
ഓഗസ്റ്റ് 22ന് രാവിലെ 10.30 മുതൽ ഓഗസ്റ്റ് 23ന് രാത്രി 10.30 വരെ ഭീമൻ പൂക്കളം പൊതുജനങ്ങൾക്ക് കാണാനാകും.
സാമൂഹിക മാധ്യമങ്ങളിലും വലിയ ശ്രദ്ധ നേടുന്ന ഓണം ഓപ്പുലൻസ്, മുംബൈയിലെ ഏറ്റവും കൂടുതൽ സോഷ്യൽ മീഡിയ റീലുകൾക്ക് വേദിയാകുന്ന ഓണാഘോഷങ്ങളിലൊന്നായി മാറിയിട്ടുണ്ട്.
കേരളത്തിന്റെ പാരമ്പര്യവും കലയും ആഘോഷവും മുംബൈയുടെ മണ്ണിൽ അവതരിപ്പിക്കുന്ന ‘ഓണം ഓപ്പുലൻസ് 2026’ സീവുഡ്സിൽ ഓണത്തിന്റെ വർണവിസ്മയം തീർക്കും.
കൂടുതൽ വിവരങ്ങൾക്ക്:
രഘു നന്ദനൻ: 9967031989
പി. ജി. ആർ. നായർ: 90044 70324
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി
AMCHI MUMBAI
Every Saturday | 4:30 PM
Kairali News
