കല്യാൺ: കല്യാൺ സെൻട്രൽ കൈരളി സമാജത്തിന്റെ (KCKS) നേതൃത്വത്തിൽ വിപുലമായ ഓണാഘോഷം സെപ്റ്റംബർ 6 ഞായറാഴ്ച സംഘടിപ്പിക്കും. രാവിലെ 9 മണിക്ക് ആഘോഷ പരിപാടികൾക്ക് തിരിതെളിയും. സമാജം പ്രസിഡന്റ് പോൾ പറപ്പിള്ളിയുടെ അദ്ധ്യക്ഷതയിൽ ചേരുന്ന സാംസ്കാരിക സമ്മേളനത്തിൽ സിനിമാ-ടെലിവിഷൻ താരം അനീഷ് രവി മുഖ്യാതിഥിയായി പങ്കെടുക്കും.
കെയർ 4 മുംബൈ പ്രസിഡന്റ് എം കെ നവാസ്, ജനറൽ സെക്രട്ടറി പ്രിയ വർഗീസ് കൂടാതെ സാമൂഹിക പ്രവർത്തകൻ സി പി ബാബു, ആംചി മുംബൈ ഡയറക്ടർ പ്രേംലാൽ, തുടങ്ങിയവർ പങ്കെടുക്കും.
കേരളീയ തനിമയും ഓണത്തിന്റെ പാരമ്പര്യവും ഒത്തുചേർന്ന ആഘോഷത്തിനാണ് സമാജം ഒരുക്കം പൂർത്തിയാക്കുന്നത്. വിവിധ കലാപരിപാടികൾ, വടംവലി ഉൾപ്പെടെയുള്ള ഓണക്കളികൾ, പരമ്പരാഗത ഓണാഘോഷ പരിപാടികൾ എന്നിവ ആഘോഷത്തിന്റെ ഭാഗമായി അരങ്ങേറും.
രാവിലെ ആരംഭിക്കുന്ന വേദി പരിപാടികൾ ഉച്ചയ്ക്ക് ഒന്നിന് മുമ്പായി പൂർത്തിയാക്കുന്ന രീതിയിലാണ് ക്രമീകരിച്ചിരിക്കുന്നത്. തുടർന്ന് വിഭവസമൃദ്ധമായ ഓണസദ്യ ഒരുക്കും.
സമാജത്തിലെ അംഗങ്ങളെയും കുടുംബങ്ങളെയും ഉൾപ്പെടുത്തി വിപുലമായ പങ്കാളിത്തത്തോടെയാണ് പരിപാടി സംഘടിപ്പിക്കുന്നത്. മലയാളികളുടെ കലാ-സാംസ്കാരിക പൈതൃകം പുതുതലമുറയിലേക്ക് പകരുന്നതിനും കൂട്ടായ്മയുടെ സന്ദേശം ശക്തിപ്പെടുത്തുന്നതിനുമുള്ള വേദിയാകും ഓണാഘോഷമെന്ന് സംഘാടകർ അറിയിച്ചു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI | Every Saturday | 4:30 PM | Kairali News
