കല്യാൺ: മലയാളി കുടുംബങ്ങളുടെ കൂട്ടായ്മയും കലാ-സാംസ്കാരിക വൈവിധ്യവും വിളിച്ചോതിക്കൊണ്ട് കല്യാൺ സെൻട്രൽ കൈരളി സമാജത്തിന്റെ 15-ാമത് ഓണാഘോഷം സംഘടിപ്പിച്ചു. സെപ്റ്റംബർ 6-ന് ഡോൺ ബോസ്കോ ഹൈസ്കൂൾ ഓഡിറ്റോറിയത്തിൽ നടന്ന ആഘോഷത്തിൽ സമാജം കുടുംബാംഗങ്ങളും കുട്ടികളും അവതരിപ്പിച്ച വിവിധ കലാപരിപാടികൾ ശ്രദ്ധേയമായി.
ഓണം ഒരുമയുടെയും സഹോദര്യത്തിന്റെയും ആഘോഷമാണെന്നും നാടിന്റെ നന്മയും സംസ്കാരവും പൈതൃകവും പുതിയ തലമുറയിലേക്ക് പകരുന്നതിൽ പ്രവാസി മലയാളികളുടെ ഓണാഘോഷങ്ങൾക്ക് വലിയ പങ്കുണ്ടെന്നും പ്രശസ്ത സിനിമ-ടെലിവിഷൻ താരം അനീഷ് രവി പറഞ്ഞു. പ്രവാസി മലയാളികളുടെ ഇത്തരം കൂട്ടായ്മകൾ സംഘടനാ പ്രവർത്തനങ്ങൾക്ക് കൂടുതൽ കരുത്തേകുന്നതായും അദ്ദേഹം അഭിപ്രായപ്പെട്ടു.
സ്വതസിദ്ധമായ നർമ്മവും നാടൻപാട്ടുകളും കവിതയും കലർന്ന അവതരണത്തിലൂടെ അനീഷ് രവി സദസ്സിനെ ആവേശത്തിലാക്കി. അദ്ദേഹത്തിന്റെ ഇടപെടലുകളും കലാപ്രകടനങ്ങളും പരിപാടിക്ക് വേറിട്ട ഉണർവ് നൽകി.
സമാജം കുടുംബാംഗങ്ങൾ അവതരിപ്പിച്ച തിരുവാതിര, പിന്നൽ തിരുവാതിര, ഒപ്പന തുടങ്ങിയ കലാപരിപാടികൾ ആഘോഷത്തിന് മിഴിവേകി. പുരുഷന്മാർ അവതരിപ്പിച്ച ഒപ്പനയും വടംവലി മത്സരവും സദസ്സിൽ ആവേശമുണർത്തി. കുട്ടികളും മുതിർന്നവരും ഉൾപ്പെടെ നിരവധി പേർ പങ്കെടുത്ത വിവിധ കലാപരിപാടികൾ ഓണാഘോഷത്തെ കൂടുതൽ വർണാഭമാക്കി.
പ്രത്യേകമായി ഒരുക്കിയ ‘The Rhythm of Homeland’ എന്ന കലാവതരണവും പരിപാടിയുടെ ശ്രദ്ധേയ ആകർഷണമായി. നാടിന്റെ തനത് കലാ-സാംസ്കാരിക പാരമ്പര്യത്തിന്റെ താളവും ഓർമകളും വേദിയിൽ അവതരിപ്പിച്ച ഈ പരിപാടി കാണികളുടെ ശ്രദ്ധ നേടി. Watch Highlights of the event in Amchi Mumbai
സമാജം പ്രസിഡന്റ് പോൾ പറപ്പിള്ളി അധ്യക്ഷത വഹിച്ച സാംസ്കാരിക സമ്മേളനത്തിൽ കെയർ ഫോർ മുംബൈ പ്രസിഡന്റ് എം. കെ. നവാസ്, സെക്രട്ടറി പ്രിയ വർഗീസ്, ആംചി മുംബൈ ഡയറക്ടർ പ്രേംലാൽ, സാമൂഹിക പ്രവർത്തകൻ സി. പി. ബാബു തുടങ്ങിയവർ വേദി പങ്കിട്ടു.
കൃഷ്ണസ്വാമി സ്വാഗതവും സേതുമാധവൻ നന്ദിയും പറഞ്ഞു. സമാജം അംഗങ്ങളുടെയും കുടുംബങ്ങളുടെയും സജീവ പങ്കാളിത്തത്തോടെ നടന്ന ഓണാഘോഷം കല്യാണിലെ മലയാളി സമൂഹത്തിന്റെ കൂട്ടായ്മയുടെയും സാംസ്കാരിക ഐക്യത്തിന്റെയും ശ്രദ്ധേയമായ വേദിയായി മാറി.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI | Every Saturday | 4:30 PM | Kairali News
