മുംബൈയിലെ അതിശക്തമായ ചൂട് ജനജീവിതം ദുസ്സഹമാക്കുമ്പോഴാണ് നന്മയുടെ കൈയ്യൊപ്പ് പതിഞ്ഞ റമദാൻ കിറ്റുകൾ വിതരണം ചെയ്ത് കെയർ 4 മുംബൈ ഇക്കുറിയും മാതൃകയായത്. KMA യുമായി സഹകരിച്ചു കൊണ്ട് തുർബെയിലാണ് ആദ്യഘട്ട രമദാൻ കിറ്റ് വിതരണം നടത്തിയത്.
കെയർ 4 മുംബൈയുടെ സഹായം നിരവധി നിരാലംബർക്കും ദരിദ്രർക്കും വലിയൊരു ആശ്വാസമായി. “നോമ്പ് കാലത്ത് നടത്തുന്ന ഇഫ്താർ കിറ്റുകളുടെ വിതരണം വലിയ പുണ്യ പ്രവർത്തിയാണെന്ന് കെയർ ഫോർ മുംബൈയുടെ സേവനത്തെ പ്രകീർത്തിച്ച്, KMA യെ പ്രതിനിധീകരിച്ച് സാമൂഹിക പ്രവർത്തകനായ ഡോ ഷെരീഫ് പറഞ്ഞു.
അതാത് പ്രദേശത്തെ സാമൂഹിക പ്രവർത്തകരും സന്നദ്ധ സംഘടനകളുമായി കൈകോർത്താണ് അർഹിക്കുന്നവരെ കണ്ടെത്തി കിറ്റുകൾ വിതരണം ചെയ്യുന്നതെന്ന് കെയർ ഫോർ മുബൈ സെക്രട്ടറി പ്രിയ വർഗീസ് പറഞ്ഞു.
രമദാനിനോടനുബന്ധിച്ച് ഉപവാസം പാലിക്കുന്ന നിരാലംബരും താഴ്ന്ന വരുമാനക്കാരുമാണ് മുംബൈയുടെ വിവിധ ഭാഗങ്ങളിൽ നടന്ന വിതരണത്തിന്റെ ഗുണഭോക്താക്കൾ.
കെയർ ഫോർ മുംബൈ പ്രതിനിധികളായ പ്രേംലാൽ, അലി മുഹമ്മദ്, സതീഷ് കുമാർ, അരുൺ, സിന്ധു, KMA പ്രതിനിധികളായ ഡോ ഷെരീഫ്, CTK അബ്ദുള്ള, ഷിഹാബുദ്ദീൻ തുടങ്ങിയവർ ചേർന്നാണ് വിതരണത്തിന്റെ ഏകോപനം നിർവഹിച്ചത്.
