ലോക മലയാളി കൌൺസിലിന്റെ (ഡബ്ല്യുഎംസി) 14-ാമത് ദ്വിവത്സര സമ്മേളനം തായ്ലൻഡിലെ ബാങ്കോക്കിൽ സമാപിച്ചു. മലയാളികളുടെ മനം കവർന്ന കവി മുരുകൻ കാട്ടാക്കട, കോൺഗ്രസ് നേതാവ് കെ മുരളീധരൻ, നടി സോനാ നായർ തുടങ്ങിയവർ സംബന്ധിച്ചു.

ലോകത്തിന്റെ വിവിധ ഭാഗങ്ങളിൽ നിന്നുള്ള 500ലധികം പ്രതിനിധികൾ പരിപാടിയിൽ പങ്കെടുത്തു. – തോമസ് മൊട്ടയ്ക്കൽ, ഡോ. ബാബു സ്റ്റീഫൻ, ദിനേശ് നായർ, ഷാജി മാത്യു, കണ്ണട്ട് സുരേന്ദ്രൻ, അജോയ്, സണ്ണി വേലിയത്ത്സ ജിത് എന്നിവരുടെ നേതൃത്വത്തിലുള്ള സംഘമാണ് കോൺഫറൻസ് ആസൂത്രണം ചെയ്ത് നടപ്പാക്കിയത്.

ഐക്യം, പൈതൃകം, ആഗോള കൂട്ടായ്മ എന്നിവയുടെ ആഘോഷമായിരുന്നു സമ്മേളനമെന്ന് ദിനേശ് നായർ പറഞ്ഞു. സമ്മേളനത്തിന്റെ സംഘടന മികവിനെ തോമസ് മൊട്ടയ്ക്കൽ പ്രകീർത്തിച്ചു. കോൺഫറൻസ് അർത്ഥവത്തായ സൗഹൃദത്തിനുള്ള മികച്ച വേദിയായിരുന്നുവെന്ന് ബാബു സ്റ്റീഫൻ വ്യക്തമാക്കി.

കോൺഫറൻസിൽ പങ്കെടുത്ത പ്രതിനിധികൾക്ക് ഡബ്ല്യുഎംസി ഗ്ലോബൽ കോൺഫറൻസ് ജനറൽ കൺവീനർ അജോയ് കല്ലൻകുന്നിൽ നന്ദി പ്രകാശിപ്പിച്ചു.

ഡോ. ബാബു സ്റ്റീഫൻ ഡബ്ല്യുഎംസിയുടെ പുതിയ പ്രസിഡന്റായി ചുമതലയേറ്റു, ചെയർമാനായി തോമസ് മൊട്ടയ്ക്കലും. ഷാജി മാത്യു സെക്രട്ടറി ജനറലായും ട്രഷററായി സണ്ണി വേലിയത്തും സ്ഥാനമേറ്റു. നിലവിലെ ഗ്ലോബൽ സെക്രട്ടറി ജനറൽ ദിനേശ് നായർ ഗ്ലോബൽ വൈസ് ചെയർമാൻ ആയി തുടരും.

ലോക മലയാളി കൌൺസിലിന്റെ 14-ാമത് ദ്വിവത്സര സമ്മേളനം സംഘടനയ്ക്കുള്ളിൽ ആഗോള ഏകോപനത്തിനും സാംസ്കാരിക നയതന്ത്രത്തിനും പുതിയ മാനദണ്ഡം സ്ഥാപിച്ചു. സമ്പന്നമായ സാംസ്കാരിക പൈതൃകവും ശക്തമായ സമൂഹബോധവും ലോകമെമ്പാടുമുള്ള മലയാളികളുടെ ജീവിതത്തിൽ സ്വാധീനം ചെലുത്തുന്നത് ഡബ്ല്യുഎംസി തുടരുമെന്ന് ദിനേശ് നായർ പറഞ്ഞു. .

ലോകമെമ്പാടുമുള്ള മലയാളികളെ പിന്തുണയ്ക്കുന്നതിനുള്ള പ്രതിബദ്ധത ഉയർത്തിക്കാട്ടിക്കൊണ്ട് ലോക മലയാളി കൌൺസിൽ (ഡബ്ല്യുഎംസി) നിരവധി പ്രഖ്യാപനങ്ങൾ നടത്തി.

മുംബൈയിൽ നിന്നും കെ കെ നമ്പ്യാർ, പോൾ പറപ്പിള്ളി, എം കെ നവാസ്, ഗോകുൽദാസ് മാധവൻ, ഗിരീഷ് കുമാർ ഗോപാലൻ, രത്‌നകുമാർ തുടങ്ങിയവർ പങ്കെടുത്തു.

ഗ്ലോബൽ ഓഫീസ് 2025 ഓഗസ്റ്റ് 3 ന് കൊച്ചിയിൽ ഉദ്ഘാടനം ചെയ്യും. ഈ മേഖലയിലെ ഡബ്ല്യുഎംസിയുടെ പ്രവർത്തനങ്ങളുടെ കേന്ദ്രമായി ഓഫീസ് പ്രവർത്തിക്കും. നഴ്സിംഗ് വിദ്യാർത്ഥികൾക്കുള്ള സ്കോളർഷിപ്പ് ഏർപ്പെടുത്തും. കേരളത്തിലെ 14 ജില്ലകളിൽ നിന്നുള്ള 100 വിദ്യാർത്ഥികൾക്ക് ആദ്യ ഘട്ടത്തിൽ സ്കോളർഷിപ്പ് ലഭിക്കും. വിശദമായ അപേക്ഷാ നടപടിക്രമങ്ങളും യോഗ്യതാ മാനദണ്ഡങ്ങളും ഉടൻ പ്രഖ്യാപിക്കുമെന്ന് സെക്രട്ടറി ജനറൽ ഷാജി മാത്യു പറഞ്ഞു.

അടുത്ത ഗ്ലോബൽ കോൺഫറൻസ് അമേരിക്കയിൽ നടക്കുമെന്ന് ഗ്ലോബൽ വൈസ് പ്രസിഡന്റ് അഡ്മിനിസ്ട്രേഷൻ ജെയിംസ് കൂടൽ പറഞ്ഞു. വിദ്യാഭ്യാസം, സാംസ്കാരിക സംരക്ഷണം, സാമൂഹിക വികസനം എന്നിവയിലൂടെ ആഗോളതലത്തിൽ മലയാളികളെ പിന്തുണയ്ക്കുകയാണ് ഡബ്ല്യുഎംസിയുടെ സംരംഭങ്ങൾ ലക്ഷ്യമിടുന്നത്.