മലയാളി ചേംബർ ഓഫ് കൊമേഴ്സ് ആൻഡ് ഇൻഡസ്ട്രി (എംസിഒസി) സംഘടിപ്പിച്ച ബിസിനസ് ഫാമിലി മീറ്റ് ഡിസംബർ 15ന് നവി മുംബൈ ശിക്കാര ഹോട്ടലിലെ റീഗൽ ഹാളിൽ നടന്നു. ചേംബർ അംഗങ്ങൾക്കൊപ്പം നിരവധി പ്രമുഖ മലയാളി ബിസിനസ് വ്യക്തികളും ചടങ്ങിൽ പങ്കെടുത്തു.
ചേംബറിന്റെ ഭാവി പ്രവർത്തനങ്ങൾ, ബിസിനസ് സമൂഹത്തിന്റെ ആവശ്യങ്ങൾ, സംഘടനയിൽ നിന്നുള്ള പ്രതീക്ഷകൾ എന്നിവയെക്കുറിച്ച് അംഗങ്ങൾ വിലപ്പെട്ട അഭിപ്രായങ്ങളും നിർദേശങ്ങളും പങ്കുവെച്ചു. എംസിഒസി ബിസിനസ് സമൂഹത്തിനായി കൂടുതൽ ഫലപ്രദമായി പ്രവർത്തിക്കേണ്ടതിന്റെ ആവശ്യകതയും സദസ്സിൽ ഉയർന്നു.
ചേംബറിന്റെ ജനറൽ ഡയറക്ടർ ബാലസുബ്രഹ്മണ്യൻ, സംഘടനയുടെ ലക്ഷ്യങ്ങൾ, അടുത്ത വർഷത്തെ പ്രവർത്തന പദ്ധതി, ഇതുവരെ കൈവരിച്ച നേട്ടങ്ങൾ, മലയാളി ബിസിനസ് സമൂഹത്തെ പിന്തുണയ്ക്കുന്നതിനുള്ള തന്ത്രങ്ങൾ എന്നിവ ഉൾപ്പെടുത്തി ഒരു സംക്ഷിപ്ത അവതരണം നടത്തി.
ബാബു ജോർജ്, ഡോ. പി.വി. മത്തായി, ജോൺ മാത്യു എന്നിവർ സംഘടനയുടെ വളർച്ചയ്ക്കാവശ്യമായ നിർണായക വിഷയങ്ങൾ ചൂണ്ടിക്കാട്ടി. ചടങ്ങിൽ മോഹൻ കണ്ടത്തിൽ സ്വാഗതം ആശംസിച്ചു. ട്രഷറർ കോമളൻ ഗംഗാധരൻ നന്ദി രേഖപ്പെടുത്തി.
ബിസിനസ് ബന്ധങ്ങൾ ശക്തിപ്പെടുത്താനും മലയാളി സംരംഭകരെ ഒരുമിപ്പിക്കാനും ലക്ഷ്യമിട്ട ഈ ബിസിനസ് ഫാമിലി മീറ്റ്, എംസിഒസിയുടെ ഭാവി പ്രവർത്തനങ്ങൾക്ക് ശക്തമായ അടിത്തറയാകുമെന്ന് പങ്കെടുത്ത പ്രമുഖർ അഭിപ്രായപ്പെട്ടു.
