മുംബൈ: അടിയന്തരമായി കണ്ണ് ശസ്ത്രക്രിയയ്ക്ക് സാമ്പത്തിക സഹായം ആവശ്യമായിരുന്ന അസുഖബാധിതയായ ഒരു സ്ത്രീക്ക് മണിക്കൂറുകൾക്കകം ആവശ്യമായ തുക സമാഹരിച്ച് എഐകെഎംസിസി മഹാരാഷ്ട്ര മാതൃകാപരമായ സേവന പ്രവർത്തനം നടത്തി.
2026 ഓഗസ്റ്റ് 4-ന് ഉച്ചയ്ക്ക് രണ്ടുമണിയോടെയാണ് താൻ എഐകെഎംസിസി അംഗമാണെന്നും, ദീർഘകാലമായി അസുഖബാധിതയാണെന്നും, ഓഗസ്റ്റ് 5-ന് ഇരുകണ്ണുകളുടെയും ശസ്ത്രക്രിയ നിശ്ചയിച്ചിരിക്കുന്നതിനാൽ അടിയന്തര സാമ്പത്തിക സഹായം ആവശ്യമാണെന്നും അറിയിച്ച് വനിത സംഘടനാ നേതൃത്വത്തെ സമീപിച്ചത്.
തുടർന്ന് അവർ സാക്കിനാക്ക സ്വദേശിയാണെന്ന് മനസ്സിലാക്കിയതോടെ സാക്കിനാക്ക എഐകെഎംസിസി പ്രസിഡന്റ് വി. കെ. റഫീഖിനെ വിവരങ്ങൾ അന്വേഷിക്കാൻ ചുമതലപ്പെടുത്തി. പരിശോധനയിൽ സഹായത്തിന് അർഹയായ വ്യക്തിയാണെന്ന് സ്ഥിരീകരിച്ചതിനെ തുടർന്ന് മുംബൈ സബർബൻ എഐകെഎംസിസി പ്രസിഡന്റ് ഫിറോസ് സാഹിബിന് തുടർനടപടികൾ സ്വീകരിക്കാൻ നിർദേശം നൽകി.
മുംബൈ സബർബൻ എഐകെഎംസിസിയുടെ നേതൃത്വത്തിൽ ഉടൻതന്നെ ചികിത്സാസഹായ സമാഹരണത്തിന് തുടക്കമായി. സംസ്ഥാന കമ്മിറ്റി ഭാരവാഹികളുടെയും പ്രവർത്തകരുടെയും ആത്മാർഥമായ ഇടപെടലിന്റെ ഫലമായി, ഓഗസ്റ്റ് 5-ന് രാവിലെ 10 മണിക്കുമുമ്പ് തന്നെ ശസ്ത്രക്രിയയ്ക്ക് ആവശ്യമായ മുഴുവൻ തുകയും സമാഹരിക്കാൻ കഴിഞ്ഞു.
വ്യക്തിപരമായ അഭ്യർഥനകളോ ഫോൺവിളികളോ ഇല്ലാതെ, വാട്സ്ആപ്പ് ഗ്രൂപ്പിൽ പങ്കുവെച്ച സന്ദേശം കണ്ടതുമാത്രം സഹായഹസ്തവുമായി മുന്നോട്ടുവന്ന എല്ലാ നേതാക്കളെയും പ്രവർത്തകരെയും എഐകെഎംസിസി മഹാരാഷ്ട്ര പ്രസിഡന്റ് അസീസ് മാണിയൂർ അഭിനന്ദിച്ചു.
സമയോചിതമായ ഇടപെടലും കൂട്ടായ പ്രവർത്തനവും ജീവകാരുണ്യ പ്രവർത്തനങ്ങൾക്ക് പുതിയ മാതൃകയാണെന്ന് സംഘടനാ നേതാക്കൾ അഭിപ്രായപ്പെട്ടു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | EVERY SATURDAY 4.30 P.M. | KAIRALI NEWS
