മുംബൈ: എസ്.എൻ.ഡി.പി യോഗം മുംബൈ താനെ യൂണിയന്റെ പേരിൽ വ്യാജ ലെറ്റർപാഡും മുദ്രയും ഉപയോഗിച്ച് ഗുരുജയന്തി ആഘോഷവുമായി ബന്ധപ്പെട്ട് നോട്ടീസ് പ്രചരിപ്പിച്ചതായി യൂണിയൻ.
താനെ യൂണിയൻ, ശാഖാ യോഗങ്ങൾ, വനിതാ സംഘം, പോഷക സംഘടനകൾ എന്നിവ സംയുക്തമായി സംഘടിപ്പിക്കുന്ന 172-ാമത് ശ്രീനാരായണ ഗുരുജയന്തി ആഘോഷം സെപ്റ്റംബർ 6ന് ഡോംബിവലിയിലെ പാട്ടീദാർ ഭവനിൽ നടക്കുമെന്ന് യൂണിയൻ അറിയിച്ചു.
അതേസമയം, ഓഗസ്റ്റ് 16ന് നവിമുംബൈയിൽ ഗുരുജയന്തി ആഘോഷ കമ്മിറ്റി രൂപീകരിക്കുന്നതിനായി വിളിച്ച യോഗത്തിന് യൂണിയന്റെ അംഗീകാരമോ ബന്ധമോ ഇല്ലെന്നും ഭാരവാഹികളെ അറിയിച്ചു.
സംഘടനാ സംവിധാനത്തിന് വിരുദ്ധമായ സമാന്തര പ്രവർത്തനങ്ങൾ ഒഴിവാക്കണമെന്നും യൂണിയന്റെ യശസ്സിന് കോട്ടം വരുത്തുന്ന നടപടികളെ നിരുത്സാഹപ്പെടുത്തണമെന്നും ശാഖാ യോഗ, വനിതാ സംഘം, പോഷക സംഘടനാ ഭാരവാഹികളോടും പ്രവർത്തകരോടും യൂണിയൻ അഭ്യർഥിച്ചു.
യൂണിയൻ സെക്രട്ടറി ബിനു സുരേന്ദ്രനാണ് സർക്കുലർ പുറത്തിറക്കിയത്.
