നവി മുംബൈ: ന്യൂ ബോംബെ കൾച്ചറൽ സെന്ററിന്റെ (NBCC) ആഭിമുഖ്യത്തിൽ വിപുലമായ ഓണാഘോഷ പരിപാടികൾക്ക് കോപർഖൈർനെയിൽ ഒരുക്കങ്ങൾ പൂർത്തിയായി. സെപ്റ്റംബർ 19, 20 തീയതികളിലായി വിവിധ പരിപാടികളോടെയാണ് ‘ഓണം 2026’ സംഘടിപ്പിക്കുന്നത്.
സെപ്റ്റംബർ 19 ശനിയാഴ്ച വൈകിട്ട് 4.30ന് കോപർഖൈർനെ സെക്ടർ 2Aയിൽ നിന്ന് ഓണഘോഷയാത്ര ആരംഭിക്കും. ശിങ്കാരി മേളം, പുലിക്കളി, മാവേലി, കഥകളി, മോഹിനിയാട്ടം തുടങ്ങിയ കേരളീയ കലാരൂപങ്ങളുടെ അകമ്പടിയോടെയാണ് ഘോഷയാത്ര സംഘടിപ്പിക്കുന്നത്.
സെപ്റ്റംബർ 20 ഞായറാഴ്ച രാവിലെ 10 മണി മുതൽ NBCC സമാജം ഹാളിലാണ് പ്രധാന ഓണാഘോഷ പരിപാടികൾ നടക്കുക. അംഗങ്ങളും കുടുംബാംഗങ്ങളും അവതരിപ്പിക്കുന്ന വിവിധ കലാപരിപാടികൾ ആഘോഷത്തിന്റെ ഭാഗമായി അരങ്ങേറും. തുടർന്ന് പരമ്പരാഗത ഓണസദ്യയും ഒരുക്കിയിട്ടുണ്ട്.
1992ൽ സ്ഥാപിതമായ ന്യൂ ബോംബെ കൾച്ചറൽ സെന്റർ കലാ-സാംസ്കാരിക, കായിക പ്രവർത്തനങ്ങൾക്കൊപ്പം ദേശീയോദ്ഗ്രഥനം, മതസൗഹാർദം, സാമൂഹിക ഐക്യം എന്നിവ പ്രോത്സാഹിപ്പിക്കുന്ന പ്രവർത്തനങ്ങളും നടത്തിവരുന്ന സംഘടനയാണ്. സാമ്പത്തികമായി പിന്നാക്കം നിൽക്കുന്നവർക്ക് മെഡിക്കൽ സഹായവും പഠനോപകരണങ്ങളും നൽകുന്നതിന് പുറമെ വനിതാ ശാക്തീകരണം, യുവാക്കൾക്കുള്ള കരിയർ ഗൈഡൻസ്, വ്യക്തിത്വ വികസനം തുടങ്ങിയ മേഖലകളിലും സംഘടന പ്രവർത്തിക്കുന്നു.
ഭാഷ, സംഗീതം, വിവിധ നൃത്തരൂപങ്ങൾ, കരാട്ടെ, യോഗ തുടങ്ങിയ പരിശീലന പരിപാടികളും NBCCയുടെ നേതൃത്വത്തിൽ നടത്തിവരുന്നുണ്ട്. സമൂഹത്തിന്റെ വിവിധ വിഭാഗങ്ങളെ ഒരുമിപ്പിക്കുന്ന സാംസ്കാരിക വേദി എന്ന നിലയിലും സംഘടന ശ്രദ്ധേയമാണ്.
കേരളത്തിന്റെ തനത് കലാരൂപങ്ങളും ഓണത്തിന്റെ പാരമ്പര്യവും നവി മുംബൈയിലെ പൊതുസമൂഹത്തിന് മുന്നിൽ അവതരിപ്പിക്കുന്ന തരത്തിലാണ് ഇത്തവണത്തെ ആഘോഷ പരിപാടികൾ ആസൂത്രണം ചെയ്തിരിക്കുന്നത്.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI | Every Saturday | 4:30 PM | Kairali News
