തീയേറ്ററില് വിജയകരമായി ഓടിക്കൊണ്ടിരിക്കുന്ന മോഹൻലാൽ ചിത്രം ‘തുടരും’ ഒടിടി റിലീസ് പ്രഖ്യാപിച്ചു. കേരളത്തിൽ നിന്ന് മാത്രം 100 കോടി കളക്ഷൻ നേടിയ ചിത്രം ഇതിനകം 250 കോടിയോളമാണ് ആഗോള കളക്ഷൻ രേഖപ്പെടുത്തിയത്. മോഹൻലാലിൻറെ സമീപകാലത്തെ ഏറ്റവും വലിയ പണം വാരി പടമായി ഈ ചിത്രം മാറിയതോടെ തീയേറ്റർ ഉടമകളാണ് ഹാപ്പിയായത്. എംമ്പുരാൻ കളക്ഷനിൽ മുന്നിലാണെങ്കിലും നിർമ്മാണ ചിലവ് തിരിച്ച് പിടിക്കാനാകുമോ എന്നതിൽ സംശമുണ്ടെന്നാണ് അടുത്ത വൃത്തങ്ങൾ പറയുന്നത്. ഇതിന് മുൻപ് പുറത്തിറങ്ങിയ ബാരോസ് ബോക്സ് ഓഫീസിൽ തകർന്ന് വീണതോടെ മോഹൻലാലിന് പുത്തനുണർവാണ് കഴിഞ്ഞ രണ്ടു ചിത്രങ്ങളും സമ്മാനിച്ചത്.
മോഹന്ലാല് ആരാധകര് കാത്തിരുന്ന ‘തുടരും’ ഒടിടി റിലീസ് ഡേറ്റ് ജിയോഹോട്സ്റ്റാറാണ് പുറത്തുവിട്ടത്.
മേയ് 30-ന് ‘തുടരും’ ജിയോഹോട്സ്റ്റാറില് സ്ട്രീമിങ് ആരംഭിക്കും. തീയേറ്ററില് പ്രദര്ശനത്തിനെത്തി ഒരുമാസം പിന്നിട്ട ശേഷമാണ് ചിത്രം ഒടിടിയില് എത്തുന്നത്. ഏപ്രില് 25-നായിരുന്നു തരുണ് മൂര്ത്തി സംവിധാനംചെയ്ത ചിത്രം തീയേറ്ററുകളില് റിലീസ് ചെയ്തത്.
ഇതിനകം സമൂഹ മാധ്യമങ്ങളിൽ തരംഗമായ ചിത്രത്തിലെ പ്രമോ സോങ്ങിന്റെ പൂർണ രൂപം ഒടിടി പതിപ്പിൽ ഉണ്ടാകുമോയെന്നാണ് ആരാധകരുടെ ആകാംക്ഷ.
