ബോളിവുഡ് നടൻ ധർമ്മേന്ദ്രയെ ശ്വാസകോശ തടസ്സത്തെ തുടർന്നാണ് ആശുപത്രിയിൽ പ്രവേശിപ്പിച്ചത്. 89 വയസ്സുള്ള നടന്റെ ആരോഗ്യസ്ഥിതി ഗുരുതരമാണെന്ന റിപ്പോർട്ടുകളാണ് പുറത്ത് വരുന്നത്. അതേസമയം, നടൻ ചികിത്സയോട് പ്രതികരിക്കുന്നുണ്ടെന്നാണ് ഒടുവിൽ ലഭിക്കുന്ന വിവരം. നടന്റെ ആരോഗ്യസ്ഥിതിയെക്കുറിച്ച് ആരാധകരിൽ വലിയ ആശങ്ക സൃഷ്ടിച്ചിട്ടുണ്ട്. ധർമ്മേന്ദ്രയുടെ പത്നി ഹേമാ മാലിനി, മകൻ സണ്ണി ഡിയോൾ, കൂടാതെ സൽമാൻ ഖാൻ തുടങ്ങിയ ബോളിവുഡ് താരങ്ങൾ ആശുപത്രിയിലെത്തി നടനെ സന്ദർശിച്ചു.
മുംബൈയിലെ ബ്രീച്ച് കാൻഡി ആശുപത്രിയിലെ ഡോക്ടർമാരുടെ സൂക്ഷ്മ നിരീക്ഷണത്തിൽ കഴിയുന്ന നടൻ തീവ്രപരിചരണ വിഭാഗത്തിൽ (ഐസിയു) വെന്റിലേറ്റർ സഹായത്തിലാണെന്ന് അടുത്ത വൃത്തങ്ങൾ അറിയിച്ചു. നടന്റെ കുടുംബം ഇതുവരെ ഇക്കാര്യം സ്ഥിരീകരിച്ചിട്ടില്ല.
മുംബൈയിലെ ബ്രീച്ച് കാൻഡി ആശുപത്രിയിൽ സീനിയർ കാർഡിയോളജിസ്റ്റ് ഡോ. ദേവ് പഹ്ലജാനിയുടെ പരിചരണത്തിലാണ് ധർമ്മേന്ദ്ര.
