കേരളീയ സമാജം ഡോംബിവ്ലി (KSD) ഏർപ്പെടുത്തുന്ന “KSD തുഞ്ചൻ സ്മാരക പുരസ്കാരം” ഈ വർഷം മഹാരാഷ്ട്രയിൽ സ്ഥിരതാമസമാക്കിയ മലയാളി എഴുത്തുകാരിൽ നിന്നുള്ള രചനകൾക്കായിരിക്കും എന്ന് ഭരണസമിതി അറിയിച്ചു.
മികച്ച നോവലിനാണ് ഈ വർഷം പുരസ്കാരം നൽകുന്നത്. ഇതിലേക്ക് 2022, 23, 24, 25 വർഷങ്ങളിൽ ആദ്യപതിപ്പായി പ്രസിദ്ധീകരിക്കപ്പെട്ട നോവലുകളുടെ 3 കോപ്പികൾ മെയ് 20-ന് മുമ്പായി താഴെ കൊടുത്തിരിക്കുന്ന മേൽവിലാസത്തിൽ അയക്കേണ്ടതാണ്.
ഒരാളുടെ ഒരു രചന മാത്രമേ പുരസ്കാരത്തിനായി പരിഗണിക്കുകയുള്ളൂ.
25,000 രൂപയും പ്രശസ്തി പത്രവും ഫലകവുമാണ് പുരസ്കാരം.
കഴിഞ്ഞ വർഷം എം. മുകുന്ദൻ്റെ സമഗ്ര സംഭാവനയ്ക്കു സമർപ്പിച്ച പുരസ്കാരം നൽകിക്കൊണ്ടാണ് ഏഷ്യയിലെ ഏറ്റവും വലിയ സമാജം അവാർഡ് നൽകുന്ന ആശയത്തിന് തുടക്കമിട്ടത്. മലയാള സാഹിത്യത്തിലെ പ്രഗത്ഭരായ ജൂറിയായിരിക്കും പുരസ്കാരത്തിന് പുസ്തകം തിരഞ്ഞെടുക്കുന്നത്. ജൂൺ രണ്ടാം വാരത്തിൽ, പ്രശസ്ത സാഹിത്യ പ്രതിഭകൾ പങ്കെടുക്കുന്ന സാഹിത്യോത്സവത്തിൽ വെച്ച് പുരസ്കാര വിതരണം നടത്തും.
മുംബൈ മലയാളികളുടെ സാഹിത്യ മുന്നേറ്റത്തിൽ ശ്രദ്ധേയമായ ഇടപെടലുകളാണ് കേരളീയ സമാജം ഡോംബിവ്ലി നിർവ്വഹിക്കുന്നത്.
കഴിഞ്ഞ വർഷം വജ്ര ജൂബിലിയോടനുബന്ധിച്ചു സംഘടിപ്പിച്ച ‘സമന്വയം 25’ ഭാഷാതിർത്തികൾ കടന്നുപോയ സാഹിത്യ സംഗമമായിരുന്നു. മറാഠി, ഹിന്ദി, കന്നഡ, മലയാളം ഭാഷകളിലെ പ്രശസ്തരായ എഴുത്തുകാരുടെ നേതൃത്വത്തിൽ ഒരേ വേദിയിൽ സാഹിത്യ സംവാദങ്ങൾ നടന്നത് സാഹിത്യ പ്രേമികൾക്ക് നവ്യാനുഭവമായി.
പിന്നീട് നടന്ന ‘മുകുന്ദപർവ്വം’ സാഹിത്യോത്സവത്തിൽ മലയാള കഥയുടെ ജീവിക്കുന്ന ഇതിഹാസം എം. മുകുന്ദന്റെ രചനകളിലൂടെ ഒരു ദിവസം മുഴുവൻ സംവാദാത്മകമായി സഞ്ചരിച്ച ദിവസമായിരുന്നു. അതോടനുബന്ധിച്ചാണ് എം. മുകുന്ദന് സമഗ്രസംഭാവനയ്ക്കായി പുരസ്കാരവും സമർപ്പിച്ചത്. തുടർന്ന് മലയാള ചെറുകഥയിലെ ശ്രദ്ധേയനായ വി.ആർ. സുധീഷിന്റെ കഥകൾ ചർച്ച ചെയ്യുകയും വിലയിരുത്തുകയും ചെയ്തു. പരിപാടികളിൽ എം. മുകുന്ദൻ, വി.ആർ. സുധീഷ്, കല്പറ്റ നാരായണൻ എന്നിവർ സന്നിഹിതരായിരുന്നു.
കൃതികൾ അയക്കേണ്ട വിലാസം-
General, Secretary/Secretary Arts and Culture,
Keraleeya Samajam( Regd.),Dombivli,
Shubham Karoti Building,
2nd floor,
Bhaji prabhu chowk,
Dombivli (E) 421201
Contact Numbers- 8779883933/9820886717
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | MAY 9, 2026 SATURDAY 4.30 P.M. | KAIRALI NEWS
