കാഠ്മണ്ഡു: നേപ്പാൾ–ടിബറ്റ് അതിർത്തിയിലെ റസുവ ജില്ലയിൽ വിനാശകരമായ മിന്നൽപ്രളയം തീർഥാടകരുടെ മടക്കയാത്ര വഴിമുടക്കിയെങ്കിലും, ‘കൈലാസ് വിത്ത് മോഹൻജി 2026’ യാത്രയിലെ 25 രാജ്യങ്ങളിൽ നിന്നുള്ള 340 തീർഥാടകരും സുരക്ഷിതമായി കാഠ്മണ്ഡുവിൽ തിരിച്ചെത്തി. ഓഗസ്റ്റ് 26-ന് റസുവയിൽ ദുരന്തമുണ്ടാകുന്നതിന് 48 മണിക്കൂറിൽ താഴെ മുമ്പാണ് അവസാന സംഘം അതിർത്തി കടന്ന് കെറുങ്ങിലെത്തിയത്.

മൂന്ന് ബാച്ചുകളിലായി യാത്ര ചെയ്ത സംഘത്തിലെ അവസാന ബസുകളും സെപ്റ്റംബർ ഒന്നിന് രാത്രിയോടെ കാഠ്മണ്ഡുവിലെത്തി. നിശ്ചയിച്ച സമയത്തേക്കാൾ ഒരു ദിവസം മുമ്പാണ് മുഴുവൻ സംഘവും സുരക്ഷിതമായി തിരിച്ചെത്തിയത്.

ദുരന്തത്തിനിടയിലും തീർഥാടനം പൂർത്തിയാക്കി

റസുവ മേഖലയിൽ മിന്നൽപ്രളയത്തെ തുടർന്ന് റസുവ–ഗ്യിറോങ് റോഡ് തകർന്നതോടെ ടിബറ്റിൽ നിന്ന് നേപ്പാളിലേക്ക് മടങ്ങാനുള്ള പ്രധാന പാത അടഞ്ഞു. ഭക്ഷണവും മറ്റ് അവശ്യസാധനങ്ങളും എത്തിക്കുന്നതിലും തടസ്സം നേരിട്ടു. നിരവധി തീർഥാടക സംഘങ്ങൾ വിവിധയിടങ്ങളിൽ കുടുങ്ങിയ സാഹചര്യത്തിൽ ‘കൈലാസ് വിത്ത് മോഹൻജി’ സംഘത്തിനും വലിയ വെല്ലുവിളിയാണ് നേരിടേണ്ടിവന്നത്.

എന്നാൽ പ്രതിസന്ധിക്കിടയിലും തീർഥാടകരുടെ സുരക്ഷയ്ക്ക് മുൻഗണന നൽകി മടക്കയാത്രയ്ക്കുള്ള ബദൽ മാർഗങ്ങൾ സംഘാടകർ കണ്ടെത്തി. നേപ്പാളും ചൈനയും പ്രത്യേക സാഹചര്യത്തിൽ കോഡാരി–ടാറ്റോപാനി അതിർത്തി തുറന്നതോടെ രണ്ട് വലിയ ബാച്ചുകളെ ഈ വഴി തിരിച്ചെത്തിച്ചു. മൂന്നാമത്തെ ചെറിയ സംഘം തക്ലാകോട്ട് വഴിയും മടങ്ങി.

മണ്ണിടിച്ചിലും പ്രതികൂല കാലാവസ്ഥയും ഉൾപ്പെടെയുള്ള വെല്ലുവിളികൾ നേരിട്ടെങ്കിലും എല്ലാ സംഘങ്ങളും സുരക്ഷിതമായി കാഠ്മണ്ഡുവിലെത്തി. ചില ഘട്ടങ്ങളിൽ സുരക്ഷിത യാത്ര ഉറപ്പാക്കാൻ പൊലീസ് അകമ്പടിയും ഏർപ്പെടുത്തി.

340 പേരിൽ 337 പേർക്ക് മാനസസരോവർ–കൈലാസ് ദർശനം

യാത്രയ്ക്കിടെ 340 തീർഥാടകരിൽ മൂന്ന് പേർ ഒഴികെ എല്ലാവർക്കും മാനസസരോവറിന്റെയും കൈലാസിന്റെയും ദർശനം ലഭിച്ചു. 85 ശതമാനം തീർഥാടകരും കൈലാസ് പരിക്രമ വിജയകരമായി പൂർത്തിയാക്കി.

ഈ വർഷത്തെ തീർഥാടനത്തിന് പ്രത്യേക ആത്മീയ പ്രാധാന്യവുമുണ്ടായിരുന്നു. ഹിന്ദു പാരമ്പര്യമനുസരിച്ച് 12 വർഷത്തിലൊരിക്കൽ വരുന്ന ദേവ കുംഭ വർഷവും, ചൈനീസ് പാരമ്പര്യമനുസരിച്ച് 60 വർഷത്തിലൊരിക്കൽ വരുന്ന ഫയർ ഹോഴ്സ് വർഷവും ഒരുമിച്ചെത്തിയ വർഷമായിരുന്നു 2026.

വർഷങ്ങൾക്ക് ശേഷം മോഹൻജി തന്നെ തീർഥാടകരോടൊപ്പം മാനസസരോവർ വരെ യാത്ര ചെയ്യുകയും വിവിധ ആത്മീയ ചടങ്ങുകൾക്ക് നേതൃത്വം നൽകുകയും ചെയ്തു. ദക്ഷിണ അമേരിക്കയിലെ ആൻഡീസ് പർവതനിരകളിൽ നിന്നുള്ള തദ്ദേശീയ മൂപ്പന്മാർ, നോർവെയിലെ സാമി ജനതയുടെ ആത്മീയ ജ്ഞാനസംരക്ഷകർ, ആത്മീയ അധ്യാപകൻ മതിയാസ് ഡി സ്റ്റെഫാനോ, ഹരിദ്വാറിലെയും ഷിർഡിയിലെയും സന്ന്യാസിമാരും പുരോഹിതന്മാരും യാത്രയിൽ പങ്കെടുത്തു.

“ഓരോരുത്തരെയും സുരക്ഷിതമായി വീട്ടിലെത്തിക്കുകയായിരുന്നു ലക്ഷ്യം”

മോഹൻജി ഫൗണ്ടേഷൻ സിഇഒ മധുസൂദൻ രാജഗോപാലൻ പറഞ്ഞു:
“കുറച്ച് ദിവസത്തേക്ക് അടുത്ത ഘട്ടം എന്താണെന്നോ തിരിച്ചുപോകാനുള്ള വഴി ഏതാണെന്നോ വ്യക്തതയുണ്ടായിരുന്നില്ല. എന്നാൽ സമ്മർദ്ദവും ആശയക്കുഴപ്പവും നിലനിന്നപ്പോഴും സംഘത്തെ ഒരുമിച്ച് നിർത്തേണ്ടതുണ്ടായിരുന്നു.”

മോഹൻജി പറഞ്ഞു: “ഓരോ വ്യക്തിയെയും സുരക്ഷിതമായി, സമയത്തിന് മുമ്പ്, അധിക ചെലവൊന്നുമില്ലാതെ വീട്ടിലെത്തിക്കുക എന്നതായിരുന്നു ഞങ്ങളുടെ ഏറ്റവും വലിയ മുൻഗണന.”

യാത്രാ സംവിധാനങ്ങൾ പുനഃക്രമീകരിച്ച സംഘാടകർ, ഓപ്പറേറ്റർമാർ, ഗൈഡുമാർ, ഷെർപ്പമാർ, ഡ്രൈവർമാർ എന്നിവരുടെ കൂട്ടായ പരിശ്രമമാണ് സുരക്ഷിത മടക്കയാത്ര സാധ്യമാക്കിയതെന്നും അദ്ദേഹം പറഞ്ഞു.

ദുരന്തബാധിത റസുവയിലേക്ക് സഹായവുമായി ACT Foundation

യാത്ര വിജയകരമായി പൂർത്തിയായെങ്കിലും റസുവയിലെ ദുരന്തബാധിതരുടെ ദുരിതം അവസാനിച്ചിട്ടില്ല. മോഹൻജി ആരംഭിച്ച മാനവിക സംഘടനയായ ACT Foundation, ദുരന്തബാധിതർക്ക് സഹായമെത്തിക്കുന്നതിനായി ധനസമാഹരണവും ദുരിതാശ്വാസ പ്രവർത്തനങ്ങളും ആരംഭിച്ചിട്ടുണ്ട്.

പ്രകൃതിദുരന്തവും അനിശ്ചിതത്വവും വഴിമുടക്കിയിട്ടും 25 രാജ്യങ്ങളിൽ നിന്നുള്ള 340 തീർഥാടകരെയും സുരക്ഷിതമായി തിരിച്ചെത്തിക്കാനായതാണ് ‘കൈലാസ് വിത്ത് മോഹൻജി 2026’ യാത്രയുടെ ഏറ്റവും വലിയ നേട്ടം. തീർഥാടനം അവസാനിച്ചെങ്കിലും ദുരിതബാധിതർക്കൊപ്പമുള്ള സേവനദൗത്യം തുടരുകയാണ്.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI | Every Saturday | 4:30 PM | Kairali News