മുംബൈ: ദസറ–ദീപാവലി അവധിക്കാലത്തെ ആഭ്യന്തര വിനോദസഞ്ചാര സീസൺ ലക്ഷ്യമിട്ട് കേരള ടൂറിസം വിപുലമായ പ്രചാരണ പരിപാടികൾക്ക് തുടക്കമിട്ടു. മഹാരാഷ്ട്ര ഉൾപ്പെടെയുള്ള പടിഞ്ഞാറൻ, വടക്കൻ സംസ്ഥാനങ്ങളിൽ ട്രാവൽ ട്രേഡ് പങ്കാളിത്ത സംഗമങ്ങളും റോഡ്‌ഷോകളും സംഘടിപ്പിച്ചാണ് കേരള ടൂറിസം കൂടുതൽ സഞ്ചാരികളെ സംസ്ഥാനത്തേക്ക് എത്തിക്കാൻ ലക്ഷ്യമിടുന്നത്.

മുംബൈയിൽ നടന്ന B2B പങ്കാളിത്ത സംഗമത്തിൽ കേരളത്തിൽ നിന്നുള്ള 50ഓളം ടൂറിസം മേഖലയിലെ പ്രതിനിധികൾ പങ്കെടുത്തു. മഹാരാഷ്ട്രയിലെ ട്രാവൽ ട്രേഡ് പ്രതിനിധികൾക്ക് മുന്നിൽ കേരളത്തിന്റെ വിവിധ ടൂറിസം സാധ്യതകളും ആകർഷകമായ ഹോളിഡേ പാക്കേജുകളും അവതരിപ്പിച്ചു.

ആറ് രാത്രികൾ ഉൾപ്പെടുന്ന യാത്രാ പാക്കേജുകളാണ് പ്രധാനമായും പരിചയപ്പെടുത്തിയത്. കടൽത്തീരങ്ങൾ, കായലുകൾ, മലനിരകൾ, വനമേഖലകൾ എന്നിവയ്ക്കൊപ്പം കേരളത്തിന്റെ പ്രകൃതി ഭംഗിയും സംസ്കാരവും പൈതൃകവും ഭക്ഷണ വൈവിധ്യവും ഒരുമിച്ച് ആസ്വദിക്കാവുന്ന തരത്തിലാണ് പാക്കേജുകൾ ഒരുക്കിയിരിക്കുന്നത്.

2026ലെ ആദ്യ പാദത്തിൽ ആഭ്യന്തര വിനോദസഞ്ചാരികളുടെ വരവിൽ 10.98 ശതമാനം വർധന രേഖപ്പെടുത്തിയതായാണ് കേരള ടൂറിസത്തിന്റെ കണക്ക്. ദസറ–ദീപാവലി അവധിക്കാലത്ത് സെപ്റ്റംബർ മുതൽ നവംബർ വരെയുള്ള കാലയളവിൽ ആഭ്യന്തര സഞ്ചാരികളുടെ എണ്ണം കൂടുതൽ ഉയർത്തുകയാണ് പ്രചാരണത്തിന്റെ പ്രധാന ലക്ഷ്യം.

കേരളത്തെ പ്രധാന Experiential Tourism Hub ആയി ഉയർത്തുന്നതിനുള്ള തന്ത്രത്തിന്റെ ഭാഗമായാണ് പ്രചാരണം നടത്തുന്നതെന്ന് ടൂറിസം മന്ത്രി പി. സി. വിഷ്ണുനാഥ് പറഞ്ഞു. സംസ്കാരം, പൈതൃകം, തീർഥാടന കേന്ദ്രങ്ങൾ, കടൽത്തീരങ്ങൾ, വന്യജീവി സങ്കേതങ്ങൾ, കേരളീയ ഭക്ഷണ വൈവിധ്യം എന്നിവ സഞ്ചാരികൾക്ക് വേറിട്ട അനുഭവങ്ങൾ നൽകുമെന്നും മന്ത്രി വ്യക്തമാക്കി.

അഹമ്മദാബാദ്, വഡോദര, മുംബൈ എന്നിവിടങ്ങളിലെ B2B സംഗമങ്ങൾക്ക് പിന്നാലെ പൂനെ, ഡൽഹി, ജയ്പൂർ, സൂറത്ത്, നാഗ്പൂർ എന്നിവിടങ്ങളിലും ഒക്ടോബർ–നവംബർ മാസങ്ങളിൽ ട്രാവൽ ട്രേഡ് സംഗമങ്ങളും റോഡ്‌ഷോകളും സംഘടിപ്പിക്കും.

കേരളത്തിന്റെ ടൂറിസം സാധ്യതകൾക്ക് അന്താരാഷ്ട്ര തലത്തിലും ശ്രദ്ധ ലഭിക്കുന്നുണ്ട്. Rough Guides 2026ൽ സന്ദർശിക്കേണ്ട ലോകത്തിലെ 26 പ്രധാന ലക്ഷ്യസ്ഥാനങ്ങളിൽ കേരളത്തെയും ഉൾപ്പെടുത്തിയതായി ടൂറിസം വകുപ്പ് അറിയിച്ചു. Lonely Planet 2026ലെ മികച്ച 25 യാത്രാനുഭവങ്ങളുടെ പട്ടികയിൽ കേരളത്തിന്റെ ഭക്ഷണ സംസ്കാരത്തെയും ഉൾപ്പെടുത്തിയിട്ടുണ്ട്.

മഹാരാഷ്ട്രയിൽ നിന്നുള്ള സഞ്ചാരികൾക്ക് കേരളത്തിലേക്കുള്ള മികച്ച റെയിൽ–വിമാന കണക്റ്റിവിറ്റിയും പ്രചാരണത്തിന് അനുകൂല ഘടകമാണ്. കൊച്ചി, തിരുവനന്തപുരം, കോഴിക്കോട്, കണ്ണൂർ തുടങ്ങിയ പ്രധാന വിമാനത്താവളങ്ങളിൽ നിന്ന് മുംബൈയിലേക്ക് നേരിട്ടുള്ള വിമാന സർവീസുകൾക്കും ബെംഗളൂരു, ഹൈദരാബാദ്, ചെന്നൈ എന്നിവിടങ്ങളിലൂടെയുള്ള കണക്റ്റിംഗ് സർവീസുകൾക്കും സാധ്യതയുണ്ട്.

ദസറയും ദീപാവലിയും ചേർന്നെത്തുന്ന അവധിക്കാലത്ത് മഹാരാഷ്ട്രയിൽ നിന്നുള്ള കൂടുതൽ സഞ്ചാരികളെ കേരളത്തിലേക്ക് എത്തിക്കുകയാണ് കേരള ടൂറിസത്തിന്റെ പുതിയ പ്രചാരണത്തിന്റെ ലക്ഷ്യം. എന്നാൽ കൂടുതൽ സഞ്ചാരികളെ കേരളത്തിലേക്ക് എത്തിക്കാനുള്ള ശ്രമങ്ങൾക്ക് മുന്നിൽ ചില വെല്ലുവിളികളുമുണ്ട്. മറ്റ് സംസ്ഥാനങ്ങളുമായി കടുത്ത മത്സരമാണ് ആഭ്യന്തര ടൂറിസം മേഖലയിൽ കേരളം നേരിടുന്നത്. യാത്രാ ചെലവ്, വിമാന–റെയിൽ കണക്റ്റിവിറ്റി, ഉത്സവകാലത്തെ ഉയർന്ന നിരക്കുകൾ, അവസാന നിമിഷ ബുക്കിംഗുകളിലെ ലഭ്യത തുടങ്ങിയ ഘടകങ്ങൾ സഞ്ചാരികളുടെ തീരുമാനത്തെ സ്വാധീനിച്ചേക്കാം. ഇതോടൊപ്പം പുതിയ ടൂറിസം ഉൽപ്പന്നങ്ങൾ കൂടുതൽ ഫലപ്രദമായി വിപണിയിലെത്തിക്കുകയും, മഹാരാഷ്ട്രയിലെ സഞ്ചാരികൾക്ക് അനുയോജ്യമായ പാക്കേജുകൾ ഒരുക്കുകയും ചെയ്യേണ്ടതുണ്ട്. ദസറ–ദീപാവലി സീസണിലെ കേരള ടൂറിസത്തിന്റെ പ്രചാരണം ഈ വെല്ലുവിളികളെ എത്രത്തോളം മറികടക്കും എന്നതാണ് ഇനി ശ്രദ്ധേയം.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI
Every Saturday | 4:30 PM | Kairali News