പൻവേൽ മലയാളി സമാജത്തിന്റെ ആഭിമുഖ്യത്തിൽ നടന്ന ഓണാഘോഷ പരിപാടികൾ ശ്രദ്ധേയമായി. സെപ്റ്റംബർ 28 ഞായറാഴ്ച രാവിലെ പത്ത് മണിക്ക് താലപ്പൊലിയുടെയും ചെണ്ടമേളത്തിന്റെയും അകമ്പടിയോടെ മാവേലി മന്നനെ വരവേറ്റു കൊണ്ടാണ് പൻവേൽ വിരൂപാക്ഷ ഹാളിൽ ആഘോഷപരിപാടികൾക്ക് തുടക്കമിട്ടത്.
തുടർന്ന് സമാജം കുടുംബാംഗങ്ങൾ ചേർന്നവതരിപ്പിക്കുന്ന വൈവിധ്യമാർന്ന കലാപരിപാടികളും അരങ്ങേറി.
സാംസ്കാരിക സമ്മേളനത്തിൽ കവിയും മുംബൈയിലെ മുതിർന്ന സാംസ്കാരിക പ്രവർത്തകനുമായ ജി വിശ്വനാഥൻ, പ്രമുഖ നർത്തകിയും എഴുത്തുകാരിയുമായ നിഷ ഗിൽബർട്ട്, നോർക്ക ഡെവലപ്പ്മെന്റ് ഓഫീസർ എസ് റഫീഖ് എന്നിവർ വിശിഷ്ടാതിഥികളായിരുന്നു. മികച്ച മലയാളം അധ്യാപികയായി കേരള സർക്കാർ തിരഞ്ഞെടുത്ത നിഷ പ്രകാശിനെ ചടങ്ങിൽ ആദരിച്ചു.
വനിതകളുടെയും കുട്ടികളുടെയും സജീവ പങ്കാളിത്തം ഓണാഘോഷ പരിപാടികൾക്ക് ആവേശം പകർന്നു. പ്രസിഡന്റ് ടി എൻ ഹരിഹരൻ, സെക്രട്ടറി സണ്ണി മാത്യു, ജനറൽ കൺവീനർ സതീഷ് നായർ എന്നിവരുടെ നേതൃത്വത്തിൽ സോമരാജൻ, കെ എ ജോസഫ്, സന്ധ്യ വിനോദ് (വനിതാ വിഭാഗം), ജോളി തോമസ് എന്നിവരാണ് ഏകോപനം നിർവഹിച്ചത്.
ചടങ്ങിൽ പൂക്കള മത്സരത്തിൽ പങ്കെടുത്ത ടീമുകൾക്കുള്ള സമ്മാന വിതരണവും നടന്നു. കൂടാതെ എസ് എസ് സി, എച്ച് എസ് സി പരീക്ഷകളിൽ ഉയർന്ന മാർക്ക് നേടിയ കുട്ടികളെ അനുമോദിച്ചു.
