ഡോംബിവ്‌ലി: വിദ്യാർത്ഥികളുടെ പൊതുവിജ്ഞാനവും ബൗദ്ധിക മികവും പ്രോത്സാഹിപ്പിക്കുന്നതിനായി സംഘടിപ്പിച്ച 26-ാമത് കുഞ്ഞമ്മ ഡേവിഡ് മെമ്മോറിയൽ റോളിങ് ട്രോഫി ക്വിസ് മത്സരം നടന്നു. ഡോംബിവ്‌ലിയിലെ ഹോളി ഏഞ്ചൽസ് സ്കൂൾ കുഞ്ഞമ്മ ഡേവിഡ് മെമ്മോറിയൽ ഓഡിറ്റോറിയത്തിൽ നടന്ന മത്സരത്തിൽ കല്യാൺ, ഭീവണ്ടി, അംബർനാഥ്, ഡോംബിവ്‌ലി മേഖലകളിൽ നിന്നായി 17 സ്കൂളുകൾ മത്സരത്തിൽ പങ്കെടുത്തു.
മത്സരത്തിൽ സെന്റ് തോമസ് സ്കൂൾ ഒന്നാം സ്ഥാനം നേടി. ബി.ടി. ഗെയ്ക്‌വാഡ് സ്കൂൾ ഒന്നാം റണ്ണർ അപ്പായപ്പോൾ സെന്റ് സേവ്യേഴ്‌സ് സ്കൂൾ രണ്ടാം റണ്ണർ അപ്പായി.
സൗരഭ് ബേനിവാൽ ക്വിസ് മാസ്റ്ററായി മത്സരം നയിച്ചു. വിവിധ മേഖലകളിൽ നിന്നെത്തിയ വിദ്യാർത്ഥികൾക്ക് അറിവും ചിന്താശേഷിയും പ്രകടിപ്പിക്കാനുള്ള വേദിയായി മത്സരം മാറി.
ഹോളി ഏഞ്ചൽസ് സ്കൂൾ, കോളേജ് സ്ഥാപനങ്ങളുടെ സ്ഥാപക പ്രിൻസിപ്പലും ഡയറക്ടറുമായ ഡോ. ഉമ്മൻ ഡേവിഡിന്റെ മാതാവ് കുഞ്ഞമ്മയുടെ സ്മരണയ്ക്കായാണ് റോളിങ് ട്രോഫി ഏർപ്പെടുത്തിയിരിക്കുന്നത്. വർഷങ്ങളായി തുടരുന്ന ഈ വിജ്ഞാനമത്സരം വിദ്യാർത്ഥികളിൽ പഠനത്തോടുള്ള താൽപര്യം വളർത്തുന്നതിനും പൊതുവിജ്ഞാനം മെച്ചപ്പെടുത്തുന്നതിനും ലക്ഷ്യമിടുന്നു.
മത്സരവിജയികൾക്ക് ഡോ. ഉമ്മൻ ഡേവിഡ് സമ്മാനങ്ങൾ വിതരണം ചെയ്തു. റോളിങ് ട്രോഫിയും മറ്റ് സമ്മാനങ്ങളും ഏറ്റുവാങ്ങിയ വിജയികളെ ചടങ്ങിൽ അഭിനന്ദിച്ചു.
പാഠ്യപഠനത്തിനപ്പുറം പൊതുവിജ്ഞാനവും യുക്തിചിന്തയും വളർത്തുന്ന ഇത്തരം മത്സരങ്ങൾ വിദ്യാർത്ഥികളുടെ സമഗ്രവികസനത്തിന് സഹായകരമാണ്. കുഞ്ഞമ്മയുടെ സ്മരണ നിലനിർത്തുന്നതിനൊപ്പം സ്കൂളുകൾക്കിടയിൽ ആരോഗ്യകരമായ മത്സരബോധം വളർത്താനും ഈ സംരംഭം വഴിയൊരുക്കുന്നു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI Every Saturday | 4:30 PM | Kairali News
