നവി മുംബൈ: കമ്പനിയുടെ ഉടമയെന്ന വ്യാജേന വാട്സ്ആപ്പ് സന്ദേശങ്ങളിലൂടെ ജീവനക്കാരെ വിശ്വസിപ്പിച്ച് 62 ലക്ഷം രൂപ തട്ടിയെടുത്തെന്ന കേസിൽ മലയാളി യുവാവ് അറസ്റ്റിൽ. കണ്ണൂർ സ്വദേശിയായ ഷമീർ ടി.പി.യെയാണ് നവി മുംബൈ സൈബർ പൊലീസ് അറസ്റ്റ് ചെയ്തത്. സംഭവത്തിൽ മറ്റ് സൈബർ തട്ടിപ്പ് കേസുകളുമായുള്ള ബന്ധവും പൊലീസ് അന്വേഷിച്ചുവരികയാണ്.
നവി മുംബൈയിലെ സി.ബി.ഡി. ബെലാപൂരിൽ പ്രവർത്തിക്കുന്ന കാർഗോ മൂവേഴ്സ് ആൻഡ് ലോജിസ്റ്റിക്സ് പ്രൈവറ്റ് ലിമിറ്റഡ് എന്ന സ്ഥാപനത്തെയാണ് തട്ടിപ്പുകാർ ലക്ഷ്യമിട്ടത്. കമ്പനിയുടെ ഉടമ എ.ജി. ജോർജിന്റെ പേരും ചിത്രവും ഉപയോഗിച്ച് വാട്സ്ആപ്പിലൂടെ അക്കൗണ്ടന്റിനെ ബന്ധപ്പെടുകയായിരുന്നു. കമ്പനിയുടെ ആവശ്യത്തിനായി പണം കൈമാറണമെന്ന നിർദേശം ലഭിച്ചതോടെ ജീവനക്കാർ പണം കൈമാറിയെന്നാണ് റിപ്പോർട്ട്.
2026 ഓഗസ്റ്റ് 19 മുതൽ 31 വരെയുള്ള കാലയളവിലാണ് തട്ടിപ്പ് നടന്നത്. സംഭവത്തിൽ സെപ്റ്റംബർ രണ്ടിന് കമ്പനി അധികൃതർ നൽകിയ പരാതിയുടെ അടിസ്ഥാനത്തിൽ നവി മുംബൈ സൈബർ പൊലീസ് കേസെടുത്ത് അന്വേഷണം ആരംഭിച്ചു.
32 ലക്ഷം രൂപ ഷമീറിന്റെ അക്കൗണ്ടിൽ
തട്ടിപ്പിലൂടെ നഷ്ടമായ 62 ലക്ഷം രൂപയിൽ 32 ലക്ഷം രൂപ ഷമീറിന്റെ ഇൻഡസ്ഇൻഡ് ബാങ്ക് അക്കൗണ്ടിലേക്ക് എത്തിയതായി അന്വേഷണത്തിൽ കണ്ടെത്തി. പണമിടപാടുകളുടെ വിശദാംശങ്ങൾ പരിശോധിച്ച പൊലീസ് കണ്ണൂരിലെത്തിയാണ് ഒക്ടോബർ മൂന്നിന് ഇയാളെ അറസ്റ്റ് ചെയ്തത്.
തട്ടിപ്പിൽ പങ്കാളിയായ മറ്റൊരാൾക്കായുള്ള തിരച്ചിൽ തുടരുകയാണ്. തട്ടിപ്പുമായി ബന്ധപ്പെട്ട വിവിധ ബാങ്ക് അക്കൗണ്ടുകളിലായി ഏകദേശം 15 ലക്ഷം രൂപ മരവിപ്പിച്ചതായും പൊലീസ് ഉദ്യോഗസ്ഥരെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നു.
ആറ് സൈബർ തട്ടിപ്പ് പരാതികളുമായും ബന്ധം
ഷമീറിന്റെ ബാങ്ക് അക്കൗണ്ട് രാജ്യത്തിന്റെ വിവിധ ഭാഗങ്ങളിൽ രജിസ്റ്റർ ചെയ്ത ആറ് സൈബർ തട്ടിപ്പ് പരാതികളുമായി ബന്ധപ്പെട്ടിട്ടുണ്ടെന്നും അന്വേഷണത്തിൽ കണ്ടെത്തിയതായി റിപ്പോർട്ടുകളുണ്ട്. ഉത്തർപ്രദേശ്, ഡൽഹി തുടങ്ങിയ സംസ്ഥാനങ്ങളിൽ രജിസ്റ്റർ ചെയ്ത കേസുകളുമായുള്ള ബന്ധവും പരിശോധിക്കുന്നുണ്ട്.
കമ്പനി ഉടമയുടെ പേരിൽ ജീവനക്കാരെ വിശ്വസിപ്പിച്ച് പണം കൈമാറിക്കുന്ന ‘ബോസ് സ്കാം’ രീതിയിലാണ് തട്ടിപ്പ് നടന്നതെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ കൂടുതൽ പേർക്ക് പങ്കുണ്ടോയെന്നും തട്ടിപ്പിലൂടെ കൈമാറിയ പണം എവിടേക്കാണ് പോയതെന്നും കണ്ടെത്താനുള്ള അന്വേഷണം തുടരുകയാണ്.
ജാഗ്രത: മേലധികാരികളുടെയോ കമ്പനി ഉടമകളുടെയോ പേരിൽ വാട്സ്ആപ്പിലൂടെ പണം കൈമാറാൻ നിർദേശം ലഭിച്ചാൽ, ഇടപാട് നടത്തുന്നതിന് മുമ്പ് അവരുടെ ഔദ്യോഗിക നമ്പറിൽ നേരിട്ട് ബന്ധപ്പെട്ട് ഉറപ്പുവരുത്തണമെന്ന് സൈബർ സുരക്ഷാ വിദഗ്ധർ നിർദേശിക്കുന്നു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI Every Saturday | 4:30 PM | Kairali News
