പൻവേൽ: കേരളത്തിന്റെ സമ്പദ്‌വ്യവസ്ഥയുടെ പ്രധാന വരുമാന സ്രോതസ്സുകളിലൊന്നാണ് വിദേശരാജ്യങ്ങളിലുൾപ്പെടെ ജോലി ചെയ്യുന്ന പ്രവാസി മലയാളികളെന്നും പ്രവാസികൾക്ക് കൂടുതൽ പ്രതീക്ഷയേകുന്ന പ്രഖ്യാപനങ്ങൾ ഉടൻ ഉണ്ടാകുമെന്നും ഇടുക്കി ലോക്‌സഭാംഗം ഡീൻ കുര്യാക്കോസ് പറഞ്ഞു.

പൻവേൽ മലയാളി സമാജത്തിന്റെ ഈ വർഷത്തെ ഓണാഘോഷത്തിൽ മുഖ്യാതിഥിയായി പങ്കെടുത്ത് സംസാരിക്കുകയായിരുന്നു അദ്ദേഹം. ഓണത്തിന്റെ ഐക്യത്തിന്റെയും സാഹോദര്യത്തിന്റെയും സന്ദേശം ഉൾക്കൊണ്ട് മേഖലയിലെ മലയാളി സമൂഹത്തെ ഒരുമിപ്പിച്ച് സംഘടിപ്പിച്ച ആഘോഷപരിപാടികളെ അദ്ദേഹം അഭിനന്ദിച്ചു.

പ്രവാസി മലയാളികളുടെ സാംസ്കാരിക കൂട്ടായ്മ ശക്തിപ്പെടുത്തുന്നതിനും കേരളത്തിന്റെ പാരമ്പര്യവും മൂല്യങ്ങളും പുതുതലമുറയിലേക്ക് പകരുന്നതിനുമുള്ള വേദിയായി ഓണാഘോഷം മാറി. സമാജം അംഗങ്ങളും കുട്ടികളും അവതരിപ്പിച്ച വൈവിധ്യമാർന്ന കലാപരിപാടികൾ ആഘോഷങ്ങൾക്ക് മാറ്റുകൂട്ടി.

പൻവേൽ–മാഥേരൻ റോഡിലെ അക്രൂലിയിലുള്ള കാക്കാജി നിവാടിയിൽ രാവിലെ 10 മണിക്ക് ആരംഭിച്ച ആഘോഷത്തിൽ സാമൂഹിക, സാംസ്കാരിക രംഗങ്ങളിലെ പ്രമുഖരടക്കം നിരവധി പേർ പങ്കെടുത്തു. മലയാളി സമൂഹത്തിന്റെ സാംസ്കാരിക പൈതൃകവും ഓണത്തിന്റെ കൂട്ടായ്മാ സന്ദേശവും ഉയർത്തിപ്പിടിക്കുന്ന തരത്തിലായിരുന്നു പരിപാടികൾ ക്രമീകരിച്ചത്.

മ്യൂസിക് റിയാലിറ്റി ഷോ താരങ്ങളായ കുമാരി ദേവനശ്രിയയും ശിവ് ശങ്കർ കൃഷ്ണയും നയിച്ച സംഗീതവിരുന്ന് ആഘോഷത്തിലെ പ്രധാന ആകർഷണങ്ങളിലൊന്നായി.

സമാജം പ്രസിഡന്റ് ടി. എൻ. ഹരിഹരൻ, സെക്രട്ടറി സണ്ണി മാത്യു, ജനറൽ കൺവീനർ സതീഷ് നായർ എന്നിവരുടെ നേതൃത്വത്തിൽ ഭാരവാഹികളും പ്രവർത്തകരും ആഘോഷപരിപാടികൾക്ക് നേതൃത്വം നൽകി. Visit our facebook page for more updates and photos >> https://www.facebook.com/amchimumbailive/

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും
AMCHI MUMBAI – Every Saturday | 4:30 PM | Kairali News