മുംബൈ | ജൂലൈ 5, 2026: പുതിയ അധ്യയന വർഷത്തോടനുബന്ധിച്ച് ബോംബെ കേരളീയ സമിതി, മലാഡ് വെസ്റ്റ് വാർഷിക പുസ്തക-പഠനോപകരണ വിതരണം ചെയ്തു. എസ്.എസ്.സി./എച്ച്.എസ്.സി. പരീക്ഷകളിൽ മികച്ച വിജയം നേടിയ വിദ്യാർത്ഥികളെ സമാജം ഓഫീസിൽ സംഘടിപ്പിച്ച പ്രത്യേക യോഗത്തിൽ അനുമോദിച്ചു.
സാമ്പത്തികമായി പിന്നാക്കം നിൽക്കുന്ന വിദ്യാർത്ഥികൾക്ക് വിദ്യാഭ്യാസത്തിനാവശ്യമായ അടിസ്ഥാന സൗകര്യങ്ങൾ ലഭ്യമാക്കുക എന്ന ലക്ഷ്യത്തോടെയാണ് എല്ലാ വർഷവും ഈ പദ്ധതി നടപ്പാക്കുന്നത്. പരിപാടിയുടെ ഭാഗമായി സമീപ പ്രദേശങ്ങളിലെ വിവിധ സ്കൂളുകളിൽ നിന്ന് എസ്.എസ്.സി., എച്ച്.എസ്.സി. പരീക്ഷകളിൽ മികച്ച വിജയം നേടിയ വിദ്യാർത്ഥികളെ ആദരിക്കുകയും ചെയ്തു.
വിദ്യാഭ്യാസമാണ് സാമൂഹിക മുന്നേറ്റത്തിനുള്ള ഏറ്റവും ശക്തമായ ആയുധമെന്നും, അതിനാൽ വിദ്യാഭ്യാസ പ്രവർത്തനങ്ങൾക്ക് സമിതി എന്നും മുൻഗണന നൽകുമെന്നും പരിപാടി ഉദ്ഘാടനം ചെയ്ത് സംസാരിച്ച സമിതി പ്രസിഡന്റ് അഡ്വ. പത്മ ദിവാകരൻ വ്യക്തമാക്കി.
ജാതി, മതം, വർഗം എന്നിവയുടെ യാതൊരു വേർതിരിവുമില്ലാതെ അർഹരായ വിദ്യാർത്ഥികൾക്ക് സമിതി എല്ലാ വർഷവും സഹായം എത്തിച്ചു കൊണ്ടിരിക്കുകയാണെന്ന് സെക്രട്ടറി അഡ്വ. രാഖി സുനിൽ പറഞ്ഞു.
“ഓരോ കുട്ടിയും ഞങ്ങളുടെ സമാജം കുടുംബത്തിന്റെ ഭാഗമാണ്. വിദ്യാഭ്യാസം എല്ലാവരിലേക്കും തുല്യമായി എത്തണമെന്നതാണ് ഞങ്ങളുടെ ലക്ഷ്യം” രാഖി കൂട്ടിച്ചേർത്തു.
ഈ സേവന പ്രവർത്തനം വർഷങ്ങളായി വിജയകരമായി മുന്നോട്ടുകൊണ്ടുപോകാൻ സഹായിക്കുന്ന ദാതാക്കൾക്കും അഭ്യുദയകാംക്ഷികൾക്കും സന്നദ്ധ പ്രവർത്തകർക്കും ട്രഷറർ കെ. പി. ഗോപാലകൃഷ്ണൻ നന്ദി രേഖപ്പെടുത്തി.
വിദ്യാർത്ഥികൾ, രക്ഷിതാക്കൾ, അധ്യാപകർ, സമിതി ഭാരവാഹികൾ, അംഗങ്ങൾ എന്നിവർ പങ്കെടുത്ത ചടങ്ങിൽ അർഹരായ വിദ്യാർത്ഥികൾക്ക് പുസ്തകങ്ങൾ, നോട്ട്ബുക്കുകൾ, മറ്റ് പഠനോപകരണങ്ങൾ എന്നിവ വിതരണം ചെയ്തു. തുടർന്ന് എസ്.എസ്.സി., എച്ച്.എസ്.സി. പരീക്ഷകളിൽ മികച്ച വിജയം നേടിയ വിദ്യാർത്ഥികൾക്ക് സർട്ടിഫിക്കറ്റുകളും ഉപഹാരങ്ങളും നൽകി ആദരിച്ചു.
സാമൂഹിക പ്രതിബദ്ധതയോടെയുള്ള ഇത്തരം വിദ്യാഭ്യാസ സഹായ പദ്ധതികൾ തുടർന്നും വിപുലീകരിക്കുമെന്ന് സമിതി ഭാരവാഹികൾ അറിയിച്ചു.
മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളുമായി | AMCHI MUMBAI | JULY 4, 2026 SATURDAY 4.30 P.M. | KAIRALI NEWS
