മുംബൈ: മുംബൈയുടെ ജീവിതവും മനുഷ്യരും കാലവും സമ്മാനിച്ച അനുഭവങ്ങളിൽ നിന്ന് പിറന്ന കഥകൾ പങ്കുവെച്ച് മുതിർന്ന മാധ്യമപ്രവർത്തകനും എഴുത്തുകാരനുമായ കാട്ടൂർ മുരളി മുംബൈ സാഹിത്യ വേദിയിൽ കഥ പറയും.

ഒക്ടോബർ 4 ഞായറാഴ്ച വൈകിട്ട് 4.30 മുതൽ മാട്ടുംഗയിലെ കേരള ഭവനിലാണ് പരിപാടി.

മുംബൈയുടെ സാമൂഹിക ജീവിതത്തെയും നഗരത്തിന്റെ വിവിധ തലങ്ങളെയും അടുത്തറിഞ്ഞ മാധ്യമപ്രവർത്തകനാണ് കാട്ടൂർ മുരളി. ദീർഘകാലത്തെ മാധ്യമപ്രവർത്തനത്തിനിടെ നഗരജീവിതത്തിന്റെ വ്യത്യസ്ത മുഖങ്ങൾ അടയാളപ്പെടുത്തിയ നിരവധി രചനകളും അഭിമുഖങ്ങളും കാട്ടൂരിന് സ്വന്തമാണ്. ഹാജി മസ്താനെയും മുംബൈ രവിയെയും കുറിച്ചുള്ള മുരളിയുടെ അഭിമുഖങ്ങൾ മലയാള മാധ്യമരംഗത്ത് ശ്രദ്ധ നേടിയിട്ടുണ്ട്. മികച്ച രചനകൾക്കുള്ള നിരവധി അംഗീകാരങ്ങളും കാട്ടൂർ മുരളി നേടിയിട്ടുണ്ട്.

മുംബൈയുടെ സാമൂഹിക യാഥാർഥ്യങ്ങളെയും നഗരത്തിന്റെ മറുവശങ്ങളെയും ആഴത്തിൽ നിരീക്ഷിക്കുന്ന രചനകളും കാട്ടൂർ മുരളിയുടെ സാഹിത്യപ്രവർത്തനത്തിന്റെ ഭാഗമാണ്. ഫാക്‌ലൻഡ് റോഡിനെക്കുറിച്ചുള്ള അദ്ദേഹത്തിന്റെ രചനകളിൽ നഗരത്തിന്റെ ചരിത്രവും മനുഷ്യജീവിതത്തിന്റെ സങ്കീർണതകളും പ്രതിഫലിക്കുന്നു.

മാധ്യമപ്രവർത്തനത്തിനൊപ്പം സാഹിത്യരംഗത്തും സജീവമായ കാട്ടൂർ മുരളി വിവർത്തകനായും ശ്രദ്ധ നേടിയിട്ടുണ്ട്. മറാത്തി എഴുത്തുകാരൻ ശരൺകുമാർ ലിംബാളെയുടെ ‘വന്ദേ മാതരം’ എന്ന നോവലിന്റെ മലയാള പരിഭാഷ നിർവഹിച്ചത് അദ്ദേഹമാണ്.

മുംബൈയിലെ സാഹിത്യ-സാംസ്കാരിക വേദികളിലും കാട്ടൂർ മുരളിയുടെ സാന്നിധ്യം സജീവമാണ്. സാഹിത്യ ചർച്ചകളിലും കഥാ സംവാദങ്ങളിലും സ്ഥിരമായി പങ്കെടുക്കാറുള്ള മുരളിയുടെ കഥകൾക്കായി കാതോർക്കുകയാണ് നഗരം.

കാട്ടൂർ മുരളി — മുംബൈയെ അടുത്തറിഞ്ഞ മാധ്യമപ്രവർത്തകൻ

മുംബൈയിൽ ജനിച്ച് മുംബൈയിലും കേരളത്തിലുമായി വിദ്യാഭ്യാസം പൂർത്തിയാക്കിയ ശേഷം മുംബൈയിൽ തന്നെ സ്ഥിരതാമസമാക്കിയ കാട്ടൂർ മുരളി, നഗരത്തിലെ മലയാളി മാധ്യമപ്രവർത്തകരിൽ ശ്രദ്ധേയമായ സാന്നിധ്യമാണ്. മറാഠി ഭാഷയിലും പ്രാവീണ്യമുള്ള അദ്ദേഹത്തിന്റെ മാധ്യമപ്രവർത്തനവും രചനകളും മുംബൈ നഗരത്തെയും ഇവിടത്തെ മനുഷ്യജീവിതത്തെയും അടുത്തറിഞ്ഞ അനുഭവങ്ങളുടെ അടയാളങ്ങളാണ്.

വാർത്തകളുടെ പതിവ് ചട്ടക്കൂടുകൾക്കപ്പുറം, പത്രവാർത്തകളിൽ പൂർണമായി ഉൾക്കൊള്ളാനാകാത്ത ജീവിതാനുഭവങ്ങളും നേരിട്ടുള്ള കാഴ്ചകളും രേഖപ്പെടുത്തിയ ‘മുംബൈ മാണൂസ്’ എന്ന പുസ്തകം ഏറെ ശ്രദ്ധിക്കപ്പെട്ടിരുന്നു. നഗരത്തിന്റെ വ്യത്യസ്ത മുഖങ്ങളെയും മനുഷ്യബന്ധങ്ങളെയും ജീവിതസാഹചര്യങ്ങളെയും അടുത്തുനിന്ന് നിരീക്ഷിച്ച ഒരു മാധ്യമപ്രവർത്തകന്റെ അനുഭവസാക്ഷ്യങ്ങൾ കൂടിയാണ് ഈ കൃതി.

കേരളത്തിലെ തൃശൂർ ജില്ലയിലെ കാട്ടൂർ സ്വദേശിയായ മുരളിയുടെ മാധ്യമജീവിതം മുംബൈ നഗരത്തിന്റെ സാമൂഹികവും സാംസ്കാരികവുമായ മാറ്റങ്ങളുമായി ഏറെക്കാലമായി ഇഴചേർന്നതാണ്.

ഈ അനുഭവങ്ങളുടെയും ഓർമ്മകളുടെയും പശ്ചാത്തലത്തിലാണ് മുംബൈ സാഹിത്യ വേദിയിൽ കാട്ടൂർ മുരളി ‘കഥ പറയുന്നത്’. നഗരജീവിതത്തിൽ നിന്ന് കണ്ടെടുത്ത മനുഷ്യരും സംഭവങ്ങളും ഓർമ്മകളും അദ്ദേഹത്തിന്റെ വാക്കുകളിലൂടെ സദസ്സിലെത്തും.

മഹാരാഷ്ട്രയിലെ ഏറ്റവും പുതിയ വാർത്തകളും വിശേഷങ്ങളും

AMCHI MUMBAI
Every Saturday | 4:30 PM | Kairali News