മുംബൈയിലെ ഐനോക്സ് മെട്രോ, സിനിപോളിസ് സീവുഡ്‌സ് എന്നിവയുൾപ്പെടെ ഇന്ത്യയിലുടനീളമുള്ള പ്രധാന തിയേറ്ററുകളിൽ മലയാള ക്രൈം ത്രില്ലറായ ‘ദി കേസ് ഡയറി’ രാജ്യവ്യാപകമായി റിലീസ് ചെയ്തു.
ബെൻസി പ്രൊഡക്ഷൻസിന്റെ ബാനറിൽ കെ.വി അബ്ദുൾ നാസർ ആണ് നിർമാണം.
ദിലീപ് നാരായണനാണ് സംവിധായകൻ. പോലീസ് ഓഫീസർ ക്രിസ്റ്റി സാമിന്റെ പ്രധാന കഥാപാത്രത്തെ അവതരിപ്പിക്കുന്നത് അഷ്‌കർ സൗദാനാണ്. ഈ ചിത്രം പ്രേക്ഷകരെ ആകർഷിക്കുമെന്ന് അഷ്‌കർ ആത്മവിശ്വാസം പ്രകടിപ്പിച്ചു.
എന്റെ കരിയറിലെ ഏറ്റവും ശക്തമായ പ്രകടനങ്ങളിലൊന്നാണ് ക്രിസ്റ്റി സാം എന്ന കഥാപാത്രത്തെ അവതരിപ്പിക്കുന്നതെന്നും അഷ്‌കർ കൂട്ടിച്ചേർത്തു. സ്വന്തം സഹോദരന്റെ മരണത്തിനു പിന്നിലെ സത്യം തേടി പോകുന്ന നീതിമാനായ പോലീസ് ഉദ്യോഗസ്ഥന്റെ കഥപറയുന്ന ചിത്രമാണ് ‘ദി കേസ് ഡയറി’.
വിജയരാഘവൻ, രാഹുൽ മാധവ്, റിയാസ് ഖാൻ, സാക്ഷി അഗർവാൾ, നീരജ്, അമീർ നിയാസ്, ഗോകുലൻ, കിച്ചു ടെല്ലസ്, ബാല, മേഘനാഥൻ, ബിജുക്കുട്ടൻ എന്നിവരുൾപ്പെടെയുള്ള താരനിരയാണ് ചിത്രത്തിലുള്ളത്.
യുവാക്കൾക്ക് രസിക്കുന്ന രീതിയിൽ പാട്ടും ഐറ്റം ഡാൻസും ആക്ഷൻ രംഗങ്ങളുമായി കംപ്ലീറ്റ് എന്റർടെയ്നറായി ഒരുക്കാനാണ് സംവിധായകനായ ദിലീപ് നാരായണൻ ശ്രമിച്ചിരിക്കുന്നത്. കഥയിൽ പുതുമ അവകാശപ്പെടാനില്ലെങ്കിലും ഫ്ളാഷ്ബാക്കിന് കൂടി ഏറെ പ്രാധാന്യം കൊടുത്തുകൊണ്ടുള്ള കഥപറച്ചിൽ പ്രേക്ഷകനിൽ ആകാംക്ഷയുണർത്തുന്നുണ്ട്.
വിഷ്ണു മോഹൻസിത്താര, മധു ബാലകൃഷ്ണൻ, ഫോർ മ്യൂസിക്ക് എന്നിവർ സംഗീതം നൽകുന്ന ചിത്രത്തിലെ ഗാനങ്ങൾ ആസ്വാദ്യകരമാണ്. പശ്ചാത്തല സംഗീതം ചിത്രത്തിലെ വൈകാരിക മുഹൂർത്തങ്ങൾക്ക് കൂടുതൽ ആഴം നൽകി. പ്രേക്ഷകന്റെ മനസ്സുനിറയ്ക്കുന്ന കാഴ്ചകൾ ഒപ്പിയെടുത്ത പി. സുകുമാറിന്റെ ഛായാഗ്രഹണം സിനിമയുടെ നട്ടെല്ലായി മാറുന്നു.
